اقش پوليسياسى قازاقستان ازاماتىن الاياقتىق جاسادى دەگەن كۇدىكپەن ۇستادى دەپ جازادى Qamshy.kz اقپارات اگەنتتىگى ktk.kz سايتىنىڭ دەرەگىن نەگىزگە الىپ.

24 جاستاعى ماحاببات ابدۋالييەۆا ءوزىن ريەلتور رەتىندە تانىستىرىپ، نيۋ-يوركتە پاتەر جالداۋعا كومەكتەسەمىن دەپ بىرنەشە ادامنىڭ اقشاسىن جىمقىرىپ كەتكەن.

اقش اقپارات قۇرالدارىنىڭ مالىمدەۋىنشە، ماحاببات 24 قاڭتار كۇنى ۇستالعان. ونىمەن بىرگە تاعى ءبىر ەر ادامنىڭ كۇدىككە ىلىنگەنى ايتىلادى. ءبىراق، ول ءالى تابىلماعان. 

دەرەك كوزدەرگە سۇيەنسەك، جەرلەسىمىز الەۋمەتتىك جەلىدە ءوزىن جىلجىمايتىن مۇلىك ريەلتورى، ياعني، جالعا بەرىلەتىن پاتەر تاۋىپ بەرۋمەن اينالىساتىن ادام رەتىندە تانىستىرعان. ءسويتىپ، بىلتىر جۇرتتان الدىن الا تولەم رەتىندە اقشا الىپ، تاقىرعا وتىرعىزىپتى. كليەنتتەردەن 200 بەن 700 دوللار ارالىعىندا الىپ وتىرعان دەيدى.

ءوزىنىڭ الەۋمەتتىك جەلىدەگى پاراقشاسىندا استانادان ەكەنى، اقش پەن مالايزيانىڭ مىقتى جوعارى وقۋ ورىندارىن بىتىرگەنىن جازىپ قويىپتى. قالعان مالىمەتتەردىڭ انىق-قانىعىن قازاقستاننىڭ نيۋ-يوركتەگى كونسۋلدىعى انىقتاپ جاتىر.

ۇسىنعان: اسەل بولات قىزى