كوپتەن بەرى كوكەيىمدە ءجۇر ەدى. «بۇل ءوزى ءبىزدىڭ قازاقتىڭ قانىندا بار. بولسىن دەمەيمىز، ەتەكتەن تارتامىز. ديماشقا مۇلدەم قاتىسى بولماسا دا اۋزىنا كەلگەندى ايتىپ جاتىر. ال وعان قارا حالىق «بەتكە ايتتى» دەپ قول سوعادى. كەيبىرەۋ ونىڭ ءسوزىن دە ءتۇسىنىپ جاتقان جوق. «ريناتقا ونداي ءسوز ايتۋ ۇيات!» دەپ جازدى بەلگىلى ءانشى مايرا ءىلياسوۆا. مۇنىسى، ديماشتى سىنعا العان رينات زايىتوۆتى «دىحالكادان» ءبىر ۇرعانداي بولدى، مەنىڭ  دە دەلەبەم قوزىپ كەتتى.

شىنىندا «بوياۋشى، بوياۋشى دەگەنگە ساقالىن دا بوياپتى» دەگەندەي ايتىسكەر اقىن كىم؟ الەمگە ايگىلى ديماش قۇدايبەرگەن كىم؟  اراسى جەر مەن كوكتەي عوي. بيلىككە قارسى شىندىقتى شىرىلداپ ايتىپ جۇرگەنى جاقسى، وندا دا، قىزدى-قىزدىمەن قيا شاۋىپ كەتەتىن تۇستارى دا جەتىرلىك.  جارايدى، بەتكە ايتىپ، بەتىڭدى «جىرتا سالاتىنداي» جىلدام اۋىز ەكەنىن ەسكەرسەك تە، وزىنە ءۇش قايناسا سورپاسى قوسىلمايتىن ، ءبىلىمى جەتپەيتىن جاعدايلاردىڭ جاعاسىنا جارماسىپ، وزىنشە كىرپياز پىكىرلەردى لاق ەتكىزە سالاتىن مىنەزىن تۇسىنە المايدى ەكەنمىن.  كەزىندە «شىڭعىرعاننىڭ ءبارى ءانشى ەمەس» دەپ ىقىلىق اتقانىن كەشىردىك، ال ەندى كەلىپ  «تالقىلايىق» باعدارلاماسىنا سۇحبات بەرگەندە: «ديماش جۇڭگو ساياساتىنىڭ قۇربانى» دەگەنى قاي ساسقانى؟ «تالانت پەن ۇلتقا قىزمەت ەتەتىن ادامدى اجىراتا ءبىلۋ كەرەك. ەكەۋى مۇلدە ەكى بولەك. مەن ديماشتى «سەندەي انشىلەردەن قورقامىن» دەپ سىناعاندا، ءبىزدىڭ جاستاردىڭ ونىڭ سوڭىنان ەرەتىنىن ءبىلدىم. ال ديماشتىڭ قازىرگى وبرازىن كىم قالىپتاستىردى؟ قاي ۇلت قالىپتاستىردى؟ جۇڭگو قالىپتاستىردى ما؟ ولار ءبىزدىڭ بالانى بىزگە قارسى پايدالانىپ جاتىر. مەن وسىلاي بولاتىنىن بىلگەنمىن» دەپ ساۋەگەيلىك تانىتقانىن تۇسىنە الماي ءجۇرمىن."بىزگە قارسى پايدالانىپ جاتسا"، دالەلدەرى قايسى؟  سونشاما ديماشتىڭ سوڭىنا ءتۇسىپ الاتىنداي، ول نە ىستەپ قويدى ەكەن؟ الدە، ونەردەگى قىزعانىش پا؟ قول سوعىپ، قۋانۋدىڭ ورىنىنا سىيمايتىن باسىن ءار جەرگە تىعا بەرەدى كەلىپ!  ال نەگە رينات ءىنىم تىرجالاڭاش شەشىنىپ، ساۋكەلەمىزدى  ماسقارالاعان شىرىن  دەگەن  بىرەۋدىڭ سوڭىنا شام الىپ تۇسپەيدى؟ حالىقتىڭ ساۋابىن الار ەدى عوي؟ نەگە كەۋدەسىن ماقتان تۇتىپ، حالىققا كورسەتە بەرەتىن بايزاقوۆا تۋرالى  ءبىر اۋىز ءسوز ايتا المايدى؟ الدە، وقىمادىم با؟

ديماش قۇدايبەرگەن قازاقتىڭ باعى، ونىڭ كەمشىلىگىن جاسىرىپ، جاقسى جاعىن اسىرۋىمىز كەرەك. «ديماش الدىمەن ءوزىن قازاققا تانىتتى. ال جۇڭگو مەن رەسەيدىڭ، انگليانىڭ جاساعان جارناماسىنا ءبىزدىڭ شاشىمىز جەتپەيدى. قازاق قازاقتى مويىنداۋ ءۇشىن قىتايدى مويىنداتۋى كەرەك بولدى دەگەن پىكىرمەن تۇبەگەيلى كەلىسپەيمىن" ، - دەپ قولداعان مايرا ءىلياسوۆانىڭ پىكىرىنە مەن دە قوسىلامىن.

مۇحتار شەرىم،

جازۋشى-سىقاقشى