دەپۋتات وڭىرلەردەگى سالىق ورگاندارى عيماراتتارىن كەڭەيتىپ، سالىق تولەۋشىلەردى قابىلدايتىن بولمەلەر جاساۋمەن الەك بولىپ جۇرگەنىن ايتتى.
ءماجىلىس دەپۋتاتى ومارحان وكسىكبايەۆ جاۋاپتى ادامداردان قارجى مينيسترلىگىنە سيفرلاندىرۋعا بولىنگەن قارجىنىڭ قايدا جۇمسالعانىن سۇراۋدى ۇسىندى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ.
دەپۋتاتتىڭ ايتۋىنشا، قارجى مينيسترلىگىنە سيفرلاندىرۋ ءۇشىن مەملەكەتتەن وراسان زور قارجى بولىنگەن. الايدا اتقارىلماعان ءىس ءالى دە كوپ.
"1999 جىلدان 2018 جىلعا دەيىن قارجى مينيسترلىگىنە، ونىڭ كەدەن، قازىناشىلىق، سالىق ورگاندارىن سيفرلاندىرۋ ءۇشىن رەسپۋبليكالىق بيۋدجەتتىڭ عانا وزىنەن 78،5 ميلليارد تەڭگە بولىنگەن. ونى دوللارعا شاققاندا جارتى ميلليارد دوللار. بۇل اقشاعا اۆتوماتتاندىرۋدى عانا ەمەس، باسقا دا العى شەپتىڭ بارلىعىن ەنگىزۋگە بولاتىن شىعار دەپ ويلايمىن. ال بۇگىن ءمينيستردىڭ سوزىنە قاراعاندا ىستەلمەگەن جۇمىس ءالى باستان اسادى. سوندا وسى اقشانىڭ ءبارى قايدا كەتتى؟ نە ەنگىزدىك سوندا؟ بۇگىنگى باياندالعان وسى دەڭگەي سول قارجىعا تۇرارلىق دۇنيە مە؟"، — دەپ اشۋلاندى وكسىكبايەۆ ماجىلىستەگى ۇكىمەت ساعاتىندا.
ماجىلىسمەن مەملەكەتتەن بولىنگەن قارجىنىڭ قايدا جۇمسالعانىن تەكسەرۋدى ۇسىندى.
"وسىنى تەكسەرەتىن كەز كەلگەن سياقتى. جاۋاپتى ادامداردان جاۋابىن سۇراۋىمىز كەرەك"، — دەدى ول.
دەپۋتات وڭىرلەرگە ساپارمەن بارعان كەزدە، سالىق ورگاندارىنىڭ عيماراتتى كەڭەيتىپ، سالىق تولەۋشىلەردى قابىلدايتىن بولمەلەر جاساۋمەن الەك بولىپ جۇرگەنىن ايتتى.
"اينالايىن-اۋ، دامىعان مەملەكەتتەردە سالىق تولەۋشى سالىق ورگانىنىڭ قايدا ەكەنىن بىلمەيدى. سالىق ورگانىنىڭ ەسىگىن اشپايدى دا، ءبىز سوعان ۇمتىلۋىمىز كەرەك. سوعان جەتۋىمىز كەرەك. نەگە ءبىز عيماراتتى كەڭەيتىپ، ازاماتتاردى قابىلدايتىن ورگان جاسايمىز؟ ول ورىننىڭ كەرەگى دە جوق، سالىق تولەۋشى مەن سالىق ورگانىنىڭ قارىم-قاتىناسى ەلەكتروندى جۇيەدە، قاشىقتىقتا جۇزەگە اسىرىلۋى كەرەك"، — دەيدى وكسىكبايەۆ.
ول ەسىل اۋدانىنىڭ سالىق ورگانىنا بارعان كەزدە، ءوزى كۋا بولعان كورىنىستى بايانداپ بەردى.
"سالىق تولەۋشىلەردىڭ سالىق ورگانىندا قارا تەر بولىپ جۇگىرىپ، ەسەپ بەرەتىن ۋاقىتىندا بارىپ كورىڭىزشى. مەن ءوزىم ەسىل اۋدانىنىڭ سالىق ورگانىندا ءبىر رەت بولدىم. سول جەردە تەنتىرەپ جۇرگەن ادامداردى كورەسىز. جەمقورلىق دەگەن سول جەردە جاتىر. وسىنىڭ ءبارىن جاباتىن كەزىمىز كەلگەن سياقتى"، — دەدى ءماجىلىس دەپۋتاتى.
سونداي-اق، وكسىكبايەۆ ۇكىمەتتىك ورگاندار اراسىندا تۇسىنبەۋشىلىك بار ەكەنىن اتاپ ءوتتى.
"وتكەن جولى اقپارات ءمينيسترىمىز قازاقستاندى ينتەرنەتپەن تولىق تەك 2025 جىلى عانا قامتاماسىز ەتەمىز دەپ ايتتى. ولاي بولسا، سىزدەر قالاي جالپىلاما دەكلاراسياعا كوشە الاسىزدار؟ كوشە المايسىزدار، سەبەبى ينتەرنەت جوق. ۇكىمەتتىك ورگاندار اراسىندا تولىق كەلىسىممەن، زاڭدى تۇردە ىسكە اساتىن تەتىكتەردىڭ بارلىعى جاسالماعان سياقتى، مەن وسىعان كوڭىل اۋدارعىم كەلەدى"، — دەدى ول.
