Aktobe Invest-2018 فورۋمىندا 300 ملرد تەڭگەگە مەموراندۋمدارعا قول قويىلدى.

اقتوبەدە وبلىس اكىمدىگىنىڭ ۇيىمداستىرۋىمەن «Aktobe Invest-2018» VI حالىقارالىق ينۆەستيسيالىق فورۋمى ءوتتى.

وسىمەن التىنشى رەت ۇيىمداستىرىلعان اۋقىمدى شاراعا «سەنىم. ءوسۋ. دامۋ» تاقىرىبىمەن وتكەن  فورۋمعا ءوڭىردىڭ ءتۇرلى سالاسىنا قىزىعۋشىلىق تانىتقان جۇڭگو، كورەيا، ءازىربايجان، بەلورۋس، رەسەي مەن وزبەكستان ەلدەرىنىڭ ينۆەستورلارى كەلدى. شەت ەلدىڭ ءىرى بيزنەس قاۋىمداستىقتىقتارى قانداي جوبالاردى قارجىلاندىرادى؟

فورۋمعا ينۆەستورلار، جاڭا جوبالاردىڭ باستاماشىلارى، قازاقستاندا جۇمىس تاجىريبەسى بار مەملەكەتتىك ورگاندار مەن تۇك وكىلدەرى، وتاندىق بيزنەستىڭ ۇزدىك مەنەدجەرلەرى، جۇڭگو، وڭتۇستىك كورەيا، نيدەرلاندى، ءازىربايجان، ەۋروپالىق كەڭەس ەلدەرى، بەلورۋسسيا، رەسەي، وزبەكستان سىندى 23 ەلدەن كەلگەن ينۆەستورلار، بارلىعى 400-دەن استام ادامدى جينالدى.

فورۋمنىڭ نەگىزگى ماقساتى - ءوڭىر ەكونوميكاسىنا وتاندىق جانە شەتەلدىك ينۆەستيسيالار اعىنىن تارتۋ.

ينۆەستورلار «زەرتتەلگەن كەن ورىندارى – ينۆەستيسياعا ارنالعان باعدار» كورمەسىمەن تانىستى، وندا وبلىستىڭ مۇناي ءوندىرۋ، گاز وڭدەۋ، قارا جانە ءتۇستى مەتاللۋرگيا جانە اوك سياقتى ينۆەستيسيانى قاجەت ەتەتىن ەكونوميكانىڭ باسىم سەكتورلارىنداعى وتىزدان استام پەرسپەكتيۆتى جوبالارى ۇسىنىلدى. قوناقتارعا گەوگرافيالىق كارتاسى مەن مۇناي-گاز سالاسىندا تاۋ-كەن ءوندىرۋدىڭ جاڭا تەحنولوگيالارى تۋرالى اقپاراتتارى بار ەركىن كەن ورىندارى، تاۋاشالى جوبالار، سونىمەن قاتار، «جەرگىلىكتى تاۋار وندىرۋشىلەردىڭ ەلەكتروندىق كاتالوگى» جانە ت.ب تانىستىرىلدى.

وبلىس اكىمى بەردىبەك ساپاربايەۆ، يتاليانىڭ قازاقستانداعى ەلشىسى پاسكۋالە دە اۆينو، ورىنبور وبلىسىنىڭ ءبىرىنشى ۆيسە – گۋبەرناتورى سەرگەي بالىكين، تۇك باسشىلارى، ءوڭىردىڭ بيزنەس قوعامداستىق وكىلدەرى مەن ساراپشىلارى قاتىسقان نەگىزگى پلەنارلىق وتىرىستا يندۋستريالىق-يننوۆاسيالىق دامۋ سالاسىنداعى سەرىكتەستىك ماسەلەلەرى تالقىلاندى.

وبلىس اكىمى بەردىبەك ساپاربايەۆ قوناقتارعا فورۋمعا قاتىسقاندارى ءۇشىن العىسىن ءبىلدىردى.

- "AKTOBE INVEST" فورۋمى جىلدان جىلعا جۇيەلى تۇردە دامىپ، بيزنەس ءۇشىن قۋاتتى ديالوگ الاڭىنا اينالىپ كەلەدى. قازىرگى فورۋم تاقىرىبىنىڭ «سەنىم. ءوسۋ. دامۋ» دەپ اتالۋى كەزدەيسوقتىق ەمەس. بۇگىن وبلىسىمىزعا تۇركيا، جۇڭگو، گەرمانيا، نيدەرلاندى، رەسەي جانە ت.ب ەلدەردەن شەتەلدىك ينۆەستورلار كەلدى. ەكونوميكانىڭ نەگىزگى درايۆەرلەرى بولىپ تابىلاتىن ترانسۇلتتىق كومپانيالاردىڭ ءتىزىمى كەڭەيۋدە. ماسەلەن، «سنپس «اقتوبەمۇنايگاز» ءوزىنىڭ جۇمىس جاساعان جىلدارىندا 10 ملرد. دوللارعا، «قازحروم» تۇك» 750 دوللارعا قوسالقى نىسانداردى جۇزەگە اسىردى - دەدى، بەردىبەك ساپاربايەۆ.

بۇگىنگى كۇنى شەتەلدىك ينۆەستورلار وڭىردە ونداعان ءىرى جوبالاردى جۇزەگە اسىرىپ جاتىر. ولاردىڭ قاتارىندا مىس-مىرىش كەن ورىندارىن يگەرۋگە جانە مىرىش كونسەنتراتىن شىعارۋ ءۇشىن تەرەڭ وڭدەۋ ءوندىرىسىن جولعا قويۋعا مۇمكىندىك بەرەتىن، 4.0 يندۋستريا ەلەمەنتتەرى بار "اقتوبە مىس كومپانياسى" بايىتۋ فابريكاسىن جاڭعىرتۋ جوباسى بار. بۇل ءونىم رەسەي مەن جۇڭگو نارىقتارىندا سۇرانىسقا يە بولادى. يتالياندىق "ەني" مۇناي-گاز كومپانياسى General Electric كومپانياسىمەن بىرلەسىپ قارعالى اۋدانىندا قۋاتى جىلىنا 48 مۆت بولاتىن جەل ەلەكتر ستانسياسىنىڭ قۇرىلىسىن باستادى. ينۆەستيسيا كولەمى 33 ملرد. تەڭگەنى قۇرايدى. بۇل ىسكە اسىرىلىپ جاتقان جوبالار ءتىزىمىنىڭ سوڭى ەمەس.

- ءبىرىنشى ينۆەستيسيالىق فورۋم وتكىزىلگەن ساتتەن باستاپ ايماق ەكونوميكاسى 23% - عا جوعارىلاپ، 1،8-دەن 2،3 ترلن-عا دەيىن ءوستى، ەكونوميكانىڭ بارلىق سالالارى دامىدى: ونەركاسىپ كولەمى 24% - عا، اۋىل شارۋاشىلىعى 33% - عا، ساۋدا 27% - عا ارتتى. بىلتىر ءوڭىر ەكونوميكاسىنىڭ ءوسىمى 5 % قۇرادى، بيىل دا ءوسىم سول دەڭگەيدە ساقتالادى. الداعى بەس جىلدا كاسىپورىندار 600 ملرد. تەڭگەگە جابدىقتار مەن پروسەستەردى جاڭارتاتىن بولادى. ءبىزدىڭ وبلىس شيكىزاتقا تاۋەلدىلىكتەن ارىلىپ كەلەدى. وڭىردە "بولاشاقتىڭ ەكونوميكاسى" باعىتتارى بەلسەندى تۇردە دامۋدا، 4.0 يندۋستريا ەلەمەنتتەرى مەن ەكسپو-2017 كورمەسىندە ۇسىنىلعان ازىرلەمەلەر قولدانىلىپ جاتىر، - دەپ اتاپ وتكەن ءوڭىر باسشىسى قازاقستانداعى ەڭ ءىرى يندۋستريالدى ايماقتاردىڭ ءبىرىنىڭ اۋماعىندا جيىرما جوبا جۇزەگە اسىرىلىپ جاتقانىن، ونىڭ ىشىندە التاۋىنا شەتەلدىكتەردىڭ قاتىسى بارىن دا قوسا ايتتى. ينۆەستيسيا كولەمى 5،7 ملرد. تەڭگە بولاتىن بەس جوبا ەندىگى پايدالانۋعا بەرىلىپ قويعان.

ق ر ينۆەستيسيالار جانە دامۋ مينيسترلىگى ينۆەستيسيا كوميتەتىنىڭ ءتوراعاسى ەرلان حايروۆ وبلىستىڭ وڭدەۋ ونەركاسىبىن دامىتۋ جۇمىسىنىڭ ناتيجەلەرىنە جوعارى باعا بەردى.

- 2018 جىلدىڭ ون ايىنىڭ قورىتىندىسى بويىنشا ءوسىم 13،6% قۇرادى. اقتوبە وڭدەۋشى ونەركاسىپكە ينۆەستيسيا سالۋ تۇرعىسىنان ەلدە كوشباسشىلاردىڭ ءبىرى بولىپ تابىلادى، - دەدى ول.

- فورۋمنىڭ دەڭگەيى ءوسىپ، بىرلەسكەن كاسىپورىنداردىڭ سانى ارتۋدا. ءبىزدىڭ فورۋمعا قاتىسۋىمىز وڭىرلەرىمىزدى جاقىنداستىرىپ، ەكونوميكالارىن دامىتۋعا قىزمەت ەتەتىنىنە سەنىمدىمىن، - دەدى ورىنبور وبلىسىنىڭ ءبىرىنشى ۆيسە – گۋبەرناتورى سەرگەي بالىكين.

يتاليانىڭ قازاقستانداعى ەلشىسى پاسكۋالە دە اۆينو ءوز سوزىندە يتالياندىق كومپانيالار اقتوبەلىك كاسىپكەرلەرمەن جەمىستى ىنتىماقتاستىققا ءۇمىت ارتاتىندارىن جانە ەڭ وزىق تەحنولوگيالاردى تارتۋعا، سونداي-اق الەۋمەتتىك جوبالاردى ىسكە اسىرۋ كەزىندە جەرگىلىكتى مازمۇندى قولداۋعا دايىن ەكەندەرىن اتاپ ءوتتى. فورۋم اياسىندا قۇنى 300 ملرد تەڭگە بولاتىن توعىز پەرسپەكتيۆتى جوبانى جۇزەگە اسىرۋدا ىنتىماقتاستىق تۋرالى كەلىسىمگە قول جەتكىزىلدى. ماسەلەن، جاقىن ارادا اقتوبەدە قوقىس وڭدەۋ زاۋىتىنىڭ قۇرىلىسىن باستاۋ جوسپارلانۋدا. «Kazakhstan BAB Investment Group Co. LTD» ج ش س ينۆەستورى وسى جوباعا 185 ملرد. تەڭگە سالۋعا دايىن. بەلورۋسسيالىق «ليدسەلماش» حولدينگىنىڭ باسقارۋشى كومپانياسى» ااق اۋىل شارۋاشىلىعى تەحنيكاسىن وندىرەتىن زاۋىت قۇرىلىسىن باستاۋعا نيەتتى. «Uros Group» (فينليانديا) اقتوبە نارىعىن تۇرعىن ءۇي قۇرىلىسى شارۋاشىلىعىنا ءىت – تەحنولوگيالاردى ەنگىزىپ، دامىتۋدا بولاشاعى زور دەپ سانايدى. «ۋفامۇنايگازماش» جشق باشقۇرت كاسىپورنى بلوكتى-مودۋلدى جانە بلوكتى-كاركاستى مۇناي-گاز جابدىقتارىن شىعاراتىن زاۋىت سالۋدى جوسپارلاپ وتىر. ءوڭىر ەكونوميكاسىنىڭ دامۋىنا وڭ اسەرىن تيگىزەتىن ءىرى جوبالاردىڭ قاتارىندا "اقتوبە مىس كومپانياسى" ءجشس-نىڭ كەن بايىتۋ ءوندىرىسىن جاڭعىرتۋ جانە مىس-مىرىش كەنىنىڭ كەن ورنىن يگەرۋ جۇمىستارى، كاتودتى مىس وندىرەتىن جانە بەنكالا جانە وڭتۇستىك بەنكالا كەن ورنىن يگەرەتىن «SM Minerals» ءجشس-نىڭ تاۋ-كەن بايىتۋ كەشەنىنىڭ قۇرىلىسى بار.

ايتا كەتەيىك، فورۋمنىڭ ماقساتى - كورشى ەلدەرمەن جانە وزگە وڭىرلەرمەن اراداعى ارىپتەستىكتى نىعايتىپ، ينۆەستورلار تارتۋ. وسى كەزەڭگە دەيىن 50-دەن استام كەلىسىمشارتقا قول قويىلىپ، ناتيجەسىندە بىرلەسكەن  30 جوبا ىسكە اسقان. بيىل تاراپتار قۇنى 300 ملرد تەڭگەدەن اساتىن 9 مەموراندۋمعا قول قويدى.  باسىم كوپشىلىگى مۇناي-كەن وڭدەۋ سالاسىنا قاتىستى بولسا، تۇرىك اعايىندار وڭىردە سەمەنت زاۋىتىن سالۋعا ىنتا ءبىلدىرىپ وتىر.

شارا سوڭىندا وبلىس اكىمى قازاقستان رەسپۋبليكاسىنداعى  يتاليا  ەلشىسى پاسكۋالە دە اۆينومەن كەزدەسىپ، ءبىراقاتار ماسەلەلەردى تالقىلادى. سونداي-اق بەردىبەك ساپاربايەۆ  ءوڭىر ەكونوميكاسىنىڭ دامۋىنا ۇلەس قوسقان، ۇزدىك ينۆەستورلاردى العىس حاتپەن ماراپاتتادى.

ەستەرىڭىزگە سالا كەتەيىك، سوڭعى بەس جىلدا ءوڭىر ەكونوميكاسىنا 2،2 ترلن تەڭگە ينۆەستيسيالانعان. وسى جىلدىڭ وزىندە 510 ملرد تەڭگە ينۆەستيسيا تارتۋ كوزدەلىپ وتىر.