قازاقستان ىشكى ىستەر ءمينيسترى قالمۇحانبەت قاسىموۆ قاراعاندى وبلىسىندا قورىقشىلارعا شابۋىلدادى دەگەن كۇدىكتىلەردىڭ انىقتالعانىن حابارلادى دەپ جازادى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ. استانادا پارلامەنت سەناتىنداعى جيىننان سوڭ جۋرناليستەر ساۋالىنا جاۋاپ بەرگەن قاسىموۆ "كۇدىكتىلەردى انىقتادىق. ول جەردە ەكى كولىك بولعان، ولار دا بەلگىلى بولدى. وقيعانى كورگەندەر دە بار" دەدى.

مينيستر كۇدىكتىلەردىڭ قىزىلوردا وبلىسىنىڭ تۇرعىندارى ەكەنىن عانا حاباردار ەتىپ، قانشا ادام ەكەنىن ايتپادى. بۇل وقيعا بويىنشا قىلمىستىق كودەكستىڭ "ادام ءولتىرۋ" بابىمەن ءىس قوزعالىپ، كۇدىكتىلەرگە ىزدەۋ جاريالانعان.

— ولار ەكى كولىكپەن جۇرگەن. قىلمىستى ءبىر كولىكتەگى ءۇش ادام جاساعان. ەكىنشى كولىكتەگىلەردى انىقتاۋ ارقىلى قىلمىس جاسادى دەگەن كۇدىكتىلەردى انىقتادىق، — دەدى قاسىموۆ.

اۋىل شارۋاشىلىعى مينيسترلىگى 15 قاڭتاردا قاراعاندى وبلىسىنىڭ نۇرا اۋدانىندا "وحوتزووپروم" رەسپۋبليكالىق مەكەمەسىنىڭ ينسپەكتورى كيىكتەر مەن سيرەك كەزدەسەتىن جانۋارلاردى قورعاۋ رەيدى كەزىندە براكونەرلەر قولىنان اۋىر جارالانىپ، قايتىس بولعانى تۋرالى اقپارات تاراتقانى بەلگىلى.

مينيسترلىكتىڭ مالىمەتىنشە، 13 قاڭتاردا كەشكە Toyota Land Cruiser كولىگىندەگى بەلگىسىز ءۇش ادام ولاردىڭ ىزىنە تۇسكەن ينسپەكتورلار نيسىك پەن نۇرعالييەۆكە قارسىلىق تانىتىپ، قارۋدان وق اتقان. ارادا ەكى ساعاتتان استام ۋاقىت وتكەندە پوليسيا مەن ينسپەكتورلار شابۋىلدان جارالانعان ينسپەكتورلاردى تاپقان. باسىنان اۋىر جارالانعان ەرلان نۇرعالييەۆ 14 قاڭتاردا استاناداعى №1 قالالىق ەمحاناعا جەتكىزىلگەن. ءبىر كۇننەن ارتىق ەس-تۇسسىز جاتقان نۇرعالييەۆ 15 قاڭتاردا قايتىس بولعان.

قاڭتار باستالعالى بەرى قاراعاندى وبلىسىندا وسىمەن ەكىنشى رەت زاڭسىز كيىك اتۋ دەرەگى تىركەلىپ وتىر. ايدىڭ باسىندا ۇلىتاۋ اۋدانىندا پوليسيانىڭ قىزمەتكەرى "زاڭسىز كيىك اۋلادى" دەگەن كۇدىكپەن ۇستالعانى بەلگىلى.

قازاقستاندا قۇرىپ كەتۋ الدىندا تۇرعان جانۋار رەتىندە قىزىل كىتاپقا ەنگىزىلگەن كيىكتى اۋلاۋعا تىيىم سالىنعان.