دەنيس تەننىڭ ولىمىنە قاتىستى ايىپتالۋشىلار كىناسىن مويىندامادى دەپ حابارلايدى Qamshy.kz اقپارات اگەنتتىگى informburo.kz سايتىنىڭ دەرەگىن نەگىزگە الىپ. 

سوت وتىرىسىن كەڭشىلىك ابدەلدينوۆ باسقاردى. قىلمىستىق ءىس 38 تومدى قۇراعان. ايىپتالۋشىلاردىڭ قاتارىندا ارمان قۇدايبەرگەنوۆ، نۇرالى قياسوۆ جانە جانار تولىبايەۆا بار.

سوت وتىرىسى كەزىندە جابىرلەنۋشىلەر مەن ايىپتالۋشىلار سۋرەتكە تۇسىرۋگە قارسى بولدى. سوت تەرگەۋىنىڭ باستالۋىنا دەيىن سوت ءماجىلىس زالىندا جۋرناليستەر قاتىستى. ال قالعان پروسەسس ب ا ق وكىلدەرىنىڭ قاتىسۋىنسىز ءوتتى. 

♦"دەنيس تەندى تاپسىرىسپەن ولتىرگەن بولۋى مۇمكىن"

«مەن ۇرلىق جاسادىم. ونى مويىندايمىن. الايدا كىسى (دەنيس تەندى — رەد.) ولتىرگەن جوقپىن. مەن اينانى ۇرلادىم. بۇل – شىندىق. ءبىراق كىسى ءولتىرۋ تۋرالى ويىمدا دا بولعان جوق. مەن ادام دەنساۋلىعىنا زيان كەلتىرمەدىم»، — دەيدى ارمان قدايبەرگەنوۆ.

ال نۇرالى قياسوۆ بولسا ءوز كىناسىن مۇلدەم مويىندامادى.

«مەن ماعان ارتىلعان كىنانى مويىندامايمىن. مەن كىسى ولتىرگەن جوقپىن، ۇرلىق جاسامادىم»، دەدى نۇرالى قياسوۆ.

جانار تولىبايەۆا سوتقا وزىنە قاتىستى جاسالعان ايىپپۇلداردى قايتا قاراپ شىعۋدى سۇرادى.

«مەن قىلمىس بولىپ جاتقانىن بىلمەدىم. ماعان قاتىستى باپتى وزگەرتۋىڭىزدى سۇرامىن. مەن دەنيستى پىشاقتاعانىن دا كورمەدىم. ماعان تاعىلعان ايىپتى تولىق مويىندامايمىن»، — دەيدى ايىپتالۋشى جانار تولىبايەۆا.

♦ەكى پوليسەي ءوز پارىزىن ادال اتقارعاندا، دەنيس تەن ءتىرى قالار ما ەدى؟!

سوت زالىندا ەرمەك جانعابايەۆ ەسىمدى جابىرلەنۋشى دە بولدى.

«22 ماۋسىمدا تاڭەرتەڭگى ساعات 8:30 - دا جۇمىسقا بارا جاتقاندا، كولىگىمنىڭ ايناسى مەن كامەراسى جوعالعانىن بايقادىم. مەن بىردەن پوليسيا شاقىردىم. ولار قۇجاتتاما تولتىرىپ، ساۋساق ىزدەرىن الدى. سول كۇنى قولدانىلعان اينالاردى ساتىپ الىپ، كولىگىمە ورناتتىم. كەيىننەن ماعان تەرگەۋشىلەر حابارلاسىپ، ۇرلانعان اينانىڭ تابىلعانىن ايتتى. ۇرلانعان اينا قۇدايبەرگەنوۆتەن تابىلعان»، دەيدى جابىرلەنۋشى.