جاستار جىلى جاريالاندى. بايقايمىن، بيىل جاس بولعىسى كەلىپ جۇرگەندەر كوپ. "كىم بىلەدى، ناۋقانشىلدىقپەن الدەقانداي ءبىر جاردەمگە نە قىزمەتكە، تىم بولماعاندا، ماراپاتقا يە بولىپ قالام با؟" دەگەن «مىسىق دامە» شىعار. ءبىر تانىسىم «جاس دەپ كىمدى ايتامىز؟» دەپ قالدى. ەندى بىرەۋى «جاسىم 42-دە، ءالى جاس شىعارمىن» دەپ قۋاقىلانا كوزىن قىستى. ماعان سالسا، قىلشىلدىعان 40-قا دەيىنگىلەردىڭ ءبارىن دە جاس دەر ەدىم. ءبىراق، ولاي ەمەس قوي. زاڭعا جۇگىنەيىك. قازاقستان رەسپۋبليكاسىنىڭ پرەزيدەنتى 2015 جىلعى 9 اقپاندا بەكىتكەن «مەملەكەتتىك جاستار ساياساتى تۋرالى» زاڭىنىڭ 1-بابى 3-تارماعىندا «جاستار – قازاقستان رەسپۋبليكاسىنىڭ 14 جاستان 29 جاسقا دەيiنگi ازاماتتارى» دەپ تايعا تاڭبا باسقانداي جازىلعان. وسى زاڭدا «ەرلi-زايىپتىلاردىڭ ەكەۋi دە 29 جاسقا تولماسا» جاس وتباسى، «29 جاسقا تولماعان، تەحنيكالىق جانە كاسىپتىك، ورتا بىلىمنەن كەيىنگى، جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىندا ءبىلىم بەرەتىن وقۋ باعدارلامالارىن مەڭگەرگەن جانە ءبىلىم تۋرالى قۇجاتتا كورسەتىلگەن ماماندىق بويىنشا ءۇش جىلدان اسپايتىن ۋاقىت جۇمىس ىستەپ جۇرگەن قازاقستان رەسپۋبليكاسىنىڭ ازاماتىن» جاس مامان دەپ تۇسىندىرىلگەن. ەندەشە، «جاس» دەپ 14-29 جاس ارالىعىنداعى ءىنى-قارىنداستارىمىزدى ايتادى ەكەنبىز. كەيبىر دەرەكتەرگە سۇيەنسەك، مۇنداي جاستار جالپى حالىقتىڭ 30 پايىزىن قۇرايتىن سىڭايلى. كەشەگى، الىمجەتتىككە عانا ورەسى جەتىپ، ءوز قۇرداسىنا جۇدىرىق الا جۇگىرگەن مەكتەپ وقۋشىلارى دا ءبىز جاس دەپ قابىلداپ وتىرعان – 13-14 جاستاعى جاسوسپىرىمدەر! وكىنىشتى...
ماسەلەن، ەگيپەتتىك موزاييا بريدجەس 13 جاسىندا-اق كوبەلەك-گالستۋك بيزنەسىن جولعا قويىپ، قارجى اينالىمىن 200 مىڭ دوللارعا (55 ملن 600 مىڭ تگ) جەتكىزگەن. سول سياقتى يسپاندىق اسيما سيراسي 14 جاسىندا يسپانياداعى تىك جارتاستى Open Your Mind شىڭىن باعىندىرعان. ال امەريكالىق 14 جاسار احمەد موحامەدتى ۇيقىاشار ساعات ويلاپ تاپقانى ءۇشىن باراكا وبامانىڭ ءوزى جەكە قابىلداۋىنا شاقىرعان. دجەيدەن سميت 17 جاسىندا دجەكي چانمەن بىرگە «كاراتە-پاسان» فيلمىنە ءتۇسىپ، سومداعان ءرولى ءۇشىن 5 ملن دوللار قالاماقى السا، ءقازىر ونىڭ جەكە ەسەپشوتىندا 14 ملن كوك قاعاز جاتىر. قازاقتى الەمگە تانىتقان ديماش قۇدايبەرگەن «سلاۆيان بازارىندا» گران-پريدى ۇتىپ العان كەزدە نەبارى 21 جاستا بولاتىن. بەكزات 20 جاسىندا-اق وليمپيادا چەمپيونى اتاندى. جاستاردىڭ ىنتا-جىگەرىنە، قابىلەتىنە قاتىستى ايتا بەرسەك، مۇنداي مىسالدار كوپ.
قانە، 14 جاس پەن 29 جاس ارالىعىنداعى زامانداستارىم، ءبىز بيىكتەردى باعىندىرۋعا، جاڭالىق اشۋعا، ەلىمىزدى وركەندەتۋگە، قۇربى-دوستارىمىزدى ماڭىزدى ىستەرگە جۇمىلدىرۋعا دايىنبىز با!؟ جوق، الدە، ۇلكەندەر جاعى ازىرلەپ بەرگەن ناۋقانشىل شارالاردان اسا الماي، جالتاقتىقپەن جىل وتكىزەمىز بە؟
بەكجىگىت سەردالى، Facebook پاراقشاسىنان
پىكىر قالدىرۋ