اقتوبەدە مەكتەپ وقۋشىسى ميراسبەك داۋلەتيار پىشاق جاراقاتىنان كوز جۇمدى. قىلمىستىق ءىس قوزعالىپ، 2002 جىلى تۋعان تاعى ءبىر مەكتەپ وقۋشىسى ءوز كىناسىن مويىندادى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.

اقتوبە وبلىسى، شالقار قالاسىندا مەكتەپ وقۋشىسى اۋرۋحانانىڭ جانساقتاۋ بولىمىندە كوز جۇمدى.  دارىگەرلەر قان كوپ كەتكەنىن، ءومىرىن ساقتاپ قالۋ مۇمكىن بولماعانىن ايتتى. ال بۇگىن وبلىستىق پوليسيا دەپارتامەنتىنىڭ باسپا ءسوز قىزمەتى قىلمىستىق ءىس قوزعالعانىن مالىمدەدى.

«26 قاڭتار كۇنى اۋداندىق اۋرۋحاناعا 16 جاستاعى ءجاسوسپىرىم پىشاق جاراقاتىمەن جەتكىزىلدى. ول كەۋدە تۇسىنان العان جاراقاتتان سول كۇنى كوز جۇمدى. كۇدىكتى رەتىندە شالقار قالاسىنىڭ 17 جاستاعى تۇرعىنى ۇستالدى. ول ءوز كىناسىن مويىندادى. ءقازىر قىلمىستىق كودەكستىڭ «ادام ءولتىرۋ» بابى بويىنشا تەرگەۋ ءجۇرىپ جاتىر. كۇدىكتى ۋاقىتشا تەرگەۋ يزولياتورىنا قامالدى، - دەپ حابارلادى وبلىستىق پوليسيا دەپارتامەنتىنىڭ باسپا ءسوز قىزمەتى.

ال قازا بولعان ميراسبەك داۋلەتيار وقىعان مەكتەپ ديرەكتورى اليا وسپانوۆانىڭ ايتۋىنشا، وقيعا 26 قاڭتار كۇنى ساعات 19:00 شاماسىندا بولعان. شالقار كولىندەگى مۇز ايدىنىندا وقۋشىلار توپ بولىپ، توبەلەسكەن.

«ەكى مەكتەپتىڭ وقۋشىلارى اراسىندا توبەلەس بولعان. ءسوز كوتەرە الماعان سياقتى. №6 ورتا مەكتەپتىڭ 10 سىنىپ وقۋشىسى قالتاسىنداعى پىشاقتى سۇعىپ العان. ءبىزدىڭ مەكتەپتىڭ وقۋشىسى رەانيماسيالىق ۇستەلدە كوز جۇمدى»، - دەدى ءى.ۇرگەنىشبايەۆ اتىنداعى ورتا مەكتەپ ديرەكتورى اليا وسپانوۆا. قايتىس بولعان ميراسبەك داۋلەتيار بوكسپەن شۇعىلدانىپ، جۇلدەلى ورىنداردان كورىنىپ جۇرگەن. 

ۇسىنعان: نازەركە لابيحان