اتاقتى ورىس جازۋشىسى ميحايل بۋلگاكوۆتىڭ ءومىرى شىتىرمان وقيعالار مەن قۇپيا جايتتارعا تولى. ونىڭ تالانتى تالايلاردى تاڭعالدىرسا دا، كوپشىلىك ونىڭ شىعارماشىلىعىن قانداي دا ءبىر تىلسىم كۇشپەن بايلانىستىرىپ جاتادى. اسىرەسە، جازۋشىنىڭ اتىن الەمگە ايگىلى ەتكەن تىلسىم كۇشكە تولى "ماستەر مەن مارگاريتا" رومانى شىققاننان كەيىن كوپشىلىكتىڭ كۇدىگى ارتا ءتۇستى. سەبەبى، شىعارمادا ادامداردىڭ شايتاننىڭ قۇلىنا اينالۋى، ءوز سۇيىكتىسىنىڭ قايدا ەكەنىن بىلمەك بولعان ايەلدىڭ قارا كۇشپەن بايلانىسى تۋرالى شىتىرمان وقيعالار جەلىسى سۋرەتتەلەدى.  وسىعان بايلانىستى Qamshy.kz اقپارات اگەنتتىگى وقىرمان نازارىنا بۋلگاكوۆتىڭ قۇپياعا تولى ءومىرى جايلى دەرەكتەردى ۇسىنادى.

1891 جىلى دۇنيەگە كەلگەن بۋلگاكوۆ ءحىح عاسىردىڭ باسىندا تۋعان گوگولمەن قالاي "كەزدەسكەن"؟

1917 جىلى اسا اۋىر كەزەڭدە ميحايل بۋلگاكوۆ كۇل، ياعني ديفتەريا دەرتىنە شالدىعادى. ول اۋرۋدىڭ بەتىن قايتارۋعا كومەكتەسەتىن سۇيىقتىق ازىرلەپ، ەمدەلۋگە كوشەدى. سونىڭ ناتيجەسىندە جاس دارىگەردىڭ دەنەسى ءبورتىپ، اللەرگيالىق اسەر تۋادى. اۋىرسىنۋدى جەڭىلدەتۋ ءۇشىن بۋلگاكوۆ ايەلىنەن مورفيا ينەكسياسىن جاساۋدى سۇرايدى. وسىدان كەيىن ونىڭ ەسىرتكىگە تاۋەلدىلىگى پايدا بولادى.

زايىبى تاتيانا بۇل جاعدايعا قاتتى الاڭداپ، ونىڭ قولداناتىن اپيىنىن جاي تازارتىلعان سۋمەن اۋىستىرىپ قويادى.  سودان كەيىن بۋلگاكوۆ ءوزىن جايسىز سەزىنىپ، جاعدايى كۇرت ناشارلايدى. 1918 جىلدىڭ كۇزىندە توسەككە تاڭىلىپ جاتقان بۋلگاكوۆتىڭ تۇسىنە گوگول كىرگەن. ميحايل افاناسي ۇلى ءوز كۇندەلىگىندە بۇل وقيعانى بىلاي سۋرەتتەيدى: "...سول ءتۇنى بولمەگە بويى الاسا، قىر مۇرىندى، كوز جانارى وزگەشە ەر ادام كىرىپ كەلىپ، مەن جاتقان توسەككە ەڭكەيىپ، سۇق ساۋساعىن كورسەتىپ، قورقىتقانداي بولدى".

وسى تۇننەن كەيىن بۋلگاكوۆ ەسىرتكىگە تاۋەلدىلىكتەن تولىقتاي ايىعادى.

سوڭعى جازعان ءسوزى

ءتىپتى، ءولىم اۋزىندا جاتقان شاعىندا دا جازۋشى قۇپياعا تولى "ماستەر مەن مارگاريتا" رومانىن جازۋدى توقتاتپاعان. رومانداعى  سوڭعى رەت وزگەرتكەن تۇسى مارگاريتانىڭ ءسوزى ەدى: "دەمەك، جازۋشىلار اجالدىڭ سوڭىنان ەرە مە؟". وسى ءسوزىن اياقتاعان سوڭ جازۋشى كوز جۇمادى. 

جازىلعان سوزدەن وت شىقتى...

"ماستەر مەن مارگاريتا" رومانداعى بەگەموت اتتى مىسىقتىڭ "ەشتەڭە بۇلدىرمەيمىن، ەشتەڭەگە تيىسپەيمىن، تەك شامدى جوندەيمىن" دەگەن ءسوزى بارىنە تانىس بولار. بۋلگاكوۆ روماننىڭ ءدال سول تۇسىنا وزگەرتۋ ەنگىزىپ جاتقاندا، كورشى ۇيدە كەنەتتەن ءورت شىعادى. وتتى دەر كەزىندە ءوشىرىپ ۇلگەرگەننەن كەيىن، قايدان شىققانىن انىقتاماق بولعان ادامدار اس بولمەدە كادىمگى تۇرمىستىق شامنىڭ جانىپ جاتقانىن بايقاعان. ال جازۋشىنىڭ شىن مانىندە بەگەموت اتتى ءيتى بولعان. ءورتتىڭ شىعۋىنا جۇرت ايتاتىن بۋلگاكوۆتىڭ قۇپيا كۇشى اسەر ەتتى مە، الدە بەگەموت شىن مانىندە بىرنارسە ءبۇلدىردى مە؟ دەسە دە، بۇل جاعدايدى سايكەستىك دەپ باعالايتىندار دا بار. 

ميحايل بۋلگاكوۆ ماسون بولعان با؟

جازۋشىنىڭ ءومىرىن زەرتتەۋشىلەر مەن وقىرمانداردىڭ اراسىندا "بۋلگاكوۆ ماسوندىق ۇيىمنىڭ مۇشەسى بولعان" دەگەن پىكىرلەر بار. "ول ءتىپتى ءارتۇرلى جاسىرىن راسىمدەردى ورىنداپ، قۇپيا كۇشتەرگە تابىنعان بولۋى مۇمكىن"، - دەيدى كوپشىلىك.