2018 جىلدىڭ 31 جەلتوقسانىندا الەم جاڭا 2019 جىلدى قارسى الۋعا دايىندالىپ جاتقاندا رەسەيدەگى ماگنيتوگورسك قالاسىنىڭ تۇرعىندارى ءۇشىن بۇل قارالى كۇن بولدى. سوڭعى دەرەك بويىنشا، 39 ادام قازا تاپقان. رەسمي دەرەككە سايكەس، توسىن وقيعا گازدىڭ جارىلۋ سالدارىنان بولدى. الايدا حالىق اراسىندا «تەراكت ورىن الدى» دەگەن سىبىس تارالدى. قالادا كۇنىنە ەكى مارتە بريفينگتەر ءوتىپ جاتىر، دەگەنمەن ناقتى اقپارات ءالى بەلگىسىز نەمەسە ايتىلمادى.
2 قاڭتاردىڭ كەشىندە كارل ماركس كوشەسىندە ورنالاسقان ءۇيدىڭ ماڭىنداعى اپات مەموريالىنا تۇرعىندار گۇل مەن ويىنشىقتار اكەلىپ جاتتى. كۇننىڭ اياز بولعانىنا قاراماستان حالىق قۇربانداردى ۇنسىزدىكپەن ۇزاق ەسكە الدى. اينالا تولعان ءورت سوندىرۋشىلەر. اۋادان كۇلدىڭ ءيىسى مۇڭكىپ تۇر.
جالپى 31 جەلتوقساننان كەشەگى كۇنگە دەيىنگى ماگنيتوگورسكىدەگى جاعداي قالاي ءوربىدى؟ شولىپ وتەلىك...
31 جەلتوقسان: جارىلىس پەن وپىرىلعان ءۇي
31 جەلتوقسان تاڭعا جۋىق يۋليا ورلوۆا قاتتى سوققىنىڭ داۋىسىنان ويانادى. الگى سوققى بىرنەشە سەكۋند بويى ءۇش مارتە قايتالانعان. يۋليا كارل ماركس كوشەسىندەگى №164 ۇيگە كورشىلەس اۋلادا تۇرادى.
ال قالانىڭ وزگە تۇرعىندارىن ۇيالى تەلەفوندارعا توقتاۋسىز كەلگەن حابارلامالار وياتقان. ساعات تاڭعى 8:12-دە رەسەيلىكتەردىڭ ۇيالىسىنا توتەنشە جاعدايلار مينيسترلىگىنەن «كارل ماركس كوشەسىندە ورنالاسقان ۇيدەگى جارىلىس» جايلى حابارلاما كەلىپ ءتۇستى. كەيىن ەرىكتىلەردەن كەزەكتى حابارلامالار كەلدى. وندا ەرىكتىلەر ءۇيى قيراپ قالعان تۇرعىندارعا كومەكتەسۋلەرىن وتىنگەن. 10 مينۋتتان سوڭ راديو سويلەي باستادى.
8:30-دا كوك تۇتىنگە بويالعان تاڭ اتتى. كۇل 200 مەترگە دەيىنگى قار مەن كولىكتەردى، ۇيلەردى باسىپ قالدى.
رەسمي دەرەككە سايكەس، پودەزدە 111 ادامنىڭ تۇراتىنى تىركەلگەن. توتەنشە جاعدايدان كەيىن 79 ادامنىڭ تاعدىرى بەلگىسىز ەدى، ال قالعاندارى نە ءتىرى، نە ءولى كۇيىندە تابىلىپ جاتتى.
قيراندى ءۇيدىڭ الدى ءورت سوندىرۋشىلەرگە تولدى، اينالادان تەك ايقايلاعان، جىلاعان داۋىستار ەستىلدى.
پودەزد تۇرعىنىنىڭ جۋرناليستەرگە بەرگەن سۇحباتىنا سۇيەنسەك، تۇندە قابىرعالار مەن ەدەندەردىڭ قيراي باستاعان داۋىسىنان ويانىپ كەتكەن. تەرەزەسى ىڭعايلى جەردە ورنالاسقاندىقتان، دۇكەننىڭ شاتىرىنا شىعىپ، كورشىلەرىنە دە شىعۋعا كومەكتەسكەن.
كومەك كورسەتۋ ءۇشىن ۇلكەن پىشاق، مەتالل سۇراعان ەركەكتەردىڭ داۋىسى انىق ەستىلدى. ۇستىڭگى قاباتتاردان جەرگە پىشاقتار ۇشتى.
ساعات 11-گە تاياۋ قازا تاپقانداردىڭ سانى 3-كە جەتتى، زارداپ شەككەندەر اۋرۋحاناعا جەتكىزىلدى. قيراعان ۇيگە جاقىن №14 مەكتەپتە ۋاقىتشا شتاب قۇرىلدى. ماگنيتوگورسك تۇرعىندارى زارداپ شەككەندەرگە جىلى كۇرتەشە، كورپە، ازىق-تۇلىك، سۋ، بالالار تاعامىن تاسىپ جاتتى.
پرەزيدەنت پۋتين اپاتتى ەستىگەن بويدا قالاعا ۇشىپ كەلىپ، جەدەل وتىرىس وتكىزدى. قالا گۋبەرناتورى پۋتينگە «جاعدايدى تولىق شەشەمىز» دەپ ۋادە بەردى.
1 قاڭتار: ەۆاكۋاسيانىڭ داۋىسى مەن ورتەنگەن «گازەل»
جاڭا جىل ءتۇنى قۇتقارۋشىلار تۇرعىنداردان وتشاشۋدى پايدالانباۋدى سۇرادى. الايدا بۇعان كەي ادام قۇلاق اسپادى.
1 قاڭتاردا قۇتقارۋشىلار توبى جۇمىستى توقتاتۋعا ءماجبۇر بولدى، قابىرعالاردىڭ تاعى قۇلاپ جاتقانى تۋرالى اقپارات تارادى. قيراندى ءۇيدىڭ اراسىندا جاپا شەككەندەردى ىزدەپ يتتەر ءجۇر. بىردە يتتەردىڭ ءبىرى تۇرعان ورنىندا قاتىپ قالادى. ءيتتىڭ ادامدى ءيسىن سەزگەنىن يەسى بىردەن ءتۇسىندى.
ءسويتىپ قۇتقارۋشىلار ءۇيىندىنىڭ اراسىنان 11 ايلىق ۆانيا فوكينانى الىپ شىقتى. فوكيندەر قيراعان پودەزدەگى پاتەردە تۇراتىن. ءورت كەزىندە اناسى 3 جاسار بالاسىن الىپ ۇلگەرگەن، ال قاراڭعىدان 11 ايلىق ءسابيدى ىزدەپ تابۋ مۇمكىن بولمادى. ال كۇيەۋى ەۆگەنيي فوكين اپات ۋاقىتىندا جۇمىستا بولىپتى. كەلەسى كۇنى كۇنى بويى قۇتقارۋشىلارعا كومەكتەسۋمەن ءجۇردى.
ءسابيدى بىردەن اۋرۋحاناعا جەتكىزدى، ءالى دە جاعدايى اۋىر.
1 قاڭتاردا ءتۇننىڭ ورتاسىندا قالالىق باستى شىرشا ورنالاسقان ماگنيتوگورسك اكىمشىلىگى ماڭىنان اتىستىڭ ءارى ءورتتىڭ داۋىسى ەستىلگەن. كۋاگەرلەر ۆكونتاكتە جەلىسىندەگى پابليكتەردە پوليسيانىڭ ورتەنگەن «گازەلدى» اپارا جاتقان ءساتىن كورگەندەرىن جارىسا جازىپ جاتتى. كوبى مۇنى تەراكت دەپ باعالادى.
جەرگىلىكتى جەردە رەسمي دەرەك ناقتى ايتىلماعاندىقتان تۇرعىندار اراسىندا ءتۇرلى سىبىس تارادى. ءبارى دەرلىك تەراكت ەكەنىنە سەنىمدى.
1 قاڭتاردىڭ كەشىندە اپات بولعان ۇيگە كورشى كوشەدەگى ۇيدەن ادامداردىڭ ەۆاكۋاسيالانىپ جاتقانى جايلى اقپارات تارادى. حابارلامانىڭ استى مىڭداعان پىكىرگە تولدى. كوبى قۇتىلىپ كەتكەن تەرروريستەر لەنين كوشەسىندەگى ۇيگە تىعىلعان دەپ بولجادى.
2 قاڭتاردا جۋرناليستەر الگى ۇيگە باردى. الايدا №84 ءۇيدىڭ تۇرعىندارى ەشقانداي ەۆاكۋاسيانىڭ، شۋدىڭ بولماعانىن ايتتى. انىقتالعانداي، ءبارى تەك سىبىس قانا.
2 قاڭتار كۇنى 31 ادامنىڭ قايتىس بولعانى انىقتالدى. الايدا بۇل سيفر كۇن ساناپ ارتاتىنداي ەدى. وقيعا ورنىندا 100-گە جۋىق قۇتقارۋشى جۇمىس ىستەدى.
2 قاڭتار: ازا تۇتۋ
جەرگىلىكتى بيلىك 2 قاڭتاردى ازا تۇتۋ كۇنى دەپ جاريالادى.
پاتەر يەلەرى گۋبەرناتوردان باسپانا بەرۋىن تالاپ ەتتى. ءتىپتى ادامدار پودەزى بار ۇيدە تۇرۋدان قورقىپ قالعان. وزگە تۇرعىندار ۇيلەرىندەگى قاۋىپسىزدىككە الاڭداۋلى.
كەيبىرى پودەزدەرىنىڭ قيراپ بارا جاتقانىن ايتىپ شاعىمداندى.
كوپقاباتتى ۇيدە تۇراتىندار جەر ۇيدەگى تۋىسقاندارىنا ۋاقىتشا كوشتى.
3 قاڭتار: 39 قازا
ءۇي ءۇيىندىسىنىڭ استىنان جالپى سانى 39 ادامنىڭ ءمايىتى تابىلدى. 4 قاڭتار قالادا العاشقى جەرلەۋ ءراسىمى باستالۋى ءتيىس.
2-سىنەن 3-ىنە قاراعان ءتۇنى اندرەي سينەبريۋحوۆ پەن ولگا باتالوۆانىڭ دەنەسى تابىلدى. ەكى بالاسى ۇيدە قونباعاندىقتان ءتىرى قالعان. تۋىسى تاتيانانىڭ ايتۋىنشا، اندرەي 31ء-ى تۇنگى اۋىسىمعا شىعۋى ءتيىس ەدى، ال ولگا 1ء-ى شىعۋى ءتيىس. ارسەنيا مەن كسەنيا جاڭا جىلدى اتا-انالارىمەن قارسى الا المايتىن بولعاندىقتان ناعاشى اتا-اجەسىنىڭ ۇيىندە بولعان.
تاتيانا ءمايىتحانادان ءىنىسى مەن كەلىنىنىڭ دەنەسىن تانىدى. اندرەيدىڭ بەتى تولىق كۇيىپ قالعان، ال ولگانى قولىنداعى بىلەزىگىنەن تانىدى. جۋرناليستەردىڭ وزگە سۇراقتارىنا تاتيانا جاۋاپ بەرە المادى، سەبەبى ول جىلاي بەردى...
پىكىر قالدىرۋ