بىرنەشە كۇننەن بەرى نازاروۆتارعا نازىن ايتىپ جاتقاندار بار.
♦نازاروۆتاردىڭ نازارىنا: "الەمنىڭ، الدە كىشىگىرىم تۇجىرىمنىڭ چەمپيونىسىزدار ما؟"
«ارداق جەكە كلۋبىن جارنامالاپ قالعىسى كەلدى، بەيبىتتىڭ بويىنان جەڭىسكە دەگەن جىگەر مىنەز بايقالمادى، حالىقتىڭ 90 پايىزى رەنجۋلى» دەگەن سياقتى كەيىس. كەيبىر ارىپتەستەردىڭ بۇل پىكىرىمەن كەلىسە المايمىن.
بىرىنشىدەن، ارداق نازاروۆقا ەشقانداي جارنامانىڭ قاجەتى جوق. ەگەر بەيبىتتىڭ بويىنان جەڭىسكە دەگەن جىگەر مىنەز بايقاي الماساڭىز، وندا جەكپە-جەكتى قايتادان ءبىر قاراپ شىعىڭىز. حالىقتىڭ 90 پايىزى رەنجۋلى ەكەنىن ساناپ كوردىڭىز بە؟ الگىندەي وي ايتقان كىسىلەر جىگىتتەردىڭ جارىس الدىنداعى دايىندىعىن كوردى مە ەكەن؟ كۇمانىم بار. ەگەر كورگەن بولسا، ءدال وسىلاي دەمەس ەدى. تاسادان تاس لاقتىرعانشا «الەم فايتەرس» كلۋبىنىڭ مەكەنجايىن بىلسەڭىز، سوندا بارىپ وي-پىكىرىڭىزدى سپورتشىلاردىڭ بەتىنە ايتىڭىز. جانە سول جەردە قانشاما قازاق جاستارىنىڭ تالىم-تاربيە الىپ، ءتۇزۋ جولدا جۇرگەنىن بايقايسىز.
جالپى جەكپە-جەكتە جۇرگەن جىگىتتەردىڭ جەڭىسىنە ابدەن ەتىمىز ۇيرەنىپ العان. جەڭىلە قالسا، جەردەن الىپ جەرگە سالامىز. ەگەر ءتىل قىشىپ بارا جاتسا، باسىنان باقايشىعىنا دەيىن ۇلدە مەن بۇلدەگە ورانعان باسكەتبول مەن حوككەيشىلەردى نەگە سىنامايسىز؟ ەگەر ۇكىمەت سولارعا بولىنگەن قارجىنىڭ ۇشتەن ءبىر بولىگىن عانا ەرەجەسىز جەكپە-جەككە اۋدارسا، سپورتشىلارىمىز تاۋ قوپاراتىن ەدى. ارداقتىڭ ارمانى – قازاق جاستارىن UFC تورىنە شىعارۋ. كوك بايراعىمىزدى بيىكتەن جەلبىرەتۋ. سول ماقساتتا تەر توگىپ ءجۇر.
ەستەرىڭىزدە بولسا، بىرنەشە جىلدار بۇرىن «الەم فايتەرس» پەن «الاش پرايد» سپورت كلۋبتارى كوپتەگەن جارىستار وتكىزىپ، قارسىلاستارىن قوعاداي جاپىراتىن. ءقازىر دانيار قاسقاراۋوۆ پەن ارداق نازاروۆ اعالارىمىزدىڭ جارىس وتكىزۋدەگى تاجىريبەسى ارتتى. الەمگە بەلگىلى تۇلعالارمەن تانىسىپ، قويان-قولتىق جۇمىس جاساي باستادى. ەندەشە قازاق جىگىتتەرىنىڭ UFC شىڭنا شىعاتىن كۇنى الىس ەمەس. «بولار ەلدىڭ بالاسى ءبىرىن-بىرى باتىر دەمەۋشى» ما ەدى. ەندەشە جىگىتتەردى جاسىتا بەرگەنشە جىگەرىن جانىپ، نامىسىن قامشىلايىق! Titan FC تۋرنيرىندە جەڭىلىس تاپقان سپورتشىلارعا ەڭسە تۇسىرمەڭدەر دەيمىز. «ەرىنبەي ەڭبەك ەتكەنگە باقىت قاشاندا باسىن يەدى». سەندەردەردىڭ الاتىن اسۋلارىڭ ءالى الدا! ءبىز سەندەرمەن ماقتانامىز! قازاقتىڭ باتىر ۇلدارى جاساسىن!
جاندوس ايتبايدىڭ فەيسبۋك پاراقشاسىنان
