ەۋرازيالىق ەكونوميكالىق وداقتىڭ ءبىرىڭعاي ۆاليۋتاسىن قۇرۋ ماسەلەسى كۇن تارتىبىندە جوق.

ەۋرازيالىق ەكونوميكالىق وداق (ەاەو) جانە رەسەي مەن بەلارۋستىڭ وداقتىق مەملەكەتى ءۇشىن ءبىرىڭعاي ۆاليۋتا ەنگىزۋ ماسەلەسى ءقازىر قاراستىرىلىپ جاتقان جوق. بۇل تۋرالى رەسەيدىڭ ەكونوميكالىق دامۋ ۆيسە-مينيسترى دميتريي ۆولۆاچ مالىمدەدى.

سوڭعى 3 جىلدا ۇلتتىق ۆاليۋتالاردى پايدالانۋ تاجىريبەسىن كۇشەيتتىك، بۇل ءوسىپ كەلە جاتقان تاۋار اينالىمىنا جاقسى. بۇل ەاەو-عا دا، بەلارۋسقا دا قاتىستى جاعداي. ءبىز ەسەپ ايىرىسۋدىڭ جاڭا، سەنىمدى، قورعالعان ءارى ۇزدىكسىز جۇمىس ىستەيتىن تەتىكتەرىن جاسادىق. ءوزارا وپەراسيالاردى كوبەيتىپ، بارلىق ۇلتتىق ۆاليۋتالاردى ءبىزدىڭ ۆاليۋتالىق بيرجاعا قوستىق، – دەپ ءتۇسىندىردى ۆولۆاچ.

ونىڭ ايتۋىنشا، جاڭا نەمەسە ءبىرىڭعاي ۆاليۋتا ەنگىزۋگە سۇرانىس جوق، ويتكەنى تاۋار اينالىمىن ۇلتتىق ۆاليۋتالار ءتيىمدى قامتاماسىز ەتىپ وتىر. 

قازىرگى تاڭدا ەاەو ىشىندەگى ەسەپ ايىرىسۋدىڭ 90%-دان استامى، ال وداقتىق مەملەكەت اياسىنداعى ەسەپ ايىرىسۋلاردىڭ 95%-دان استامى ۇلتتىق ۆاليۋتالاردا جۇرگىزىلەدى.