مەملەكەت باسشىسى نۇرسۇلتان نازاربايەۆ قازاقستان رەسپۋبليكاسىنىڭ تاۋەلسىزدىك كۇنىنە ارنالعان سالتاناتتى جيىندا قازاقستاندىقتاردى ەلىمىزدىڭ باستى مەرەكەسىمەن قۇتتىقتادى، دەپ حابارلايدى Qamshy.kz اقپارات اگەنتتىگى Baq.kz پورتالىنا سىلتەمە جاساپ.
«بۇل – قىران قۇستاي ەركىندىككە ۇمتىلعان حالقىمىزدىڭ عاسىرلار بويعى اسىل ارمانى ورىندالعان كۇن. تاۋەلسىزدىك – جۇرەگى ەلىم دەپ سوققان ءاربىر قازاقستاندىق ءۇشىن اسا ءقادىرلى، ايرىقشا ارداقتى ۇعىم. «ادام باقىتتى ءومىر ءسۇرۋى ءۇشىن، ونىڭ تاۋەلسىز وتانى بولۋى قاجەت» دەگەن دانالىق ءسوز بار. بۇكىل حالقىمىز اقسارباس ايتىپ، ەگەمەندىك بايراعىن كوكتە جەلبىرەتكەنىنە، مىنە، 27 جىل تولىپ وتىر. وسى ۋاقىت ىشىندە قازاقستان تامىرىن تەرەڭگە جايىپ، ءورىسىن كەڭەيتىپ، كەمەلدەنە ءتۇستى. سىناعى كوپ سىندارلى كەزەڭنەن سۇرىنبەي ءوتىپ، مارتەبەسى بيىك، تۇعىرى بەرىك، مەرەيلى مەملەكەتكە اينالدىق»، - دەدى ەلباسى.
مەملەكەت باسشىسى ەۋرازيانىڭ جۇرەگىندە ورنالاسقان جاڭا ەلوردا – جاڭعىرعان قازاقستاننىڭ سيمۆولى سانالادى دەپ اتاپ ءوتتى.
«بيىل اقوردالى استانامىزدىڭ 20 جىلدىعىن جۇرت بولىپ جۇمىلىپ، جوعارى دەڭگەيدە اتاپ وتتىك. بۇل مەرەيتويعا ەلىمىزدىڭ بارلىق ءوڭىرى اتسالىسىپ، شاھارىمىزدىڭ كوركەيە تۇسۋىنە زور ۇلەس قوستى. ەلىمىز بۇگىندە الەمدىك باسەكەگە قابىلەتتى 50 ەلدىڭ قاتارىندا. جاھان جۇرتشىلىعى قازاقستاندى مويىنداپ، سەنىمدى سەرىكتەس رەتىندە تانىدى. وڭىرلىك پروبلەمالاردى شەشۋ ىسىندە ساليقالى ساياسات ۇستانعان ءبىزدىڭ ۇرانىمىز ءاردايىم تاتۋلىق پەن تۇراقتىلىق بولدى. قازىرگى تاڭدا مەملەكەتىمىز حالىقارالىق ۇيىمداردىڭ بىتىمگەرلىك جۇمىستارىنا بەلسەنە اتسالىسۋدا. جيىرما ءبىرىنشى عاسىردىڭ ەكىنشى ونجىلدىعىندا قازاقستان جاڭا بەلەستەردى باعىندىرۋعا كىرىستى»، - دەدى پرەزيدەنت.
ەلباسى بيىلعى قاڭتار ايىندا بىرىككەن ۇلتتار ۇيىمىنىڭ قاۋىپسىزدىك كەڭەسىنە ءتوراعالىق ەتۋىمىز – سونىڭ ايقىن دالەلى دەپ اتاپ ءوتتى.
«قازاقستان ەكى جىل بويى وسى كەڭەستىڭ تۇراقتى ەمەس مۇشەسىنىڭ مارتەبەلى ميسسياسىن اتقارىپ كەلەدى. بەيبىتشىلىكتى جاقتايتىن مەملەكەتىمىز وسىلايشا حالىقارالىق قاۋىمداستىققا كەڭىنەن تانىلدى»، - دەدى نۇرسۇلتان نازاربايەۆ.
