الماتىدا دەنيس تەننىڭ ءولىمى بويىنشا سوت وتىرىسى جالعاسۋدا. بۇگىن سوتتا سپورتشىنىڭ اناسى وكسانا تەن تۇسىنىك بەردى. ول دەنيس تەننىڭ ءولىمى تاپسىرىسپەن ورىندالعان دەگەن پىكىر ايتۋدا، دەپ حابارلايدى Qamshy.kz اقپارات اگەنتتىگى قازاقپاراتقا ءتىلشىسى سوت زالىنان.

دەنيس تەننىڭ ايتۋىنشا، سول كۇنى ونى "ت9 گرۋپپ" ج ش س ديرەكتورى مادينا امانوۆا "گەدونيست" رەستورانىنا شاقىرعان.

"رەستوراننىڭ ديرەكتورى رۋسلان حايرۋللايەۆ دەنيسپەن 1-3-سىنىپتا بىرگە وقىعان. دەنيس ونىمەن جاقسى ارالاسپايتىن. 13:45-تە حايرۋللايەۆ ونى تۇسكى اسقا شاقىرعان. 13.48-دە دەنيس وعان كەلىسەدى. ال 18 شىلدەدە بۇگىن كۇدىكتى بولىپ وتىرعان ۇشەۋى الماتىدا جينالادى. ولار 18 شىلدە كۇنى كەشكى 21-دە قالانىڭ ورتاسىنان پاتەر جالداعان. اقشالارى جوق ولار قىمبات اۋداننان قالاي پاتەر جالداعان؟! بارلىق ارەكەت 19-ى كۇنى تۇسكى ەكىدە باستالادى. تۇسكى 14:14-تە ولار ناۋرىزباي كوشەسىمەن گوگولعا بۇرىلعان.

14:15-تە كۇدىكتى تولىبايەۆا قوڭىراۋ شالادى. تولىبايەۆا ۇنەمى تەلەفوندا بولعان. 14:18-تە دەنيس رەستوراننان شىقتى. 14:30-دا قىلمىسكەرلەر سول وقيعا ورنىندا بولعان.  وسى ۋاقىتقا دەيىن قۇدايبەرگەنوۆ قولعابىمەن جۇرگىزۋشى جاقتىڭ ايناسىن شەشىپ العان. دەنيس ماشيناعا قۇرمانعازى كوشەسىمەن كەلە جاتادى. قۇلاعىندا قۇلاققاپ، مۋزىكا تىڭداپ بارا جاتادى. تولىبايەۆا ونىڭ كولىك يەسى ەكەنىن قايدان ءبىلدى؟ ول سىبايلاستارىنا حابارلاپ ۇلگەرەدى. دەنيس ماشيناعا كەلگەندە قۇدايبەرگەنوۆتى كورگەن. سول ساتتە قۇدايبەرگەنوۆ ونىڭ قولىنا ەكىنشى اينانى ۇستاتادى. قانداي ۇرى كولىك يەسىنە ءوزى ۇرلاعان زاتىن ۇستاتۋشى ەدى؟ سودان سوڭ دەنيسكە  قۇدايبەرگەنوۆ بىردەڭە ايتىپ، دەنيس اشۋلانىپ كەتكەن. وعان نە ايتقانىن بىلمەيمىن. قۇدايبەرگەنوۆ سپورت الاڭىنا قاراي قاشا جونەلەدى. ونىڭ ارتىنان قياسوۆ جۇگىرەدى. دەنيس سول جەردە قانسىراپ قۇلاعانشا اياعىنان تىك تۇرعان. ونى ءبىر كۋاگەر كورگەن. ول ءبىراق توبەلەستەن قورىققانىنان ماشينادان شىقپاعان» - دەيدى وكسانا تەن.

ونىڭ ايتۋىنشا، اۆتوۇرىلار اۋەل باستان اينا ۇرلاۋدى ماقسات تۇتپاعان. مەن كەلگەندە اينالار دەنيس قۇلاعان جەردەن سول جاقتا جاتتى.

"دەنيستىڭ سومكەسىندە اينادان دا قىمبات زاتتار بولدى. نەگە ونى الماعان؟ ولار نە ءۇشىن جاسادى مۇنى؟ اقشا ءۇشىن ەكەنى راس. ءبىز تاپا-تال تۇستە ادام ولتىرە سالاتىن ەل ەمەسپىز. كۇندىز پىشاق ۇستاپ، ادام ءولتىرۋ بولا بەرمەيدى. مەن وسى نۇسقاعا كوپ ادامنىڭ سەنگەنىن قالامايمىن. دەنيس قازاقستانىن تەك قانا جاقسى جاعىنان كورسەتكىسى كەلەتىن، ەلىن ماقتايتىن، جاقسى كورەتىن، ءبارىن قوناققا شاقىراتىن. بىزگە كەلگەن قوناقتار «قازاقستان قانداي ادەمى، تاماقتارىڭ قانداي ءدامدى»، - دەپ ايتىپ كەتەتىن. ۇستالعاندارعا ايتارىم، سىزدەر قازاقستانعا قارسى اۋىر قىلمىس جاسادىڭىزدار. بۇل قارا كۇيەدەن قازاقستان جاقىن ارادا تازارمايدى. قازاقتى سۇيگەن بالانى مولاعا سۇيرەدىڭىزدەر "، - دەدى وكسانا تەن.

ونىڭ ايتۋىنشا،  دەنيستىڭ ومىرلىك ۇستانىمدارى بىرەۋگە ۇناماعان نەمەسە ونىڭ ومىرىندەگى ساتتىلىك بىرەۋلەرگە كەدەرگى بولعان.

ەسكە سالساق، دەنيس تەندى بيىل 19 شىلدەدە الماتى قالاسىندا بەلگىسىز بىرەۋلەر پىشاقتاپ كەتكەن ەدى. اۋىر حالدە اۋرۋحاناعا جەتكىزىلگەن سپورتشى كوز جۇمعان بولاتىن.

دەنيس تەننىڭ ولىمىنە قاتىستى قىلمىستىق ءىس قوزعالىپ، كۇدىكتىلەر ىزدەستىرىلدى. ەلباسى دەنيس تەنگە قاتىستى قىلمىستى مۇقيات تەكسەرۋدى تاپسىردى.

كەيىن ق ر ءىىم كۇدىكتىلەردىڭ ۇستالعانىن جاريا ەتتى. ايتا كەتەيىك، كەشە دەنيس تەننىڭ ءولىمى بويىنشا باستى سوت تالقىلاۋى باستالدى.