ەلميرا بايجانوۆا «جۇمىسپەن قامتۋ جول كارتاسى – 2020» باعدارلاماسىنىڭ كومەگىمەن قىز بالالارعا كيىم تىگەتىن شەبەرحانا اشتى.
ول اتىراۋ وبلىسىنان اقتوبەگە 2016 جىلى قونىس اۋداردى. كەلگەن بويدا كاسىپكەرلىكپەن اينالىسۋعا بەل بۋادى. ول ءۇشىن «اتامەكەن» كاسىپكەرلەر پالاتاسىنىڭ كاسىپكەرلىك نەگىزدەرىن ۇيرەتەتىن كۋرستارىنا قاتىسىپ، مەملەكەتتىك قولداۋ شارالارى ارقىلى 4 ملن تەڭگە نەسيە الۋدىڭ ءساتى ءتۇسىپتى.
* نەسيە قاراجاتىنا قاجەتتى قۇرال-جابدىقتار، تىگىن ماشيناسىن ساتىپ الدىم. حابارلاندىرۋ ارقىلى «شىعىس» بازارىنان جالعا بەرەتىن ورىن تاپتىم. العاشىندا كيىمدەردى قىسقارتۋ سەكىلدى ۇساق-تۇيەك شارۋالاردى جاساعان ەدىك، ءقازىر مەكتەپ فورمالارى مەن كونسەرتتىك كوستيۋمدەر تىگەمىز. جەكە تاپسىرىستار قابىلدايمىز. اتەلەدە 3 ادام جۇمىس ىستەيدى،-دەيدى كاسىپكەر.
تىگىن شەبەرحاناسى، نەگىزىنەن، كىشكەنتاي قىزدارعا ارنالعان كيىمدەر تىگەدى. جاس ءسانقويلارعا ارنالعان ءتۇرلى كويلەكتەر مەن سىرت كيىمدەر دايىنداۋ - كاسىپكەردىڭ سۇيىكتى ءىسى. ەلميرا العاشقى كويلەكتەرىن قىزى انەلگە ارناپ تىگۋدەن باستاعان. انەل بيىل اناسىنىڭ كيىمدەرىمەن كىشكەنتاي بالالاردىڭ ءسان الەمىندەگى ەلەۋلى شارا - «Luxury Brand Kids Model Awards Star 2018» بايقاۋىندا ونەر كورسەتىپ، ۇزدىك اتاندى.
* وسى جەتىستىگىمىز مەنى شابىتتاندىردى. الداعى ۋاقىتتا تەك كىشكەنتاي قىزدارعا ارنالعان كيىمدەر دايىنداۋمەن اينالىسامىن دەپ شەشتىم. كاسىبىمدى كەڭەيتىپ، ۇلكەن دۇكەن اشسام دەيمىن. وندا ايماقتاعى ديزاينەرلەردىڭ كيىمدەرى مەن دايىن ونىمدەردى ساتۋدى جوسپارلاپ وتىرمىن. تالعامدى بالا كەزدەن قالىپتاستىرعان ءجون،-دەگەن ەلميرا باجەنوۆا جاقىن ارادى جاڭا كاسىپ كوزىن اشپاقشى.
ونىڭ بۇل باستاماسىنا اقتوبە وبلىسىنىڭ «اتامەكەن» كاسىپكەرلەر پالاتاسى جانىندا جۇمىس ىستەيتىن «تىگىنشىلەر مەن ديزاينەرلەردىڭ وڭىرلىك قاۋىمداستىعى» جان-جاقتى قولداۋ بىلدىرۋدە.
* تىگىنشىلەر قاۋىمداستىعىنىڭ ءبىز سەكىلدى قولونەرمەن اينالىساتىن جاندارعا بەرەرى كوپ. قالادا وتەتىن ءتۇرلى ءسان شارالارىنا قاتىسامىز. ساۋدا نۇكتەلەرى مەن جارمەڭكەلەر
تۋرالى اقپارات الامىز.كاسىپكەرلىكتى قولداۋ شارالارى تۋرالى دا دەر كەزىندە ءبىلىپ وتىرامىز،-دەيدى ەلميرا.
پىكىر قالدىرۋ