باس پروكۋرور قايرات قوجامجاروۆ قاراعاندى وبلىسىندا "وحوتزووپروم" مەكەمەسىنىڭ ينسپەكتورلارىنا شابۋىل جاساۋ ءىسىن جەكە باقىلاۋىنا الدى. بۇل تۋرالى بۇگىن باس پروكۋروردىڭ ورىنباسارى اندرەي لۋكين مالىمدەدى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ.
"اتالعان فاكتى بويىنشا باس پروكۋرور وقيعانى جەكە ءوزىنىڭ باقىلاۋىنا الدى. پوليسيا دەپارتامەنتى اۋىر قىلمىس جاساعان كۇدىكتىلەردى انىقتاۋ بويىنشا جەدەل ىزدەستىرۋ شارالارىن جۇرگىزىپ جاتىر"، — دەدى لۋكين.
بۇعان قوسا، ول ءىىم ورتالىق اپپاراتىنىڭ ءبىر توپ قىزمەتكەرى جەرگىلىكتى پوليسەيلەرگە كومەك كورسەتۋ ءۇشىن قاراعاندى وبلىسىنا اتتانعانىن مالىمدەدى.
"تاياۋ ارادا قىلمىستىڭ اشىلاتىنىنا سەنىمدىمىن. كىنالى ادامدار انىقتالىپ، قاماۋعا الىنادى"، — دەدى باس پروكۋروردىڭ ورىنباسارى.
لۋكين كۇدىكتى كىم بولسا دا، قىلمىستىق جاۋاپكەرشىلىكتەن قۇتىلا المايتىنىن اتاپ ءوتتى.
"ادام ءولىمى – كەز كەلگەن جاعدايدا وتباسى ءۇشىن، اينالاسى ءۇشىن تراگەديا. باس پروكۋرور دا، ىشكى ىستەر ءمينيسترى دە اتالعان ءىستى باقىلاۋىنا العانىنا سەندىرگىم كەلەدى. كۇدىكتى كىم ەكەنىنە قاراماستان، ول قىلمىستىق جاۋاپكەرشىلىككە تارتىلىپ، قىلمىستىق كودەكسكە سايكەس جازاعا كەسىلەدى"، — دەپ سەندىردى لۋكين.
ەسكە سالا كەتسەك، 13 قاڭتاردا قاراعاندى وبلىسى نۇرا اۋدانىنىڭ اۋماعىندا براكونەرلەر "وحوتزووپروم" مەكەمەسىنىڭ ينسپەكتورلارىنا شابۋىل جاسادى. ينسپەكتورلار كۇدىك تۋعىزعان اۆتوكولىك پەن قۇجاتتاردى تەكسەرگەلى جاتقاندا، براكونەرلەر ولارعا قارسىلىق كورسەتكەن.
ەكى ينسپەكتور دا اۋىر جارالانىپ، استانا اۋرۋحاناسىنا جەتكىزىلدى. قىزمەتكەرلەردىڭ ءبىرى بىرنەشە ساعاتتان كەيىن جان تاپسىردى. ال كەشە كەشكە ەكىنشى ينسپەكتوردىڭ كوز جۇمعانى بەلگىلى بولدى.
پىكىر قالدىرۋ