مەملەكەتتىك ايىپتاۋشى دەنيس تەندى سوتتالۋشى نۇرالى قياسوۆتىڭ پىشاقتاعانىن ايتتى دەپ جازادى Qamshy.kz اقپارات اگەنتتىگى sputniknews.kz  سايتىنىڭ دەرەگىن نەگىزگە الىپ. —

الماتىدا قىلمىستىق ىستەر جونىندەگى مامانداندىرىلعان اۋدانارالىق سوتتا مانەرلەپ سىرعاناۋشى دەنيس تەننىڭ ولىمىنە قاتىستى ءىس بويىنشا سوت وتىرىسى جالعاستى. پروكۋرور قۋاندىق دوسوۆ سوتتالۋشىلارعا قاتىستى ايىپتاۋ اكتىسىن وقىدى. 

ايىپتاۋ اكتىسىندە ايتىلعانداي، دەنيس تەننىڭ ولىمىنە كۇدىكتى ارمان قۇدايبەرگەنوۆ 2018 جىلدىڭ ماۋسىمىندا شاگابۋتدينوۆ-شيەۆچەنكو كوشەلەرىنىڭ قيىلىسىندا تۇرعان جاڭقابايەۆتىڭ Lexus كولىگىنىڭ ايناسىن ۇرلاعان. كەلتىرىلگەن شىعىن 608 مىڭ تەڭگەنى قۇرادى. ءوزىنىڭ قىلمىسىن جاسىرۋ ءۇشىن قۇدايبەرگەنوۆ اينالاردى شاڭىراقتاعى سايعا لاقتىرىپ كەتكەن. 

"سونىمەن قاتار، قۇدايبەرگەنوۆ 11 شىلدەدە زاڭسىز جولمەن اقشا تابۋ پيعىلىمەن استاناداعى كۇيشى دينا كوشەسىندە شامشييەۆتىڭ كولىگىنىڭ ايناسىن شەشىپ كەتكەن. وسىعان بايلانىستى قۇدايبەرگەنوۆكە ق ر قك 188-بابى بويىنشا ايىپ تاعىلدى"، — دەدى پروكۋرور سوت وتىرىسىندا. 

ال دەنيس تەن كوز جۇمعان 19 شىلدە كۇنى سوتتالۋشىلار نۇرالى قياسوۆ پەن جانار تولىبايەۆا، ارمان قۇدايبەرگەنوۆ "ماگنۋم" ساۋدا ۇيىنەن اس ءۇي پىشاعى مەن قولعاپ ساتىپ العان. قۇرمانعازى كوشەسىنەن شىعىسقا قاراي بايسەيىتوۆا كوشەسىندە "LEXUS 708 02" كولىگىنىڭ تۇرعانىن بايقايدى. 

"ولار كولىكتەرىن "دوستىق" قوناق ءۇيىنىڭ قاسىنا قالدىرىپ، تەننىڭ اۆتوكولىگىنە جاياۋ جاقىنداعان. تولىبايەۆا جان-جاعىنا قاراپ، ادامداردىڭ قاراسى ازايۋىن، ىڭعايلى ءساتتى كۇتىپ، 7 مەتر ارا قاشىقتان ايماقتى باقىلاپ تۇرعان. قۇدايبەرگەنوۆ بولسا، كولىكتىڭ ايناسىن شەشىپ الىپ، كولىك يەسىنە 199 مىڭ تەڭگە شىعىن كەلتىرگەن. سول ساتتە دەنيس تەن تولىبايەۆانىڭ قاسىنان ءوتىپ، كولىگىنىڭ جانىندا بوتەن ادامنىڭ تۇرعانىن كورەدى. ونىڭ كولىك ايناسىن ۇرلاپ جاتقانىن بايقاعان سوڭ، ايناسىنا جارماسا كەتكەن"، — دەلىنگەن ايىپتاۋ اكتىسىندە. 

دوسوۆتىڭ ايتۋىنشا، وسى ساتتە قۇدايبەرگەنوۆ بايسەيىتوۆا كوشەسىنە قاراي قاشا جونەلگەن. ال تەن كوپ ۇزاماي ونى قۋىپ جەتكەن. سول ارادا قۇدايبەرگەنوۆ پەن تەن اراسىندا توبەلەس باستالعان. 

"قۇدايبەرگەنوۆ شالبارىنىڭ بەلبەۋىن شىعارىپ، تەننىڭ بەتىنەن ۇرا باستاعان. سول ساتتە قياسوۆ ريۋكزاكتان پىشاقتى الىپ ارت جاعىنان كەلگەن. قياسوۆ قىلمىستى جاسىرۋ ءۇشىن ونى ءولتىرۋدى ويلاعان. قۇدايبەرگەنوۆ تەندى ۇستاپ تۇرادى. سول كەزدە قياسوۆ دەنيس تەننىڭ وڭ جاق سانىنىڭ ارتەرياسىنىڭ جوعارعى تۇسىنان ەكى رەت پىشاقتاعان"، — دەدى مەملەكەتتىك ايىپتاۋشى.

الايدا ءۇش كۇدىكتى دە ادام ولتىرگەندەرىن مويىنداماي وتىر. 

دەنيس تەننىڭ ولىمىنە قاتىستى ءىس بويىنشا العاشقى سوت وتىرىسى 25 جەلتوقساندا وتكەن ەدى. سوت الدىنا ءۇش ادام كەلدى — نۇرالى قياسوۆ، ارمان قۇدايبەرگەنوۆ جانە جانار تولىبايەۆا. وتىرىستا كۇدىكتى ايەلدىڭ اياعى اۋىر ەكەنى بەلگىلى بولدى.

وتىرىستا جابىرلەنۋشى تاراپتىڭ ادۆوكاتى نۇرلان وستەمىروۆ دەنيس تەن تاپسىرىسپەن ءولتىرىلدى دەپ مالىمدەپ، سوتتان ءىستى قوسىمشا تەرگەۋگە جىبەرۋدى سۇراعان بولاتىن. ءبىراق سۋديا ءىستى قايتا تەرگەۋگە جىبەرۋدىڭ قاجەتى جوق دەپ شەشتى. 

بۇدان بولەك، تەننىڭ وتباسىنىڭ قورعاۋشىسى سپورتشىنىڭ ولىمىنە سەبەپ بولعان اينا ۇرلانعان ءساتتى ەكى پوليسەيدىڭ كورۋى مۇمكىن ەكەنىن ايتتى.