ۋكراينانىڭ راديكالدى «ازاتتىق» پارتياسىنىڭ بەلسەندى مۇشەسى يرينا فاريون دونباسس اۋماعىن ورىستاردان تازارتۋعا شاقىردى.

–بۇل ەتنيكالىق سوعىس. بۇل – ماسكەۋلىكتەر مەن ۋكراينداردىڭ سوعىسى. سوندىقتان ءبىز دونباسس اۋماعىنان ورىستاردى قۋىپ شىعۋىمىز كەرەك،–دەپ مالىمدەدى ول.

قاشان دا ءوزىنىڭ راديكالدى كوزقاراسىمەن جۇرتتىڭ ەسىندە قالعان يرينا فاريون ۋكراينادا باسقا ءتىلدىڭ ۇستەمدىك الۋىنا جول بەرمەۋگە شاقىردى. كەزدەسۋدە جۇرتشىلىق يريناعا "ورىس تىلىندە سويلەيتىن ۋكرايندىقتارعا نە ىستەي الامىز؟" دەپ ساۋال قويعان.

–ەگەر قانداي دا ءبىر ادام كوشەدە وسىنداي ماسەلەنى كوتەرەتىن بولسا، وندا قاراپ تۇرۋعا بولمايدى. اياعىڭداعى ءتۋفليدى شەشىپ ال دا، بەتىنە ۇر. وندايلارمەن ءسوز تالاستىرىپ، بەت جىرتىسىپ قاجەتى جوق. ورىس ءتىلىن ۋكراينادا ۇستەم ەتكىسى كەلەتىندەرگە مۇمكىندىك بەرۋگە بولمايدى. ولاردى  ۋكراينانىڭ جوعارى وقۋ ورنىنا ءتۇسىرۋدىڭ دە قاجەتى جوق. ءتىپتى جۇمىسقا ورنالاسۋعا تىيىم سالۋ كەرەك. ءبىتتى! ەگەر بۇل قادامعا كونبەيتىن بولسا، وندا ۋكراينادان كەتسىن جانە ولار ءبىزدىڭ ەلگە قايتىپ ورالماسىن! سوندا عانا ءبىز ءبىر ۇلتتى مەملەكەتكە اينالامىز. ورىس ءتىلى– وكككۋپانتتاردىڭ ءتىلى! ءبىز دونەسك مەن لۋگانسكىگە جاۋلارىمىزدى ءولتىرۋ ءۇشىن عانا بارۋىمىز كەرەك.  ورىستار ءبىزدىڭ ەلىمىزگە باسىپ كىردى. ولار–سوعىستىڭ اۆتورى. سولاردىڭ ارەكەتىنەن شىعىستا 11 مىڭ ادام وپات بولدى»، –دەدى ول جۇرتشىلىقپەن كەزدەسۋدە.

ۋكراينانىڭ ۇلتشىلدار ۇيىمىنىڭ بەلسەندى مۇشەسى يرينا فاريون ستەپان باندەرانىڭ تۋعان كۇنىن قاسيەتتى كۇن دەپ سانايدى.  ونى  جۇرتشىلىق «كييەۆ حۋنتاسىنىڭ فۋرياسى» (بەتپاق ايەل-رەد) دەپ تە اتايدى ەكەن.