بۇگىن ابزالعا "U.S. Consulate Aimaty" اقش باس كونسۋلى ەريك مايەر كوڭىل ايتۋ جەدەلحاتىن جولداپتى. بالاپانىن جوعالتقان ابزال كونسۋلعا دەگەن شەكسىز ريزاشىلىعىن ءبىلدىرىپ، ماعان بىلاي دەپتى:
"ساۋلە، قاراشى، اقش-تىڭ باس كونسۋلى كوڭىل ايتۋ جەدەلحاتىن جولداپتى... مەن ءتىپتى، ريزا بولىپ وتىرمىن... بۇلاردىڭ ادامگەرشىلىگىندە شەك جوق قوي". 

— قالالىق، وبلىستىق، رەسپۋبليكالىق دەڭگەيدەگى اكىم-قارالاردان كەلىپ، كەلمەسە دە، كوڭىل ايتىپ، وسىنداي جەدەلحات جولداعاندار بولدى ما دەسەم، "جوق" دەيدى...

سونى وقىپ وتىرىپ ويعا قالدىم...

ءبىزدىڭ حالىقارالىق دەڭگەيدەگى دەمەي-اق قويايىن، اۋداندىق، قالالىق، وبلىستىق، ءتىپتى رەسپۋبليكالىق دەڭگەيدەگى "اقىلدى" اكىم-قارالاردىڭ وسىنداي اۋىر قازاعا كوڭىل ايتۋعا دا ميلارى، ادامگەرشىلىكتەرى جەتپەيدى عوي...

ايتپەسە ءاربىر قادامىن جارنامالاۋعا قۇمار اكىم-قارالار وسىندايدا ادامگەرشىلىك تانىتسا، كۇندەلىكتى جارناماسىنان ءجۇز ەسە ارتىق ادامي قادام بولماس پا ەدى؟!

بقو اكىمىنىڭ نەمەسە ورال قالاسى اكىمىنىڭ كىپ-كىشكەنتاي پەرىشتەنىڭ قازاسىنا قابىرعالارى قايىسپاۋىن ءوز باسىم، ەش تۇسىنە الار ەمەسپىن... ابزالداي ابزال ازاماتتارىن ماقتان تۇتا بىلمەيتىن، ەل الدىندا جۇرگەن، حالىقتىڭ ماحابباتىنا بولەنگەن جەرلەستەرىنە ەكى اۋىز كوڭىل ايتا بىلمەيتىن قانداي ادامدار؟ ءبىر اۋىز جەدەلحات جولداپ، كوڭىلدەرىن بىلدىرسە، تاعىنان ءتۇسىپ قالماس ەدى عوي... ودان پەرىشتەمىز ءتىرىلىپ كەلمەيدى، ارينە، ءبىراق ادامنىڭ ادامشىلىعى وسىندايدا كورىنىپ، كوڭىل دەگەن وسىندايدا بىلىنەدى ەمەس پە؟! ءتىپتى، ۇيىنە كەلىپ كوڭىل ايتسا دا قانداي جاراسىمدى ءارى ادامگەرشىلىكتى بولار ەدى...

ءبارىمىز سىنايتىن، اسىرەسە مەن كوپ سىنايتىن مينيستر ارىستانبەك مۇحامەدي ۇلى مۇنداي ماسەلەدە اينالايىن ەكەن، بىلتىر بالام قايتقاندا باسپا ءسوز قىزمەتىنەن ايدار قىرىقباي  "باستىق جىبەردى، سىزگە سالەم ايتتى، كوڭىل ايتۋىن جولدادى" دەپ كەلىپ كەتكەن. سودان بەرى ول ءمينيستردى بۇرىنعىداي ونشا كوپ سىنامايتىن بولدىم...

ءاي، اكىم-قارالار-اي... قاراپايىم عانا ادامشىلىققا نە وزدەرىڭنىڭ ميلارىڭ جەتپەيدى، نە كومەكشىلەرىڭنىڭ، نە باسپا ءسوز حاتشىلارىڭنىڭ ميلارى، ادامگەرشىلىكتەرى جەتپەيدى. بۇكىل قازاق دالاسىن كۇڭىرەنتكەن قازا تۋرالى سىزدەر ەستىمەي قالدى دەپ ويلامايمىن. 

ال بۇگىن ءبىزدىڭ قولىمىزدان كەلگەنى - جەتى شەلپەگىمىزدى ءپىسىرىپ، ايعانايدىڭ رۋحىنا قۇران باعىشتاۋ...

ساۋلە ءابىلداحان قىزىنىڭ فەيسبۋك پاراقشاسىنان الىنعان

ۇسىنعان: اسەل بولات قىزى