بيىل قانداي وقيعالار قوعامنىڭ قىزۋ تالقىسىنا ءتۇستى؟ حالىقتىڭ جادىندا 2018 جىل نەندەي جاڭالىقتارمەن ەستە قالدى؟ Qamshy.kz اقپارات اگەنتتىگى اعىمداعى جىلدىڭ ايتۋلى وقيعالارىنىڭ ءتىزىمىن وقىرماندار نازارىنا ۇسىنادى.
52 ادامنىڭ قازاسى
2018 جىلدىڭ باسى جىلى جاڭالىقتارمەن باستالعان جوق. قاڭتار ايىندا اقتوبە وبلىسىندا ورىن العان اپات تەك قازاقستان حالقىنىڭ عانا ەمەس، كورشى ەلدەگى حالىقتىڭ دا قابىرعاسىن قايىستىردى. ول – اقتوبە وبلىسىنىڭ ىرعىز ايماعىندا جولاۋشىلار مىنگەن اۆتوبۋس جانىپ كەتىپ، ونىڭ ىشىندەگى 52 ادام تىرىدەي ورتكە وراندى.
«2018 جىلدىڭ 18 قاڭتارىندا ساعات 10:30 شاماسىندا سامارا-شىمكەنت باعىتىنداعى جولدا 55 جولاۋشىسى مەن 2 جۇرگىزۋشىسى بار اۆتوبۋس ورتكە وراندى. جەدەل جاردەمنىڭ كومەگىمەن 5 ادام كولىكتەن شىعىپ ۇلگەرگەن، ال قالعان 52 ادام اپات ورنىندا قازا تاپتى»، - دەگەن قارالى حابار بۇكىل ەلگە تارالدى. وقيعانىڭ انىق-قانىعىنا كوز جەتكىزۋ ءۇشىن تەرگەۋ جۇمىستارى ءبىر جىلداي جۇرگىزىلىپ، اعىمداعى جىلدىڭ قاراشا ايىندا ونىڭ نۇكتەسى قويىلدى.
اپوستروفسىز لاتىن ءالىپبيى
2018 جىلدىڭ ەلدى ەلەڭ ەتكىزگەن تاعى ءبىر جاڭالىعى – ەلباسىنىڭ اپوستروفسىز لاتىن ءالىپبيىنىڭ نۇسقاسىن زاڭدى تۇردە بەكىتىپ، جارلىققا قول قويعانى بولدى. 2017 جىلدىڭ 26 قازانىندا قازاق ءتىلىن لاتىن الىپبيىنە كوشىرۋ تۋرالى جارلىق قابىلدانعان بولاتىن، ارادا ءبىر جىل تولماي ەلباسى لاتىن ءالىپبيىنىڭ نۇسقاسىن دا بەكىتتى.
«1. «قازاق ءتىلى ءالىپبيىن كيريلليسادان لاتىن گرافيكاسىنا كوشىرۋ تۋرالى» قازاقستان رەسپۋبليكاسى پرەزيدەنتىنىڭ 2017 جىلعى 26 قازانداعى №569 جارلىعىنا (قازاقستان رەسپۋبليكاسى ءپۇاج-ى، № 50-51-52، 326-قۇجات) مىناداي وزگەرىس ەنگىزىلسىن:
اتالعان جارلىقپەن بەكىتىلگەن لاتىن گرافيكاسىنا نەگىزدەلگەن قازاق ءتىلى ءالىپبيى وسى جارلىققا قوسىمشاعا سايكەس جاڭا رەداكسيادا جازىلسىن.
- وسى جارلىق جاريالانعان كۇنىنەن باستاپ قولدانىسقا ەنگىزىلەدى»، - دەلىنگەن رەسمي قۇجاتتا.
7 جاسار بالانىڭ وقيعاسى
اعىمداعى جىلدىڭ ناۋرىز ايىندا تۇركىستان وبلىسىنىڭ سارىاعاش اۋدانى، اباي اۋىلىندا جەتى جاستاعى بالا سەكسۋالدىق زورلىقتىڭ قۇربانى بولدى. بۇكىل جۇرتشىلىقتى شۋلاتىپ، قوعامدىق تالقىعا تۇسكەن بۇل وقيعاعا قاتىستى تەرگەۋ جۇمىستارى جارتى جىلدان استام ۋاقىتتاي جۇرگىزىلىپ، 14 جاستاعى جەتكىنشەك كىنالى دەپ تانىلىپ، ق ر قىلمىستىق كودەكسىنىڭ 121-بابىنىڭ 4-بولىگىنە سايكەس قىلمىستىق ءىس قوزعالدى.
جەتى جاستاعى بالانىڭ باسىنان وتكەن جانتۇرشىگەرلىك وقيعا بۇكىل ەلدە كەڭىنەن تالقىلاندى. ايتا كەتەيىك، 2018 جىلدىڭ 1 قاڭتارىنان باستاپ پەدوفيلدەردى «حيميالىق سۇندەتتەۋ» تۋرالى شەشىم قابىلدانعانىن.
سايراگۇل ساۋىتبايدىڭ سوتى
سوڭعى جىلدارى قىتايداعى قانداستارىمىزعى قىسىم جاسالىنىپ، ءتۇرلى قيىندىقتار تۋىنداعانى بەلگىلى. سونىڭ ىشىندە تەك قازاقستاننىڭ عانا ەمەس، بۇكىل ەلدىڭ نازارىن اۋدارعان وقيعا – سايراگۇل ساۋىتبايدىڭ سوتى بولدى. بالا-شاعاسىنان جىراقتا قالعان انا شەكارانى زاڭسىز كەسىپ ءوتىپ، باسى داۋعا قالعان ەدى.
بۇكىل قازاقتى الاڭداتقان سايراگۇلدىڭ ىسىنە قاتىستى الەۋمەتتىك جەلىدە وعان اراشا ءتۇسىپ، ەلدە قالدىرۋدى سۇراعاندار كوپ بولدى. قىتايداعى از ۇلتتاردىڭ بۇگىنگى تاڭداعى احۋالىن قوعام بەلسەندىلەرى «گەنوسيد» دەپ باعالاپ، ەلباسىدان وسى ماسەلەگە اراشا بولۋىن سۇرادى.
“قازاقستاننىڭ تۇرمەسىندە وتىرسام دا، وسىندا قالسام بولدى"، - دەپ ارمانداعان قازاق ايەلىنىڭ ءىسى ءتورت ايعا دەيىن سوزىلىپ، اعىمداعى جىلدىڭ 1 تامىزىندا سوت ۇكىمى وقىلىپ، ەلدە قالدىرۋ تۋرالى شەشىم قابىلداندى.
چەمپيوننىڭ قازاسى
بيىل بارشا جۇرتشىلىقتىڭ قابىرعاسىن قايىستىرعان قازالى وقيعا – مانەرلەپ سىرعاناۋشى دەنيس تەننىڭ ءولىمى بولدى.
2018 جىلدىڭ 19 شىلدەسىندە ساعات 15:00 شاماسىندا الماتىداعى قۇرمانعازى مەن بايسەيىتوۆا كوشەلەرىنىڭ قيىلىسىندا بەلگىسىز بىرەۋلەر دەنيس تەننىڭ كولىگىنىڭ ايناسىن ۇرلاپ، ونى اۋىر جارالاپ كەتتى. كوپ قان جوعالتقان چەمپيون، اۋىر جاراقاتتىڭ سالدارىنان قايتىس بولدى.
دەنيس تەننىڭ قازاسى قازاقستانداعى عانا ەمەس، بۇكىل الەمنىڭ الاڭداتۋشىلىعىن تۋدىردى، اتالمىش وقيعا ەلىمىزدىڭ پوليسيا قىزمەتكەرلەرىن اياعىنان تىك تۇرعىزدى.
كوكپارداعى جەڭىلىس
بيىلعى جىلى حالىقتىڭ كوڭىلىن قالدىرعان تاعى ءبىر جاعداي – قازاق كوكپارشىلارىنىڭ حالىقارالىق سايىستا جەڭىلىس تاپقانى. تامىز ايىندا وتكەن دۇنيەجۇزىلىك كوكپار ويىندارىندا قازاق كوكپارشىلارى ءومىرى كوكپار ويناپ كورمەگەن وزبەكتەردەن ۇتىلىپ قالدى. «كوكبورى» فەدەراسياسىنىڭ بۇرىنعى پرەزيدەنتى تالاس بەگالييەۆ قازاق كوكپارشىلارىن سىناپ، ولاردىڭ ويىنىن ىسكە العىسىز ەتتى.
مەيىرجان ماتجان ەسىمدى كوكپارشىنىڭ ءوز سۇحباتىندا «جىلقىلار وزىمىزدىكى ەمەس، قىرعىزدىكى ەدى. سول دا اسەر ەتكەن بولار، سەبەبى قىرعىزداردىڭ جىلقىلارى ءالسىز»، - دەپ ايتقانى دا ەستەن شىققان جوق.. قازاقتىڭ ۇلتتىق ويىنى سانالاتىن كوكپاردا قانداستارىمىزدىڭ فينالعا دا شىعا الماي، ويسىراي جەڭىلۋى حالىقتىڭ كوڭىلىن قالدىردى...
گولوۆكيننىڭ العاشقى جەڭىلىسى
حالىقتىڭ ۇزاق ۋاقىت كۇتكەن جەكپە جەگى گولوۆكين-كانەلو جەكپە-جەگى بولدى. اعىمداعى جىلدىڭ 16 قىركۇيەگىندە لوس-اندجەلەستەگى 20 مىڭ ادامعا ارنالعان T-Mobile ارەناسىندا وتكەن الاپات ايقاستا قازاقستاندىق بوكسشى گەنناديي گولوۆكين العاش رەت مەكسيكالىق بوكسشى ساۋل الۆارەستەن جەڭىلدى.
ءوز سالماعىندا ەشكىمگە ەسە جىبەرمەگەن گولوۆكين كانەلومەن كەزدەسۋىن «سويقان سوعىسقا» بالاعان ەدى. قوس بىلعارى قولعاپ شەبەرى دە بۇل جەكپە-جەكتى نوكاۋتپەن اياقتاۋعا ۋادە بەرگەن. الايدا جەكپە-جەكتىڭ قورىتىندىسىندا گولوۆكين "كانەلوعا" ەسە جىبەردى. گولوۆكين بارلىق چەمپيوندىق بەلدىگىنەن ايرىلدى. “بۇل گولوۆكيننىڭ سوڭعى جەكپە جەگى بولۋى مۇمكىن» دەگەن دە اقپارات تاراعان. الايدا گەنناديي گولوۆكين كەيىنگى مالىمدەمەلەرىندە الەمنىڭ ەڭ ۇزدىك بوكسشىلارىمەن جۇدىرىقتاسۋعا دايىن ەكەندىگىن ايتتى.
قوعامنىڭ نارازىلىعىنا ۇشىراعان كومسومول تويى
بيىل لەنين كومسومولىنىڭ قۇرىلعانىنا 100 جىل تولدى. كومسومولدىڭ 100 جىلدىعىن اتاپ ءوتۋ الماتى قالاسىنان باستاۋ الىپ، كەيىننەن باسقا دا ايماقتارعا جەتتى. كەلمەسكە كەتكەن ۆلكسم-نىڭ ءبىر عاسىرلىق تويىنا بارعانداردىڭ قاتارىنان كەيبىر مەملەكەت قايراتكەرلەرى دە كورىندى. الەۋمەتتىك جەلىدە بۇل شاراعا قاتىستى سان ءتۇرلى پىكىرلەر ايتىلىپ، وعان بارعان بەلگىلى تۇلعالار حالىقتىڭ سىنىنا ۇشىرادى.
سونىمەن قاتار، قوعام «الاش اۆتونومياسىنىڭ 100 جىلدىق مەرەيتويى كولەڭكەدە قالدى» دەپ بيلىككە دە نارازىلىعىن ءبىلدىردى.
بۇعان اقپارات جانە كوممۋنيكاسيا ءمينيسترى داۋرەن ابايەۆ «بۇل - تولىعىمەن شىندىققا سايكەس كەلمەيدى. ءبىر جاعىنان بىرنەشە ءجۇز ادام تەاترلاردىڭ بىرىندە شارا وتكىزەدى دە، ەكىنشى جاعىنان جىل بويى ەلىمىزدىڭ بارلىق ايماقتارىندا الاشتىڭ 100 جىلدىعىنا ارنالعان شارالاردىڭ تولىققاندى كەشەنى ۇيىمداستىرىلادى»، - دەپ جاۋاپ بەردى. داۋرەن ابايەۆ ءوز سوزىندە كومسومول قازاقستان ءۇشىن وتكەن ءداۋىردىڭ بەلگىسى بولىپ قالعانىن ايتتى.
جىل ءانشىسى – ديماش قۇدايبەرگەن
قازاق حالقىن بۇكىل الەمگە تانىتقان ديماش قۇدايبەرگەننىڭ بيىل جۇلدىزى جاندى، ءىرى ساحنالاردى باعىندىردى. حالىقتىڭ سۇيىسپەنشىلىگىنە بولەنگەن ءانشى لوندوندا جەكە كونسەرتىن وتكىزىپ، رەسەي ساحناسىندا حالىقتى تاڭداي قاقتىردى.
لوندوندا وتكەن جەكە كونسەرتىنە جۇڭگو، كانادا، بەلگيا، چەحيا سەكىلدى 45 ەلدەن جانكۇيەرلەر كەلىپ، "Indigo at the O2" كونسەرت زالىندا ينە شانشار ورىن بولمادى. ديماش جەكە كونسەرتىندە Adajio، "دايديداۋ"، "ساعىندىم"، Michael Jackson tribute، The Show Must go on، "لەيلا"، If I Never Breathe Again، "ليۋبوۆ ۋستاۆشيح لەبەدەي" سەكىلدى 29 ءاندى جاندى داۋىستا ايتىپ، جانكۇيەلەردىڭ ىستىق ىقىلاسىنا بولەندى.
ماسكەۋدەگى كرەمل ساحناسىندا ءان سالىپ، «نتۆ» ارناسىنىڭ «ورتالىق تەليەۆيدەنيە» باعدارلاماسىندا قوناقتا بولعان ديماش يگور كرۋتويدىڭ سۇيەمەلدەۋىمەن "شارشاعان اققۋلاردىڭ ماحابباتى" ءانىن ورىنداپ، كوپشىلىكتىڭ قوشەمەتىنە بولەندى. سونىمەن قاتار، رەسەيدەگى «جىل ءانى – 2018-گە» قاتىسىپ، وليمپييسكيدى دە باعىندىردى. حالىقتىڭ ىستىق ىقىلاسىن كورگەن جۇرگىزۋشىلەر ديماشتى "جىل جاڭالىعى" دەپ اتادى.
كەتىپ بارا جاتقان 2018 جىل وسىنداي جاڭالىقتارىمەن ەلدىڭ ەسىندە قالدى. ال كەلەر 2019 جىل جاعىمدى اقپاراتتار جىلى بولعاي دەمىز...
