اقىن استانا قالالىق سوتىنا سوتتالۋشى مۇحيتوۆاعا قاتىستى تاعى حات جىبەردى. بۇل جولى دا حاتىندا بويجەتكەندى باس بوستاندىعىنان ايىرماي-اق جازالاۋدى ءوتىنىپتى، دەپ جازادى Qamshy.kz اقپارات اگەنتتىگى.

سۇلەيمەنوۆتىڭ حاتىن اپپەلياسيالىق سوت وتىرىسىندا سۋديا اسەم رامازانوۆا وقىدى.

«22 ماۋسىمداعى قايعىلى جاعدايدان بەرى جارتى جىلداي ۋاقىت ءوتتى. ۇزاققا سوزىلعان سوت پروسەسى ونسىز دا قايعىدان قان جۇتىپ وتىرعان جانداردىڭ ىعىرىن شىعاردى. ەسكەندىردىڭ اتا-اناسى مەن اجەلەرىنىڭ جاعدايىن مەنەن ارتىق تۇسىنەتىن ەشكىم جوق. اسىرەسە قىزىم - ءلايلا. ءار سوت پروسەسى وعان پسيحولوگيالىق تۇرعىدان قىسىمىن كورسەتىپ كەلەدى. مۇحيتوۆا العاشىندا كىناسىن تۇسىنگەندەي بولىپ وكىنىپ ەدى، كەيىن ادۆوكات كۋريچەنكو مارقۇمنىڭ ءوزىن كىنالى ەتىپ شىعارعىسى كەلدى. ول ءۇشىن ومبىدان ارنايى ساراپشى شاقىرتىپ، موتوسيكلدىڭ جوعارى جىلدامدىعىن دالەلدەۋگە تىرىستى. 3 قاڭتاردا وتكەن سوت وتىرىسىندا ادۆوكات جاڭا ساراپشىلار دايىنداعان تىڭ دەرەكتەردى ۇسىندى. جاسىل تۇستەن ءوز جولاعىمەن ءوتىپ بارا جاتقان موتوسيكلدىڭ ءقاۋىپتى ءارى ءقاۋىپسىز جىلدامدىعى تۋرالى ايتىپ بەردى»، - دەپ جازدى ولجاس سۇلەيمەنوۆ.

ونىڭ ۇستىنە، جازۋشى نەمەرەسىنىڭ قانداي بولعانى جايلى دا ەستەلىكتەر جازىپتى.

«ەسكەندىر كىشكەنتايىنان كوز الدىمدا ءوستى. مەن 1995 جىلى يتاليادا ەلشى بولدىم، ول  ريم قالاسىنداعى باستاۋىش مەكتەبىنە ءتۇستى. كەيىن پاريجگە اۋىسىپ، سول جەردە وقۋىن اياقتادى. اتا-اناسى ەرتە اجىراسقاندىقتان، ول ءبىزدىڭ – اتا-اجەسىنىڭ قولىندا ءوستى. ءبىزدىڭ ۇلىمىز سەكىلدى بولدى. ادۆوكات كۋرياچەنكو پاريجدەگى ەسكەندىر وقىعان وقۋ ورتالىقتارىنا ەسكەندىر جايلى سۇراۋ سالعان ەكەن، الايدا ەشقانداي تەرىس جاۋاپ كەلمەگەن. ءوزىم بىلەتىن ەسكەندىر 26 جىلىندا اۋزىنا اراق تا، شىلىم دا الماعان، ستۋدەنت بولىپ جۇرگەن كەزىندە-اق كولىك پەن موتوسيكل ايداۋدى ۇيرەنىپ، جۇرگىزۋشى كۋالىگىن الدى. فرانسيادا ونداي كۋالىك الۋ وڭاي ەمەس، ايلاپ وقيسىڭ، ەمتيحان تاپسىراسىڭ. ەۋروپادا ءبىر دە ءبىر ايىپپۇلسىز، ەسكەرتۋسىز قانشاما جىل كولىك ايدادى»، - دەدى ولجاس سۇلەيمەنوۆ.

جازۋشى وسى جولى دا مۇحيتوۆانىڭ بوستاندىعىن شەكتەمەۋدى ءوتىندى.

«اۋلەتتىڭ ۇلكەنى رەتىندە استانا قالالىق سوتىنا حات جازدىم. مۇحيتوۆانى ۇقىپسىزدىعى ءۇشىن جازالاۋدى، تەك بوستاندىعىن شەكتەمەۋدى ءوتىندىم. ايەلىم مەنى قولدادى. قىزىم ءلايلا مەن جاقىن تۋىستارىم مەنى بولاشاقتا تۇسىنە جاتار. ءلايلا ءالى ءوزىنىڭ ەكى قىزىن تاربيەلەپ، ءوسىرۋى كەرەك. كوڭىلى الاڭسىز بولسا دەيمىن»، - دەپ جازىپتى ولجاس سۇلەيمەنوۆ.

ەسكەندىردىڭ اتا-اناسى سوتتىڭ بۇعان دەيىنگى شەشىمىنىڭ وزگەرىسسىز قالعانىن قالايتىندارىن جەتكىزدى. ال ماليكا مۇحيتوۆا كىناسىن تولىق مويىنداعانىمەن، سوت شەشىمىن تىم قاتاڭ دەپ باعالادى.

قاتىسۋشىلاردىڭ پىكىرىن تىڭداعان سۋديا اسەم رامازانوۆا اپپەلياسيالىق القانىڭ شەشىم شىعاراتىن كۇنىن 14 قاڭتارعا اۋىستىردى.

ەسكە سالا كەتسەك، بەلگىلى اقىن، جازۋشى ولجاس سۇلەيمەنوۆتىڭ نەمەرەسى 27 جاستاعى ەسكەندىر سۇلەيمەنوۆ استانادا جول اپاتىنان كوز جۇمعان ەدى.  جول اپاتى ماڭگىلىك ەل – كەرەي -جانىبەك حان كوشەلەرىنىڭ قيىلىسىندا بولعان. جاس جىگىت موتوسيكل جۇرگىزىپ كەلە جاتقان. ەسكەندىر سۇلەيمەنوۆتى قىزىلوردا وبلىسى ىشكى ىستەر دەپارتامەنتىنىڭ باسشىسى، پوليسيا پولكوۆنيگى قايرات ءمۇحيتوۆتىڭ قىزى ماليكا مۇحيتوۆا قاعىپ كەتكەن. 29 جاستاعى ماليكا مۇحيتوۆا سوت وتىرىسىندا مارقۇمنىڭ اتا-اناسىنان جىلاپ كەشىرىم سۇرادى. ءوزىنىڭ كىناسىن تولىعىمەن مويىنداپ، زارداپ شەككەن تاراپقا ماتەريالدىق شىعىندى تولەۋگە دايىن ەكەنىن مالىمدەدى.

24 قازاندا وتكەن سوت وتىرىسىندا زارداپ شەككەن تاراپ سوتتالۋشىدان 14 ميلليون تەڭگە مولشەرىندە ماتەريالدىق شىعىن ءوندىرۋدى تالاپ ەتكەن ەدى. الايدا كەيىن مارقۇمنىڭ وتباسى ول تالاپ-ارىزدى قايتارىپ الدى.

9 قاراشادا وتكەن ءجارىسسوز بارىسىندا مەملەكەتتىك ايىپتاۋشى الىشەر بارايەۆ ايىپتالۋشى ماليكا مۇحيتوۆانى ەكى جىلعا باس بوستاندىعىنان ايىرۋدى جانە ءۇش جىل كولىك جۇرگىزۋگە تىيىم سالۋدى سۇراعۆنى بەلگىلى.

مارقۇمنىڭ اتا-اناسى قازاقستاندىقتارعا ۇندەۋ جاساپ، سوتتالۋشىنىڭ شىن وكىنگەنىنە سەنبەيتىنىن ايتتى.