الەمدە ءارتۇرلى قۇپيا سىرعا تولى ادەبي تۋىندىلار مەن كارتينالار بارشىلىق. ولاردىڭ كەيبىرىنىڭ بويىنا بۇگىپ جاتقان سىرى جانتۇرشىگەرلىك وقيعالارمەن بايلانىستى بولسا، ەندى ءبىرى ءوز يەسىنە قارعىس اكەلەتىن تۋىندىلار رەتىندە تانىلعان. كوپشىلىك مۇنداي كۇشتىڭ بارىنا سەنسە، كەيبىرەۋلەر جاي عانا سايكەستىك دەپ قارايدى. Qamshy.kz اقپارات اگەنتتىگى وسىنداي ميستيكالىق وقيعالارعا نەگىز بولعان، ەشبىر ادامدى بەي-جاي قالدىرمايتىن اتاقتى تۋىندىلاردىڭ ءبىرى "بالانىڭ كوز جاسى" كارتيناسى جايىندا دەرەكتەر ۇسىنادى.

"بالانىڭ كوز جاسى" – يتالياندىق سۋرەتشى دجوۆانني براگوليننىڭ كارتيناسى. ول سونداي-اق، برۋنو اماديو دەگەن اتپەن دە تانىمال. ال ونىڭ تۋىندىسىنىڭ ءوز "تاعدىرى" بار. كارتيناعا كوز سالعان ادام وعان  بەي-جاي قاراي المايدى.  سەبەبى كارتيناداعى بالانىڭ كوزىنەن اققان تامشى جاس ءالى قۇرعاماعانداي اسەر قالدىرادى. بۇل كارتينانى ايگىلى ەتكەن – ونىڭ نەگىزىندە جاتقان شىنايى ءارى جانتۇرشىگەرلىك وقيعا. تەڭدەسسىز تۋىندى جاساۋدى ارمانداعان دجوۆانني براگولين بالاسىنىڭ تاعدىرىن قۇربان ەتۋگە دەيىن بارعان.

ال برۋنو اماديو ۆەنەسيا قالاسىندا دۇنيەگە كەلگەن. سۋرەت سالۋعا قۇلشىنىسى ەرتە جاسىنان-اق بايقالعان. ونىڭ كارتينالارى كۇندەلىكتى ءومىردىڭ كورىنىسىنەن الىناتىن، گۇلدەر، بالالار جانە شىنايى تاريحي وقيعالار تاقىرىبىنا نەگىزدەلگەن. الايدا، ونى ايگىلى ەتكەن تۋىندىعا حالىق اراسىندا "قارعىس اتقان كارتينا" دەگەن ات قويىلعان. "سۋرەت قانداي ۇيگە تاپ بولسا، سول ءۇيدىڭ ورتەنۋىنە سەبەپ بولادى" دەگەن نانىم قالىپتاسقان.

وتكەن عاسىردىڭ 80-جىلدارى "The Sun" باسىلىمى وقىرمانداردى كەرى بايلانىس ورناتۋ ماقساتىندا رەداكسياعا ءارتۇرلى وقيعالارمەن ءبولىسىپ، حات جازىسۋعا شاقىرادى.  4 قىركۇيەك 1985 جىلى گازەت بەتىندە ءورت ءسوندىرۋ قىزمەتىندە جۇمىس ىستەيتىن رونا پيتەر حاللدىڭ باسىنان وتكەن وقيعاسىن جازعان حاتى نەگىزىندە "Blazing Curse of the Crying Boy" دەگەن تاقىرىپپەن ماقالا جارىق كورەدى. وندا "بالانىڭ كوز جاسى" كارتيناسىنىڭ وتقا جانبايتىندىعى جايلى، ونى ساتىپ العان ادامدارعا قارعىس اكەلەتىندىگى تۋرالى ايتىلادى. باسىلىم زەرتتەۋ ناتيجەسىندە بۇل كارتينانىنىڭ قايتا باسىلىپ شىققان 50 000 داناسى ساتىلىمدا ەكەنىن انىقتايدى. ماقالا جارىق كورگەن كۇننىڭ ەرتەسىندە-اق، اتالعان كارتينادان زارداپ شەككەندەردىڭ جازعان حاتتارى رەداكسياعا اعىلا باستايدى.  ءبارىنىڭ مازمۇنى ۇقساس: كارتينانى ساتىپ العان ادامداردىڭ ۇيىندە ءورت بولادى. ءبىر تاڭقالارلىعى، "بالانىڭ كوز جاسى" كارتيناسىنا عانا وت تيمەيدى ەكەن. ءتىپتى، وقيعا ورنىنا جەتكەن ءورت سوندىرۋشىلەر دە بۇل اقپاراتتى راستاعان. مۇنان سوڭ جۋرناليستەر  ميستيكاعا تولى مۇنداي تۋىندىنىڭ استارىندا قانداي شىنايى وقيعا جاتقاندىعىن انىقتاۋعا كىرىسەدى.سويتسە...

سۋرەتشى دجوۆانني براگولين بالالار ەموسياسىن بارىنشا كورسەتەتىن شىنايى تۋىندى سالۋدى ارماندايدى ەكەن. كەزەكتى كارتيناسىنىڭ كەيىپكەرىن الىستان ىزدەمەگەن ول ءوزىنىڭ 4-5 جاس شاماسىنداعى ۇلىنىڭ بەينەسىن سالۋدى كوزدەيدى. ول دۇرىستاپ جىلاي الماعان بالانىڭ شىنايى كوز جاسىن كورسەتۋدىڭ قاتىگەزدىككە تولى جولىن تاڭدايدى. سۋرەتشى  بالاسىنىڭ تۋعاننان وتتان قاتتى قورقاتىندىعىن جاقسى بىلەتىن. شىرپىنى تۇتاتىپ، ول بالانىڭ بەتىنە ادەيى جاقىنداتىپ زارەسىن الادى. قاتتى قورىققاننان ءسابي ەڭىرەپ قويا بەرەدى. سۋرەتشىنىڭ كۇتكەنى دە وسى ەدى. قولىنا قىلقالامىن الىپ، كارتينانى سالۋعا كىرىسەدى. بالا تىنىشتالىپ، جىلاعانى باسىلعان ساتتە، بار قيالى بوياۋعا كەتكەن شەبەر قاتىگەزدىك ارەكەتىن تاعى قايتالايدى. وسىلايشا، كارتينا بىتكەنگە دەيىن بالا كوز جاسىن قۇرعاتپاعان. شوشىپ جىلاي بەرگەننەن بالانىڭ جۇيكەسىنە زيان كەلىپ، ول پسيحيكالىق اۋرۋعا شالدىعادى. اكەسىنىڭ ارەكەتىنەن قاتتى قينالعان ءسابي جىلاپ تۇرىپ: "ءوزىڭ بىرگە ورتەنىپ كەت!" دەپ قارعىس ايتادى. بالا كوپ ۇزاماي كوز جۇمادى. الايدا، ونىڭ قارعىسى دا ءوز يەسىن تابادى. تۋىندى ءۇشىن بالاسىنىڭ ءومىرىن قۇربان ەتكەن دجوۆانني براگوليننىڭ ۇيىنەن وت شىعىپ، ءوزى دە بىرگە ورتەنىپ كۇلگە اينالادى. ءورتتى سوندىرگەننەن كەيىن كۇلدىڭ اراسىنان ەش جەرى بۇلىنبەگەن الگى كارتينا تابىلادى. سۋرەتشى قايتىس بولعانعا دەيىن جاقىن دوسىنا كارتينانى قانداي جاعدايدا سالعانىن بايانداپ بەرگەن ەكەن. قىسقاسى، ءسابيدىڭ كوز جاسىنا تۇنعان كارتيناعا ودان كەيىن دە ەشقانداي ءورت تيمەيتىن بولعان. ءتىپتى، كوشىرمەلەرىنىڭ وزىندە دە بالانىڭ كوز جاسى جىبەرمەيتىن قارعىس بار ەكەن. كارتيناعا كوز جۇگىرتسەك، پەرىشتەنىڭ بەينەسىنەن قاتىگەزدىككە تولى تاعدىرىن وقىعانداي بولاسىڭ. سونىمەن قاتار، بۇل الەمگە مەيىرىم مەن قايىرىمدىلىقتىق دا قانشالىقتى كەرەك ەكەنىن دە تۇسىنەسىڭ...