استانا قالاسىندا قازاقستان رەسپۋبليكاسىنىڭ قوعامدىق دامۋ مينيسترلىگىنىڭ ازاماتتىق قوعام ىستەرى كوميتەتىنىڭ ۇيىمداستىرۋىمەن كاسىبي مەدياتورلاردىڭ كەزدەسۋى ءوتتى. دوڭگەلەك ۇستەل باسىنا جينالعان مەدياسيا ورتالىقتارىنىڭ باسشىلارى، ترەنەرلەر قازاقستان رەسپۋبليكاسىنداعى مەدياسيا ينستيتۋتىنىڭ قازىرگى جاعدايى مەن دامۋ جولدارىن تالقىلادى دەپ جازادى Qamshy.kz اقپارات اگەنتتىگى. 

كەزدەسۋ بارىسىندا قازاقستان رەسپۋبليكاسىنىڭ قوعامدىق دامۋ مينيسترلىگىنىڭ ازاماتتىق قوعام ىستەرى كوميتەتىنىڭ ءتورايىمى ءاليا عالىموۆا «جوعارى سوتپەن بىرگە وڭىرلەردە تاتۋلاستىرۋ ورتالىقتارىننىڭ جەلىسىن كەڭەيتۋدى جوسپارلاۋدامىز. سونىمەن قاتار جانجالدى جاعدايلاردا ازاماتتارعا مەدياسيا قۇرالدارىن پايدالانۋ مۇمكىندىگى جونىندە كەڭىنەن اقپارات بەرۋ ماقساتىندا كاسىبي مەدياتورلاردىڭ تىزبەسىن تۇراقتى تۇردە وزەكتەندىرىپ تۇرۋ بويىنشا مىندەت قويىپ وتىرمىز»، - دەدى.

سپيكەر سۆەتلانا رومانوۆسكايا جانجالداردى سوتتان تىس رەتتەۋ جۇيەسىن جەتىلدىرۋ ءۇشىن ءبىرقاتار ۇسىنىستار ەنگىزدى. «شىعىس قازاقستاندىق «التەرناتيۆا» مەدياسيا جانە قۇقىق ورتالىعىنىڭ» وكىلدەرى ا. كالەنوۆا مەن م. دياچۋك زاڭناماعا وزگەرىستەر ەنگىزۋ بويىنشا تۇشىمدى ويلارىن ءبىلدىردى. پاۆلودارلىق مەدياسيا ورتالىعىنىڭ جۇمىس تاجىريبەسى مەملەكەتتىڭ قوعامدىق ينستيتۋتتى قولداۋىنىڭ جارقىن ۇلگىسى بولدى.

قاراعاندىلىق مەدياتورلاردىڭ كوپجىلدىق ەڭبەگى ناقتى ۇسىنىستار رەتىندە كورىنىس تاپتى. ءبىز مەدياسيا دامۋىنىڭ وزەگىن سوتقا دەيىنگى كەزەڭگە بۇرۋدى ۇسىنامىز. «مەدياسيا ينستيتۋتىن جان-جاقتى دامىتۋدىڭ نەگىزى جانجالدى جاعدايلاردى بارىنشا ازايتۋ بولۋ كەرەك»، - دەگەن مەملەكەت باسشىسىنىڭ ۇندەۋىن نەگىزگە الا وتىرىپ، مەدياسيا ينستيتۋتىنىڭ ءوزىن نىعايتۋ كەرەك دەپ ەسەپتەيمىز. ءبىز مەدياسيا رەسۋرستارىنىڭ (مەدياسيا ورتالىقتارى جانە مەدياتورلاردىڭ وزدەرى) دامۋىنا مونيتورينگ جۇرگىزۋدەن باستاۋدى ۇسىنامىز. مەدياسيا سالاارالىق ينستيتۋت بولعاندىقتان، ونىڭ جۇمىسىن ۇيلەستىرۋ قيىن. مەدياسيانىڭ بارلىق الەۋمەتتىك سالالارعا قاتىسى بولعاندىقتان، ولاردىڭ اكىمشىلەرىن ورتاق رەسپۋبليكالىق ۇيلەستىرۋ كەڭەسىنە جيناقتايتىن نەگىز بار دەپ ەسەپتەيمىز. قۇرامىنا مەدياسيا سالاسىنىڭ الدىڭعى قاتارلى ساراپشىلارىن ەنگىزە وتىرىپ، جۇمىس توبىن قۇرۋ قازاقستان رەسپۋبليكاسىنىڭ قوعامدىق دامۋ مينيسترلىگىنە جوعارىدا كورسەتىلگەن ماسەلەلەردى شەشۋگە سەپتىگىن تيگىزەرى انىق.

دوڭگەلەك ۇستەل وتىرىسىنىڭ قورىتىندىسى بويىنشا جول كارتاسىن ازىرلەۋ جانە جۇمىس توبىن قۇرۋ سياقتى باسىم باعىتتار انىقتالدى. بۇدان ءارى قازاقستان رەسپۋبليكاسىنىڭ قوعامدىق دامۋ مينيسترلىگىنىڭ ۇيلەستىرۋىمەن مەدياسيانىڭ زاڭنامالىق بازاسى مەن قۇرالدارىن جەتىلدىرۋ بويىنشا ناقتى ۇسىنىستار ازىرلەۋ بويىنشا جۇمىستار جۇرگىزىلەتىن بولادى.

تاتيانا ساۆيسكايا، «سرك-ديالوگ» مەكەمەسىنىڭ ديرەكتورى

(قاراعاندى قالاسى)