ەكى جىل بۇرىن چەرنوبىل اتوم ەلەكتر ستانسياسىندا بولعانمىن. بولعاندا قالاي؟ ءتىرى جان رۇقساتسىز كىرمەيتىن تەرريتوريادا ەكى كۇن ءجۇرىپ، جارىلعان ءتورتىنشى رەاكتورعا 400 مەترگە دەيىن جاقىنداپ، 900 ميكروزيۆەرت رادياسيا جيناپ قايتقانبىز. سوندا ءبىزدى الىپ جۇرگەن جولنۇسقاۋشى قانىمىز قاتىپ قالاتىنداي نەبىر سۇمدىقتى ايتتى دەيسىڭ... ءبىراق، مىنا اڭگىمەسى ەسىمنەن ەش شىقپايدى.

چەرنوبىلدە اۆاريا بولعان ساتتە ۇلكەن باسشىلارى قاشىپ كەتەدى. تومەندەگى جۇمىسشىلار تەلەفون سوققاندا «وزدەرىڭ بىردەڭە قىلىڭدارشى»، — دەپ جاۋاپكەرشىلىكتەن تايقيدى. سودان لاۋازىمى بويىنشا ەڭ تومەن ادامدار قالادى دا، وزدەرى تاۋەكەلگە بەل بۋادى. رادياسيا بۇدان دا كوپكە تاراماس ءۇشىن قاۋىپسىزدىك نۇسقاۋلارىنا قاراماي، وزدەرىن ولىمگە قيادى. قاراڭعىدا ۋلى سۋدى بەلدەن كەشىپ ءجۇرىپ، ءبىر ترۋبانى ءبىر ترۋبادان اجىراتادى، ءورتتى سوندىرەدى. سولاردىڭ كوبىسى تىم كوپ ساۋلەلەنۋدەن قايتىس بولدى. سولاردىڭ كوبىسى وتە قاراپايىم جۇمىسشىلار ەدى دەگەن ەدى جولنۇسقاۋشى.

♦باس پروكۋرور ينسپەكتورلارعا شابۋىل جاساۋ ءىسىن ءوز باقىلاۋىنا الدى

"قاراعاندى وبلىسىندا كيىكتى قورعايمىن" دەپ كىسى قولىنان قازا تاپقان ەرلان نۇرعالييەۆ تۋرالى ەستىگەندە، وسى ەپيزود ەسىمە ءتۇسىپ كەتتى. بۇل اعامىز كەزىندە اۋىلدا ۋچاستكەلىك پوليسيا بولىپ جۇمىس ىستەپتى. تارتىپكە قاتال بولىپتى مارقۇم. 13 قاڭتاردا ەرلان نۇرعالييەۆ پەن ءپوتر نيسىك كيىكتەردى ءجون-جوسىقسىز اتىپ جاتقان براكونەرلەردىڭ ىزىنە ءتۇسىپ بەرەدى. باقايشاعىنا دەيىن قارۋلانعان جاۋىز پالەلەر اتىسادى كادىمگىدەي. ءسويتىپ، ەرلان نۇرعالييەۆ براكونەرلەردىڭ قولىنان قازا تابادى. دەنيس تەن قايتىس بولعاندا، قابىرعامىز سىنارداي قايعىرىپ ەدىك. نەگە؟ ەلىمىزدىڭ اتىن الەمگە شىعارار جۇلدىز ءسوندى دەپ جىلاعانبىز. ال ەرلان نۇرعالييەۆتى قايتىس بولعان سوڭ تانىپ جاتىرمىز. سەبەبى،  ول — «كىشكەنتاي ادام». بىلتىر قورعالجىن قورىعىنا جۋرناليستەر بارعاندا، فوتوعا وسىلاي ءتۇسىرىپ العانىنا دا راحمەت. ءبىراق، مەملەكەتتىڭ ىشكى تۇراقتىلىعى وسىنداي ادامداردىڭ ەڭبەگىنەن تۇرادى.  قالاي اتاساڭىزدار دا، ءوز ەركىڭىز.

بۇلاردى اتىپ كەتكەن جانە اتىپ كەتۋى مۇمكىن ادامدار ەرتەڭ-اق شارتتى جازاسىن الىپ، قايتادان كيىك پەن ادام اتىپ جۇرە بەرۋى مۇمكىن. ال بۇلار ماردىمسىز ايلىققا كۇندىز-تۇنى قۋ جانىن شۇبەرەككە ءتۇيىپ، جەلدىڭ وتىندە، جەردىڭ سىزىندا كيىك قاراۋىلداپ جۇرگەنى. مەدال دا المايدى، ماراپات تا بۇيىرمايدى. وسىنداي جانقيارلىقتىڭ ارقاسىندا شىعار، بىزدەگى كيىك باسىنىڭ 215 مىڭعا جەتكەنى. مارقۇمنىڭ جانى ءجانناتتان بولسىن! «حالىق قاھارمانىن» بەرسە دە، ارتىقتىق ەتپەيدى.

وركەن كەنجەبەكتىڭ فەيسبۋك پاراقشاسىنان الىنعان