اقتوبەدە وبلىستىق تاريحي-ولكەتانۋ مۇراجايىنىڭ جاڭا عيماراتىندا «ن.نازاربايەۆ: ءداۋىر، تۇلعا، قوعام» كوشپەلى قور كورمەسى سالتاناتتى تۇردە اشىلدى.
شارانىڭ تۇساۋكەسەرىنە ق ر پرەزيدەنتى كەڭسەسىنىڭ باستىعى – ق ر تۇڭعىش پرەزيدەنتى – ەلباسى كىتاپحاناسىنىڭ ديرەكتورى مىندەتىن اتقارۋشى ماحمۇد قاسىمبەكوۆ پەن اقتوبە وبلىسىنىڭ اكىمى بەردىبەك ساپاربايەۆ، ارداگەرلەر مەن جۇرتشىلىق، ستۋدەنت جاستار قاتىستى. ماحمۇد قاسىمبەكوۆ ءوزىنىڭ سالەمدەسۋ سوزىندە اقتوبەگە پرەزيدەنتتىڭ ارنايى تاپسىرماسىمەن كەلگەنىن اتاپ ءوتتى.
* قۇتتى مەكەن اقتوبەنىڭ تۇرعىندارىمەن جانە قوناقتارىمەن كەزدەسكەنىمە قۋانىشتىمىن. وسىندا كوشپەلى كورمەنى وتكىزۋ – مەملەكەت باسشىسىنىڭ تاپسىرماسى ەكەنىن ەرەكشە اتاپ وتكىم كەلەدى. ەلباسىمىزدىڭ مۋزەيىن ەل تاۋەلسىزدىگىنىڭ شۇعىلالى شەجىرەسى دەپ اتاۋعا بولادى. سەبەبى، ەلباسىمىز بەن ەل تاۋەلسىزدىگى – ەگىز ۇعىم. ءبىز بۇگىن بۇل كورمەگە مىڭنان اسا ەكسپوناتتار، قۇندى قۇجاتتار، فوتو جانە بەينە ماتەريالدار الىپ كەلىپ وتىرمىز. ولار ەلىمىزدىڭ تاۋەلسىزدىك جىلدارىندا ءجۇرىپ وتكەن داڭقتى جولدارىن ايقىن كورسەتىپ تۇر،-دەدى ول.
وبلىس اكىمى بەردىبەك ساپاربايەۆ وبلىس حالقىن ەلەۋلى وقيعامەن قۇتتىقتادى.
* بۇكىل اقتوبەلىكتىڭ اتىنان ماحمۇد بازارقۇلۇلىنا جانە ەلباسى كىاپحاناسىنىڭ بارلىق قىزمەتكەرلەرىنە كورمەنى ۇيىمداستىرعاندارى ءۇشىن العىس ايتامىن. كورمە وبلىس تۇرعىندارىمەن قوسا، ءبىزدىڭ قوناقتارعا دا قىزىق بولاتىنىنا سەنىمدىمىن. ءارقايسىسىمىز مەملەكەتتىڭ قالاي قالىپتاسقانىن، قانداي اۋىر كۇندەر بولعانىن، قازاقستان وسى 27 جىلدىڭ ىشىندە مەملەكەت باسشىسى نۇرسۇلتان نازاربايەۆتىڭ دانا ساياساتىنىڭ ارقاسىندا دۇنيەجۇزىلىك قاۋىمداستىقتا ءشۇباسىز بەدەلگە قالاي يە بولعانىن ءبىلىپ، ەستە ساقتاۋلدارىمىز كەرەك،-دەدى وبلىس اكىمى.
«ن.نازاربايەۆ: ءداۋىر، تۇلعا، قوعام» كورمەسىنىڭ نەگىزگى ماقساتى – قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ تاۋەلسىز قازاقستاننىڭ تاريحي ومىرىندەگى ءرولىن جۇيەلى تۇردە كەڭىنەن كورسەتۋ. كورمەگە كەلۋشىلەر ەلباسى كىتاپحاناسىنىڭ ارحيۆتىك، كىتاپ، مۇراجاي قورلارىنىڭ ماتەريالدارىمەن تانىسا الادى. العاش رەت اقتوبە جۇرتشىلىعىنىڭ نازارىنا ن.ءا. نازاربايەۆتىڭ جوعارى مەملەكەتتىك ناگرادالارىنىڭ بىرەگەي جيناعى، مەملەكەت باسشىلارى جانە قازاقستاندىق اۆتورلار تارتۋ ەتكەن قولتاڭباسى بار كىتاپتار، سونىمەن قاتار ن.ءا. نازاربايەۆتىڭ شەت تىلدەرگە اۋدارىلعان ەڭبەكتەرى ۇسىنىلدى. كورمە ءتورت بولىمنەن تۇرادى. «ەلباسى جولى» ءبولىمى ق ر تۇڭعىش پرەزيدەنتى – ەلباسى ن.ءا.نازاربايەۆتىڭ ءومىر كەزەڭدەرىنەن سىر شەرتەدى. ەلباسىنىڭ جولى رۋحاني سانانىڭ ءداۋىرى مەن شىعۋى مازمۇنىن بىلدىرەتىن
تاريحي ۇدەرىستەر مەن وقيعالاردى سيپاتتاۋ ارقىلى كورسەتىلەدى. قازاقستان پرەزيدەنتىنىڭ العاشقى بۇكىلحالىقتىق سايلاۋى ەلىمىزدىڭ تاۋەلسىزدىگىنىڭ نەگىزگى باعىتتارىن ايقىنداعان باستى تاريحي تاڭداۋى بولدى. «ەلباسى فەنومەنى» ءبولىمى قازاقستان رەسپۋبليكاسىنىڭ نەگىزىن قالاعان، جاھاندىق كەڭىستىكتە تۇراقتىلىق پەن قاۋىپسىزدىكتىڭ جاڭا يدەيالارىن ەنگىزگەن ن.ءا. نازاربايەۆتىڭ مەملەكەتتىك قۇرىلىم تۇجىرىمداماسىنىڭ قالىپتاسۋى مەن دامۋى تاريحىنا جەتەلەيدى. كوشباسشى فەنومەنى سەمەي يادرولىق پوليگونىنىڭ جابىلۋىنان باستاپ، مەملەكەت استاناسىن اۋىستىرۋ يدەياسىن جۇزەگە اسىرۋعا دەيىنگى تاريحي ماڭىزى بار شەشىمدەر مەن باستامالار ارقىلى كورىنىس تاپقان. «الەم تانىعان ەلباسى» بولىمىندە قازاقستان رەسپۋبليكاسىنىڭ قارقىندى سىرتقى ساياساتى كورسەتىلەدى. بۇل – الەمدىك دەڭگەيدەگى ساياساتكەر، قازاقستان رەسپۋبليكاسىنىڭ تۇڭعىش پرەزيدەنتى ن. ءا. نازاربايەۆتىڭ بيىك بەدەلى مەن اسقاق ابىرويىنىڭ جەمىسى. ەلىمىزدىڭ كوپۆەكتورلى سىرتقى ساياساتى ديپلوماتيالىق تارتۋ-تارالعىلار، جەكە جازبالار، ارحيۆتىك ماتەريالدار ارقىلى كورسەتىلگەن. ءاربىر سىي-سياپاتتان كەز كەلگەن قاۋىپ-قاتەر مەن تۇسىنبەۋشىلىكتەن ازات بەيبىت الەمدى قالىپتاستىرۋداعى ن. ءا. نازاربايەۆتىڭ ەرەن ەڭبەگىن تانىعان شەتەلدىك مەملەكەت جانە ۇكىمەت باسشىلارىنىڭ جەكە قۇرمەتى ايقىن كورىنەدى. «ەلباسى مارتەبەسى – ەل مارتەبەسى» بولىمىندە مەملەكەت باسشىسىنىڭ جانە قازاقستان حالقىنىڭ جاھاندىق ۇدەرىستەردىڭ تۇراقتىلىعى مەن وركەندەۋىنە قوسقان ۇلەسى ءۇشىن تابىس ەتىلگەن ەلباسىنىڭ جوعارى مەملەكەتتىك ماراپاتتارى ۇسىنىلعان. كورمە ەكسپوزيسياسىنىڭ نەگىزىندە شولۋ ەكسكۋرسيالارىنان باسقا «تاريحي تاڭداۋ»، «اتامەكەن»، «ەلباسى مارتەبەسى – ەل مارتەبەسى» تاقىرىپتىق ەكسكۋرسيالارى جۇرگىزىلەدى. ەكسكۋرسيالار ءارتۇرلى ساناتتاعى – بالالار مەن ەرەسەكتەر سىندى كەلۋشىلەرگە ارنالادى. قور كورمەسى قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ اتالمىش كوشپەلى كورمە جوباسىنىڭ باستى وقيعاسى بولىپ تابىلادى. جوبا اياسىندااۋقىمدى ءعىلىمي-بىلىم بەرۋ، مادەني-اعارتۋ شارالارى، سونىمەن قاتار اقتوبە وبلىسى بويىنشا كوشپەلى ەكسكۋرسيالار ۇيىمداستىرىلادى. ەلباسى كىتاپحاناسىنىڭ قىزمەتى تاجىريبەسىندە «جادىگەرلەر سويلەيدى» توپتاماسىنان كوشپەلى دارىستەر، مۋزەي ساباقتارى، كوشپەلى ەكسكۋرسيالار سىندى مادەني-اعارتۋشىلىق قىزمەتتىڭ ەرەكشە تۇرلەرى بەلسەندى قولدانىلىپ كەلەدى. ەلباسى كىتاپحاناسىنىڭ جوباسى 2017 جىلعى قاراشادا الماتىدان باستاۋ الىپ، 2018 جىلعى اقپان ايىندا شىمكەنتتە جالعاسسا، ال قىركۇيەك ايىندا اتىراۋ وبلىسىندا تابىستى ءوتتى. جالپى 2017-2018 جىلدارى كورمەنى 350 مىڭنان استام ادام تاماشالادى. كورمە 2019 جىلعى قاڭتار ايىنىڭ سوڭىنا دەيىن جالعاسادى.
پىكىر قالدىرۋ