كولۋمبيانىڭ استاناسى بوگوتا قالاسىندا جانتۇرشىگەرلىك جارىلىس بولىپ، سونىڭ سالدارىنان 20-عا جۋىق ادام قازا تاۋىپ، 60-تان اسا تۇرعىن اۋىر جاراقات الدى. قازالى وقيعا پوليسيا اكادەمياسىندا تۇلەكتەردى ماراپاتتاۋ ءراسىمى كەزىندە ورىن الدى دەپ جازادى Qamshy.kz اقپارات اگەنتتىگى Bbc.com سايتىنا سىلتەمە جاساپ.

جارىلىس جەرگىلىكتى ۋاقىتپەن تاڭعى 9:30 شاماسىندا ورىن العان. سۇر ءتۇستى Nissan Patrol ماركالى كولىك اكادەميانىڭ اۋماعىنا باسا-كوكتەپ كىرىپ، قابىرعاعا بارىپ سوعىلعان ەكەن.

57 جاستاعى كولىك جۇرگىزۋشىسى جارىلىس سالدارىنان وقيعا ورنىندا قازا تاپتى. دەرەكتەرگە سايكەس، بۇل ۋاقىتقا دەيىن  كۇدىكتى ەشقانداي قىلمىستىق جاۋاپكەرشىلىككە تارتىلماعان.

اتالمىش وقيعاعا بايلانىستى ءالى بىردە-بىر تەرروريستىك توپ  جاۋاپكەرشىلىكتى ءوز موينىنا المادى. وقيعا ورنىنا كەلىپ جەتكەن پرەزيدەنت يۆان دۋكە بۇل جاعدايدى «جانتۇرشىگەرلىك لاڭكەستىك ارەكەت» دەپ اتادى.

جارىلىستىڭ سالدارىنان جاقىن ماڭدا ورنالاسقان مەكەمەلەردىڭ تەرەزەلەرى سىنىپ، شامامەن 68 ادام جاراقات الىپتى.

باس پروكۋرور نەستورا مارتينەستىڭ ايتۋىنشا، جارىلعىش زاتتىڭ قۇرامىندا پەنتوليت بولعان. ونى كولۋمبيالىق بۇلىكشىلەر بۇرىن دا قولدانعان ەكەن.

ايتا كەتەيىك، 2016 جىلدىڭ قاراشاسىندا كولۋمبيا بيلىگى «كولۋمبيانىڭ قارۋلانعان بۇلىكشىلەر توبىمەن» كەلىسىمشارت جاساسقانى بەلگىلى.

كولۋمبيادا كوممۋنيستەر پارتياسىنىڭ قارۋلى كۇشى 1964 جىلى قۇرىلعان. سول ۋاقىتتان بەرى بۇل ەلدە ازاماتتىق سوعىس ءجۇرىپ جاتىر.