ەربولات قاسىموۆ، «ق ر پرەزيدەنتىنىڭ «قازاقستان – 2050» ستراتەگيالىق باعدارلاماسىن قولداۋ» قوعامدىق قورىنىڭ پرەزيدەنتى، الماتى قالالىق ءماسليحاتىنىڭ دەپۋتاتى:

            كەشە ەلباسى نۇرسۇلتان ءابىش ۇلى نازاربايەۆ جاستار جىلىنىڭ سالتاناتتى اشىلۋ جيىنىندا  قازاقستاننىڭ بولاشاعىن جاستارعا سەنىپ تاپسىرۋعا بولاتىنىن ايتتى. جالپى، قاشان دا ءبىزدىڭ پرەزيدەنت بارلىق جولداۋىندا، باعدارلامالىق ماقالالارىندا جاستارعا سەنىم، ءۇمىت ارتا سويلەۋدەن جالىققان ەمەس. مەن دە وكشەمىزدەن كەلە جاتقان ءىنى-قارىنداستارىما سەنەمىن، ولاردىڭ ىستەپ جاتقان ۇلكەن تىرلىكتەرىنە قاراپ سۇيسىنەمىن. سول جاستار ءبىزدىڭ مەملەكەتتى جاقىن بولاشاقتا الدىڭعى قاتارلى وزىق 30 ەلدىڭ قاتارىنا قوساتىنىنا دا سەنەمىن. ول ءۇشىن ءبىزدىڭ تاراپتان، ارينە، كومەك، قولداۋ اۋاداي قاجەت.

         مەن كاسىپكەر رەتىندە دە، ءوز ەلىمنىڭ پاتريوت ۇلى رەتىندە دە جاستاردىڭ ءبىلىمدى، سەرگەك، ويلى بولعانىن قالايمىن. سول ءۇشىن الماتىداعى كولەمى 1000 شارشى مەتردەن اسىپ جىعىلاتىن جامبىل اتىنداعى جاسوسپىرىمدەر كىتاپحاناسىن التى ايدىڭ ىشىندە زاماناۋي ۇلگىدە جوندەپ، جابدىقتاپ بەردىك. 145 ملن. تەڭگەدەن استام قاراجات قۇيىلعان بۇل كىتاپحاناعا بۇعان دەيىن كۇنىنە 100-گە جۋىق ادام كەلگەن بولسا، قازىرگى تاڭدا ولاردىڭ سانى بىردەن 5-6 ەسەگە ارتقان.

         قابىرعالارى ءوزىمىزدىڭ ۇلى ابايدىڭ، جامبىل بابامىزدىڭ، مۇحتار اۋەزوۆتىڭ، تاعى باسقا دا قازاق زيالىلارىنىڭ ناقىل سوزدەرىمەن ورنەكتەلگەن كىتاپحانا بۇگىندە قالانىڭ ايناسى دەسەك تە بولادى. ارينە، ءقازىر ۇلكەن-كىشىنىڭ ءبارىنىڭ قولىندا ۇيالى تەلەفون بار. ىزدەگەن اقپاراتىن الىسقا ۇزاماي-اق ۇيدە وتىرىپ عالامتورعا كىرە بەرسە بولادى. ال سول ادام ۇيىندە جالعىزدان-جالعىز قامالىپ وتىرماي، سىرتقا شىعىپ، كىتاپحاناعا كەلەتىن بولسا، جان-جاعىنا ءۇڭىلىپ، ەكىنشى بىرەۋمەن وي قوسىپ، پىكىر جارىستىرىپ، كىتاپتان العان-تۇيگەنىن، بىلگەنىن وزگەلەرمەن ءبولىسىپ جاتسا، وندا ءبىزدىڭ ماقساتىمىزعا جەتكەنىمىز.

         مەن دەپۋتات بولىپ سايلانعان ايماقتا التى مەكتەپ بار ەكەن، ءبارىن دە ارالاپ شىقتىم، ديرەكتورلارىمەن سويلەستىم، ءبىرىنشى كەزەكتە نە قاجەت ەكەندىگىن سۇراپ ءبىلدىم. ءبارى دە ءبىر اۋىزدان مەكتەپ اۋلاسىنا سپورت الاڭدارى كەرەك ەكەندىگىن ايتقان بولاتىن. ارينە، التى مەكتەپكە تۇگەل ءبىر مەزەتتە سپورت كەشەندەرىن سالىپ بەرۋ مۇمكىن ەمەس. سوندىقتان مەكتەپ ديرەكتورلارىن، اۋداندىق ءبىلىم ءبولىمى باسشىلارىن، «نۇر وتان» وكىلدەرىنىڭ باسىن قوسىپ، الداعى ۇبت-دان ەڭ جوعارى بالل جيناعان مەكتەپكە سپورت كەشەنىن سالىپ بەرەمىز دەگەن شەشىمگە كەلگەن بولاتىنبىز. ءسويتىپ بۇل تالاپ بويىنشا №126 مەكتەپ-ليسەيدىڭ باعى جانىپ، قازىرگى ۋاقىتتا وسى ءبىلىم وشاعىنىڭ اۋلاسىنا ەكى ۇلكەن الاڭ سالۋ جۇمىستارى قارقىندى ءجۇرىپ جاتىر. ءبىرى – فۋتبول، ەكىنشىسى باسكەتبول الاڭى بولماق. بۇل ءىرى جوبانى الدىمىزداعى كوكتەمدە بىتىرەمىز دەپ وتىرمىز.

         ايتپاقشى، بۇل ءبىز سالعان ءۇشىنشى سپورت الاڭى. ونىڭ الدىندا شاھارداعى ك.بايسەيىتوۆا اتىنداعى دارىندى بالالارعا ارنالعان مۋزىكا مەكتەبىنىڭ فۋتبول جانە باسكەتبول الاڭدارىن بىرىكتىرگەن، ەۋروپالىق تالاپتارعا جاۋاپ بەرەتىن ۇلكەن كەشەن سالىپ بەردىك. ءبىز «مىنەكەي، سپورت كەشەندەرىڭىزدى سالىپ بەردىك، بولدى، ەندى ارى قاراي نە ىستەسەڭىزدەر دە ءوز ەرىكتەرىڭىزدە» دەپ قاراپ وتىرمايمىز. الماتىداعى ءار اۋداندا 30 مەكتەپتەن بولسا، كەلەشەكتە سولاردان 30 كوماندا جاساقتاساق، بۇل دەگەنىڭىز ۇلكەن كۇش. ءسويتىپ فۋتبولدان، باسكەتبولدان مەكتەپارالىق، اۋدانارالىق جارىستار، تۋرنيرلەر ۇيىمداستىرىپ، ونىڭ بارلىق شىعىنىن ءوزىمىز كوتەرىپ وتىرساق، ول دا بولسا بۇگىنگى ۇرپاعىمىزدىڭ ويلى، بويلى ازامات بولىپ وسۋىنە قوسقان ۇلەسىمىز بولار ەدى. بالكىم، سول جەتكىنشەكتەردىڭ اراسىنان بولاشاقتا تاۋەلسىز ەلىمىزدىڭ تەمىردەي مىعىم قازىعى بولار جالىندى جاستار ءوسىپ شىعار. مەن جاقسى كۇندەردەن ءۇمىتتىمىن.