مادەنيەت جانە سپورت مينيسترلىگى ۇلتتىق ارحيۆ جانە سيرەك كىتاپتار مەن قولجازبالار ورتالىعى جانىنان «ارحيۆ-2025» عىلىمي-ادىستەمەلىك ورتالىعىن قۇردى. ونىڭ باسشىسى بولىپ مادەنيەت جانە سپورت ءمينيسترىنىڭ شتاتتان تىس كەڭەسشىسى بەرىك ءابدىعالي ۇلى تاعايىندالدى.

ورتالىقتىڭ ماقساتى – ەلباسىنىڭ «ۇلى دالانىڭ جەتى قىرى» ماقالاسىندا ايتىلعان «ارحيۆ-2025» باعدارلاماسىن ىسكە اسىرۋ بويىنشا ۇيلەستىرۋ جانە ادىستەمەلىك جۇمىستارىن جۇرگىزۋ، مەملەكەتتىك ورگاندارمەن، ارحيۆتەرمەن، ۋنيۆەرسيتەتتەرمەن، ينستيتۋتتارمەن، عىلىمي قاۋىمداستىقپەن بىرگە ۇلتتىق تاريحتى تەرەڭىنەن تۇتاس قاراۋعا مۇمكىندىك بەرەتىن وتاندىق جانە حالىقارالىق ارحيۆتەردىڭ قۇجاتتارى نەگىزىندە عىلىمي زەرتتەۋ جۇمىستارىن ۇيىمداستىرۋ.

مىندەتتەرى – ەلىمىزدىڭ ارحيۆتەرى مەن عالىمداردىڭ شەتەلدەن اكەلگەن ارحيۆ قۇجاتتارىن ينۆەنتاريزاسيالاۋ؛ قايتارىلعان ارحيۆتىك قۇجاتتاردىڭ ءبىرىڭعاي بازاسىن قۇرۋ؛ «ارحيۆ-2025» باعدارلاماسى شەڭبەرىندە ءىس-شارالاردى جۇزەگە اسىرۋ بويىنشا شەتەل ارحيۆتەرىمەن ءوزارا ىنتىماقتاستىق مەحانيزمىن قۇرۋ، ۆەدومستۆوارالىق ۇيلەستىرۋ جانە بارلىق دەڭگەيدەگى مەملەكەتتىك ورگاندارمەن جانە عىلىمي قاۋىمداستىقپەن بىرلەسىپ جۇمىس جۇرگىزۋ.

سونىمەن قاتار ورتالىق وتاندىق جانە شەتەلدىك ءىرى ارحيۆتەرمەن جۇيەلى جانە ۇزاق مەرزىمدى ءوزارا ىنتىماقتاستىق بويىنشا تاريحشىلاردىڭ، عالىمداردىڭ، ارحيۆيستەردىڭ ارنايى توپتارىنىڭ ىزدەستىرۋ-زەرتتەۋ جۇمىستارىنا ادىستەمەلىك قولداۋ كورسەتەدى.

جالپى «ارحيۆ-2025» باعدارلاماسى اياسىندا ارحيۆ ماتەريالدارىن انىقتاۋ، جيناۋ، جۇيەلەۋ، جاريالاۋ؛ قايتارىلعان ارحيۆتىك قۇجاتتاردى سيفرلىق فورماتقا اينالدىرۋ؛ ىزدەۋ جانە زەرتتەۋ جۇمىستارىنىڭ ماتەريالدارى نەگىزىندە كىتاپتار، انىقتامالىقتار، جيناقتار، كاتالوگتار شىعارۋ جۇمىستارى جوسپارلانعان.

«ارحيۆ-2025» شەڭبەرىندە جوبالىق جۇمىستار، عىلىمي زەرتتەۋلەر ۋنيۆەرسيتەتتەرمەن، زەرتتەۋ ورتالىقتارىمەن، جەرگىلىكتى اتقارۋشى ورگاندارمەن بىرلەسە وتىرىپ، ۆەدومستۆوارالىق جانە حالىقارالىق ىنتىماقتاستىق بويىنشا كەزەڭ-كەزەڭمەن جۇزەگە اسىرىلادى.

اعىمداعى جىلدىڭ 16 قاڭتارىندا قازاقستان رەسپۋبليكاسىنىڭ ۇلتتىق ارحيۆىندە عىلىمي قاۋىمداستىقتىڭ جانە ارحيۆيستەردىڭ ۇسىنىستارىن زەردەلەۋ ماقساتىندا ق ر مكك جانە ق ر بعم العاشقى بىرلەسكەن وتىرىسى عالىمدار مەن ارحيۆ سالاسىنىڭ قىزمەتكەرلەرىنىڭ قاتىسۋىمەن دوڭگەلەك ۇستەل فورماتىندا ءوتتى.

عىلىمي قاۋىمداستىقتىڭ جانە ارحيۆيستەردىڭ كەڭەس بەرۋ سيپاتىنداعى وسىنداي كەزدەسۋلەرى ەلىمىزدىڭ بارلىق وڭىرلەرىندە وتكىزىلەدى. جاقىن ارادا ول ل.ن.گۋميليەۆ اتىنداعى ەۇۋ-دە جانە الماتى قالاسىندا وتەدى.