قاراعاندىدا ادام ولىمىمەن اياقتالعان جاپپاي توبەلەستەن كەيىن ءىزىن جاسىرعان كۇدىكتى نارەك گۋرۋريان رەسەي اۋماعىنا قاشقان. بۇل تۋرالى بۇگىن ىشكى ىستەر ءمينيسترىنىڭ ءبىرىنشى ورىنباسارى جانات سۇلەيمەنوۆ مالىمدەدى، دەپ حابارلايدى Qamshy.kz اقپارات اگەنتتىگى Sputnik قازاقستان مالىمەتىنە سۇيەنە وتىرىپ. 

سۇلەيمەنوۆتىڭ ايتۋىنشا، جەدەل تەرگەۋ شارالارى بارىسىندا كۇدىكتىنىڭ پاۆلودار وبلىسىنداعى بەكەت ارقىلى رەسەي اۋماعىنا وتكەنى بەلگىلى بولدى.  

"كۇدىكتى 1 قاڭتار كۇنى كەشكى 22.00-دەن كەيىن شەكارانى كەسىپ وتكەن"، — دەدى ءمينيستردىڭ ءبىرىنشى ورىنباسارى وكق-دە وتكەن بريفينگتە. 

ونى ىزدەۋ ءۇشىن ەكى جەدەل تەرگەۋ توبى رەسەيگە، ال تاعى ءبىر توپ ارمەنياعا جىبەرىلگەن. 

"ءبىز ءقازىر ارىپتەستەرمەن بىرگە ءوزارا ءىس-قيمىلدى پىسىقتاپ جاتىرمىز. كۇدىكتىنىڭ بەينەۇندەۋى ونى ۇستاۋعا جانە زاڭدى تۇردە قىلمىستىق جاۋاپقا تارتۋ ءۇشىن قازاقستانعا قايتارۋعا سەپتىگىن تيگىزەدى دەگەن ويدامىن. ال كۇدىكتىنىڭ قىلمىستى جاساعان-جاساماعانىنا قاتىستى، مەنىڭ ويىمشا، تەرگەۋ ورگاندارىندا ءدال سول ساتتە نەگىز جەتكىلىكتى بولدى. سوت سانكسيا بەردى"، — دەدى سۇلەيمەنوۆ.