ق ر اقپارات جانە كوممۋنيكاسيا ءمينيسترى داۋرەن ابايەۆ كاسىپكەر مارعۇلان سەيسەمبايەۆتىڭ فورۋمداعى ايتقانىنا پىكىر ءبىلدىردى. 2018 جىلدىڭ قاراشاسىنىڭ باسىنداعى فورۋمدا سەيسەمبايەۆ قازاقستاندا يدەولوگيانىڭ جوق ەكەنىن ايتقان ەدى.

«بەلگىلى كاسىپكەر ءوز سوزىندە مەملەكەتتىك يدەولوگيالىق ساياسات پەن ونىڭ تيىمدىلىگى جايىندا وي تولعاپتى. مەنىڭشە، نەگىزگى ايتپاعى – دۇرىس. راسىندا، ءبىز مەملەكەتىمىزدە ۋاقىتشا جۇرگەن ادامدار ەمەسپىز، ونىڭ بولاشاعىن ويلاۋىمىز ءتيىس، وركەندەۋى مەن دامۋى جولىندا ىستەر جاساۋعا ۇمتىلۋ – ماقساتىمىز. ءبىراق مارعۇلان قاليۇلىمەن كەلىسپەيتىن تۇستارىم دا جەتىپ ارتىلادى.

بۇگىندە ەلىمىزدە «يدەولوگيا» دەگەن تۇسىنىكتى ساراپشىلار دۇرىس پايدالانباي كەلەدى. ولاردىڭ ويىنشا، ەكونوميكالىق، الەۋمەتتىك-ساياسي پروبلەمالاردى تۇبىرىمەن جويۋ ءۇشىن دۇرىس باعىتتاعى يدەولوگيا قالىپتاستىرۋ كەرەك. بۇل – قوعامداعى يدەولوگيا دەگەن تۇسىنىكتىڭ ەڭ قارابايىر ءتۇرى. يدەولوگيانى دۇرىس قالىپتاستىرۋ ءۇشىن دە ءتيىستى قۇرالدار قاجەت: ينستيتۋتتار، الەۋمەتتىك-ەكونوميكالىق جاعدايلار جاسالۋى ءتيىس»، - دەدى مينيستر.

داۋرەن ابايەۆتىڭ ايتۋىنشا، قازاقستاندا يدەولوگيالىق ساياسات جۇمىس ىستەپ تۇر. بىرلىك پەن كەلىسىم – يدەولوگيانىڭ ناتيجەسى.

«قازاقستاندا ءدىني ەركىندىك بار، قۇدايعا سەنە مە، اتەيست بولا ما، مۇسىلمان، الدە حريستيان بولا ما، ادامنىڭ ءوز ەركى. الەمنىڭ وزگە تۇستارىندا نە سەبەپتى گەنوسيد ورىن الىپ جاتىر. سەبەبى، ولار جولدان تايعاندار. ءبىزدىڭ جاستارىمىزدىڭ بويىندا پاتريوتتىق سەزىم بار، وتانعا ءقاۋىپ تونسە، ورە تۇرەگەلەدى. جەردىڭ قاي بۇرىشىندا بولماسىن، كوك تۋىمىزدى بيىكتە ۇستايدى. مۇنىڭ ءوزى يدەولوگيا ەمەس پە؟

ءبىز وزگەرگىمىز كەلمەي مە؟ جاڭاعا ۇمتىلۋ – دامىپ جاتقانىمىزدىڭ كورىنىسى. جاقسى ءومىر سۇرگىڭ كەلسە، وزگەرەسىڭ. «رۋحاني جاڭعىرۋ» باعدارلاماسىنىڭ ايتپاعى دا – وسى»، - دەپ ءسوزىن قورىتىندىلادى مينيستر.

قاراشانىڭ باسىندا استانادا وتكەن ستراتەگيالىق باستامالار فورۋمىنا مارعۇلان سەيسەمبايەۆ يدەولوگيالىق ساياساتتىڭ جوقتىعىن ايتقان ەدى.

«ەلىمىزدەگى يدەولوگيا دەگەن تۇسىنىككە ساياتىن – تەك «رۋحاني جاڭعىرۋ» عانا. بىزدە يدەولوگيا دەگەن جوق. يدەولوگيا دەگەن كوڭىلىڭدى دەمەپ، جانىڭدى راحاتقا بولەپ، ۇيقىدان وياتۋعا سەبەپ بولاتىن ءبىر بەلگىسىز كۇش. قاراپايىم مىسال كەلتىرىپ وتەيىك. اقش-تىڭ تاۋەلسىزدىك دەكلاراسياسىندا ادامنىڭ ءبارى قۇداي الدىندا بىردەي، ءبارى دەرلىك ءومىر سۇرۋگە، مىقتى دەنساۋلىققا، باقىتقا قۇقىلى. ادامنىڭ جانىنا مايداي جاعاتىن قانداي كەرەمەت سوزدەر. ءبىراق «رۋحاني جاڭعىرۋدىڭ» بەلگىسى... ول ءوز اتىن شىعارۋ ءۇشىن عانا جۇمىس ىستەپ وتىرعان كورپوراسيا ىسپەتتەس. ءوز باسىم، ماعان مۇلدەم اسەر ەتكەن جوق»، - دەگەن ەدى بيزنەسمەن.

مارعۇلان سەيسەمبايەۆ – ەلىمىزدىڭ بەلگىلى كاسىپكەرى، ينۆەستور.1990 جىلدارى «سەيمار» كومپانياسىنىڭ نەگىزىن قالادى، اليانس بانك پەن «كارتەل» (ك-موبايل) كومپانياسىن باسقاردى.

بۇگىندە IT-جوبالار مەن اۋىل شارۋاشىلىعىن بەلسەندى قارجىلاندىرىپ جۇرگەن بيزنەسمەن. قوعامدى الاڭداتاتىن ماسەلەلەردە اشىق پىكىر ءبىلدىرىپ جۇرگەن ىسىنە، سوزىنە ادال ۇلتجاندى ازامات.

جۋرناليستەرگە كوپتەن بەرى سۇحبات بەرمەي جۇرگەن مارعۇلان سەيسەمبايەۆ Tengrinews.kzتىلشىسىمەن سۇحباتتاسىپ، ومىرلىك ۇستانىمى، بيزنەس جولىنداعى قيىندىقتارى، قوعامداعى وزەكتى ماسەلەلەر جايلى ايتىپ بەردى. Qamshy.kz اقپارات اگەنتتىگىنىڭ ءتىلشىسى سۇحباتتى قازاق تىلىنە اۋدارىپ، وقىرمان نازارىنا ۇسىنعان ەدىك.