قازاقستان پرەزيدەنتى نۇرسۇلتان نازاربايەۆ قىتايدان ەشقانداي ءقاۋىپ ءتونىپ تۇرعان جوق دەپ سانايدى. بۇل تۋرالى مەملەكەت باسشىسى جىل قورىتىندىسى بويىنشا ب ا ق وكىلدەرىمەن وتكەن كەزدەسۋىندە ايتتى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ. 

پرەزيدەنت قازاقستان مەن قىتايدىڭ قازىرگى قارىم-قاتىناسى جوعارى دەڭگەيدە ەكەنىن اتاپ ءوتتى. 

"ودان قورقاتىن ەشنارسە جوق. بۇل دۇنيە، تاريح بىزدەن باستالعان جوق، بىزبەن اياقتالمايدى…قىتايلار قاپتاپ، ەلىمىزدى باسىپ جاتقان جوق. مەن سونى باقىلاماي، وسى جەردە نە قاراپ وتىرمىن؟! ونىڭ بارلىعى زاڭمەن، كەلىسسوزبەن كەلىسىلگەن. ءوندىرىس سالاتىن بولسا، بىزدە جوق 500 مامان ءتىزىم بويىنشا كەلەدى. زاۋىت قۇرىلىسى اياقتالعاننان كەيىن، سول 500 ادام ەلىنە قايتادى. ول كەلىسىلگەن ماسەلە"، — دەدى نازاربايەۆ جىل قورىتىندىسى بويىنشا جۋرناليستەرمەن وتكەن كەزدەسۋىندە. 

مەملەكەت باسشىسى 200 ميلليوننان استام جۇڭگو باسقا ەلدەردە تۇراتىنىن مىسالعا كەلتىردى. قاي قالاعا بارا قالساڭ، جۇڭگو قالاشىعى الدىڭنان شىعادى. ال بىزدە ونداي ەشتەڭە جوق دەدى ول.

"تۋىستارى بولاتىن شىعار، ۇيلەنەتىن شىعار، نە ىستەيسىڭ، بۇل ەندى ءومىر عوي. سوندىقتان ءقازىر جۇڭگو امەريكادان كەيىنگى الەمدەگى ەكىنشى ورىندا تۇرعان، وتە مىقتى، وركەندەپ-وسىپ بارا جاتقان ەل. تەحنولوگيا مەن تەحنيكا جاعىنان بىرگە كەلە جاتىر. اقپاراتتىق تەحنولوگيا، جاساندى ينتەللەكت، كومپيۋتەرلىك تەحنولوگيا – بارلىق جاعىنان جۇڭگو وزىپ كەتپەسە، ارتتا قالىپ جاتقان جوق"، — دەدى پرەزيدەنت. 

نازاربايەۆ جۇڭگو، رەسەي سەكىلدى كورشى ەلدەرمەن قارىم-قاتىناس جاساسپاساق، قازاقستان مەملەكەت بولماي قالاتىنىن ايتتى.

"باتىسقا كوبىنەسە رەسەي ارقىلى شىعامىز، شىعىسقا جۇڭگو ارقىلى. ال ولارمەن ارادا دوستىق قارىم-قاتىناس، سەنىم بولماسا، قازاقستان دامىماي، بىردەن جوق بولىپ كەتەدى. سوندىقتان ءبىز قولدان كەلگەنشە سي سزينپين مىرزانىڭ "ءبىر بەلدەۋ – ءبىر جول" (جىبەك جولى) دەگەن ماسەلەسىن قولداپ وتىرمىز. ءبىزدىڭ "نۇرلى جول" باتىسقا قاراي سول "جىبەك جولىنىڭ" جالعاسى بولىپ سانالادى"، — دەدى نازاربايەۆ. 

پرەزيدەنت قىتايمەن قارىم-قاتىناس بولعاننان كەيىن، جاستاردىڭ جۇڭگو ءتىلىن ءبىلۋى ماڭىزدى ەكەنىن اتاپ ءوتتى. 

"جاستارىمىز اعىلشىن تىلىنەن كەيىن جۇڭگو ءتىلىن مەڭگەرۋى ءتيىس. اشىعىن ايتقاندا، ەشقانداي ءقاۋىپ جوق دەپ سانايمىن. كەرىسىنشە، جۇمىسىمىزدى كۇشەيتۋىمىز كەرەك. جۇڭگو دا ءبىزدىڭ ولارعا بارىپ جۇمىس ىستەۋىمىزگە قارسى بولىپ وتىرعان جوق. ءبىراق، ءبىز ءوز ءىشىمىزدى جوندەي الماي وتىرعاندا، ول جاقتا نە ىستەيمىز؟ سوندىقتان ءبىز قارىم-قاتىناستى نىعايتامىز، كورشىلىك جاعدايىمىزدى ءارى قاراي تۇزەپ، ينتەگراسيانى جۇرگىزە بەرەمىز"، — دەپ تۇيىندەدى ءسوزىن نازاربايەۆ.