تاۋەلسىزدىك كۇنىنە وراي قوبدا اۋدانىنىڭ تۇرعىندارىنا سۋ قۇبىرى، پاتەرلەر مەن تاعى باسقا الەۋمەتتىك نىساندار تارتۋ ەتىلدى.

اقتوبە وبلىسىنىڭ اكىمى بەردىبەك ساپاربايەۆ جۇمىس بابىمەن قوبدا اۋدانىندا بولىپ، اۋىلداردىڭ دامۋىمەن، جاڭا الەۋمەتتىك نىسانداردىڭ قۇرىلىسىمەن تانىستى جانە قوبدالىقتاردى ق ر تاۋەلسىزدىگى كۇنىمەن قۇتتىقتادى.

بەردىبەك ساپاربايەۆ ەرتەمەن تالدىساي اۋىلىنا كەلىپ، ورتالىق سۋمەن جابدىقتاۋ جۇيەسىنىڭ ىسكە قوسىلۋ سالتاناتىنا قاتىستى. بۇل ماقساتقا مەملەكەت 300 ملن تەڭگەدەن استام قاراجات بولگەن. جاڭا سۋ قۇبىرىنىڭ جالپى ۇزىندىعى 16،7 شاقىرىم. ول ىسكە قوسىلىسىمەن اۋدان حالقىنىڭ ورتالىقتاندىرىلعان سۋمەن قامتىلۋى 74%-عا جەتتى.

ايتا كەتەيىك، ساپالى اۋىز سۋمەن قامتۋ – بۇل تالدىسايلىقتاردىڭ وبلىس اكىمى اۋىلعا كەلگەن كەزدە جۇگىنگەن التى پروبلەمالىق سۇراقتارىنىڭ ءبىرى بولاتىن. اۋىل تۇرعىندارى سۋ قۇبىرىنان بولەك، دارىگەرلىك امبۋلاتوريا مەن اۋىل اكىمدىگىن اشۋدى، كلۋب پەن اۋىلعا كىرە بەرىس جولدى كۇردەلى جوندەۋدى، گازبەن قامتاماسىز ەتۋدى وتىنگەن-تىن. بۇگىندە تالدىسايلىقتاردىڭ جوعارىدا ايتىلعان ماسەلەلەرىنىڭ بارلىعى دا شەشىلدى.

- ەلباسىنىڭ الەۋمەتتىك ساياساتى ءارقاشان اۋىل تۇرعىندارىن بۇكىل يگىلىكپەن قامتاماسىز ەتۋگە باعىتتالىپ وتىردى. سۇراعاندارىڭىزدىڭ بارلىعى ورىندالدى. ەندىگى مىندەت سىزدەردە – ءوز وتباستارىڭىزدىڭ، تۋعان اۋىلدارىڭىزدىڭ يگىلىگىنە جۇمىس ىستەڭىزدەر. كىشكەنتايدان باستاڭىزدار – اۋلاداعى، ۇيگە جاقىن ماڭداعى جولداردى تۇزەڭىزدەر. تالدىسايدىڭ دامۋ كەلەشەگى – زور، ويتكەنى گاز، سۋ، جارىق بار، اۋىل رەسپۋبليكالىق ماڭىزى بار كولىك جولىنىڭ قاسىندا ورنالاسقان، اقتوبەگە جاقىن. جول بويىنداعى قىزمەت كورسەتۋدى دامىتىڭىزدار، قالانى اۋىل شارۋاشىلىعى ونىمدەرىمەن قامتاماسىز ەتىڭىزدەر. باستىسى – قول قۋسىرىپ وتىرماۋ كەرەك، سوندا عانا ءبارى بولادى. بۇگىن مەن سىزدەردى سۋ قۇبىرىنىڭ ىسكە قوسىلۋىمەن، ەڭ باستىسى – ەلىمىزدىڭ تاۋەلسىزدىگى كۇنىمەن قۇتتىقتايمىن،-دەدى بەردىبەك ساپاربايەۆ.

تالدىسايلىقتار مەملەكەتتىڭ كوڭىل ءبولىپ، قامقورلىق كورسەتكەنى ءۇشىن العىستارىن ءبىلدىردى.

- اۋىلدا تۇراتىنداردى ۇمىتپاعانىڭىزعا، ءبىزدى ءوزىڭىز كەلىپ قۇتتىقتاعانىڭىز ءۇشىن العىس ايتقىمىز كەلەدى. ءبىزدىڭ اۋىل – قۇتتى جانە وسىنىڭ ءبارى مەملەكەتتىڭ ارقاسىندا. راحمەت،- دەدى اۋىل تۇرعىندارى اتىنان سويلەگەن التىنبەك ۇلى ساعىن اقساقال.

جۇمىس ساپارى اۋدان ورتالىعى – قوبدا اۋىلىندا جالعاستى. مۇندا جاڭا 16 پاتەردىڭ كىلتى جەتىم جانە اتا-انا قامقورىنسىز قالعان بالالارعا، از قامتىلعان وتباسىلارعا، بيۋدجەت سالاسىنىڭ قىزمەتكەرلەرىنە بەرىلدى. ەكى سەگىز پاتەرلى ءۇيدىڭ قۇرىلىسىنا بيۋدجەتتەن 120 ملن تەڭگە بولىنگەن.

وبلىس اكىمى قۇتتىقتاۋ سوزىندە: «ەلباسىنىڭ حالىقتىڭ ءال-اۋقاتىن كوتەرۋ تۋرالى تاپسىرماسىن ورىنداي وتىرا ءبىز تۇرعىن ۇيلەردى تەك اقتوبەدە عانا ەمەس، وبلىس اۋداندارىندا دا سالىپ جاتىرمىز. جىل باسىنان بەرى وبلىستا 770 مىڭ شارشى مەتر باسپانا پايدالانۋعا بەرىلدى، جىل قورىتىندىسى بويىنشا كەم دەگەندە 900 مىڭ شارشى مەتر تۇرعىن ءۇي پايدالانۋعا بەرىلەدى دەپ جوسپارلانىپ وتىر. اقتوبەلىكتەردى ساپالى تۇرعىن ۇيمەن قامتاماسىز ەتۋ جۇمىسى جالعاساتىن بولادى»،-دەپ اتاپ ءوتتى.

كەيىن ءوڭىر باسشىسى ۇزىندىعى 235 مەترلىك جاڭا دەنساۋلىق اللەياسىن قاراپ شىقتى. مۇندا جاياۋ قىدىرىپ، بەلسەندى فيزيكالىق دەمالىس ءۇشىن بارلىق جاعداي جاسالعان. جاياۋ جۇرگىنشىلەر جولى اباتتاندىرىلىپ، شاعىن ساۋلەتتىك پىشىندەر ورناتىلعان، ەكى جۇزگە جۋىق اعاش وتىرعىزىلعان.

قوبداداعى جاڭا دەنە شىنىقتىرۋ-ساۋىقتىرۋ كەشەنىندە «ۇلى دالانىڭ جالىندى جاستارى» جاستار سلەتى ءوتتى. شارا اياسىندا ءوڭىر باسشىسى بالالار ءۇيىنىڭ ەكى تاربيەلەنۋشىسىنە پاتەر كىلتتەرىن تابىس ەتىپ، اۋدانداعى قوعامدىق ومىرگە اناعۇرلىم بەلسەندى ارالاساتىن سەگىز جاستى ماراپاتتادى، جاڭا ونەر ورتالىعىنا ەلەكتروندى فورتوپيانو ساتىپ الۋ ءۇشىن سەرتيفيكات بەردى.

جۇمىس ساپارى جيرەنقوپا اۋىلىندا اياقتالدى، ول جاقتا وبلىس اكىمى جەرگىلىكتى كاسىپكەرلەردىڭ «تۋعان جەرگە تاعزىم» اكسياسى اياسىندا سالعان ەكى نىسانمەن تانىستى. اتاپ ايتقاندا، ءوڭىر باسشىسى قۇنى 5 ملن تەڭگە بولاتىن سپورت الاڭىن قاراپ شىعىپ، قازاقستانداعى قاسيەتتى ورىندار تىزىمىنە ەنگىزىلگەن اقتوبە وبلىسىنىڭ ءتورت ۋچاسكەسىنىڭ ءبىرى - قوبىلاندى باتىر مەموريالدى كەشەنى جانىنداعى قوناقتار كەلەتىن ورتالىقتىڭ اشىلۋىنا قاتىستى. 12 ورىندىق قوناقتار كەلەتىن ورتالىقتىڭ قۇرىلىسىنا 35 ملن تەڭگە بولىنگەن. وبلىس اكىمى ورتالىق اشىلسا وڭىردەگى ءتۋريزمنىڭ دامۋىنا ىقپال ەتەتىنىنە سەنىم ءبىلدىردى.