قازاقستاندىق ءانشى ديماش قۇدايبەرگەن 29 قاڭتاردا استانادا وتكەن باسپا ءسوز ءماسليحاتىندا قىتايداعى ەتنيكالىق قازاقتاردىڭ ماسەلەسى تۋرالى پىكىرىن ءبىلدىردى، دەپ جازادى Qamshy.kz اقپارات اگەنتتىگى.

باسپا ءسوز جيىنىندا ازاتتىق ءتىلشىسى انشىدەن "ءسىز الەمگە جۇڭگو نارىعى ارقىلى تانىلدىڭىز. قىتايداعى ەتنيكالىق قازاقتاردىڭ ماسەلەسى جايىندا بىلەسىز بە؟ ولاردىڭ ماسەلەسىن كوتەرۋ ويىڭىزدا بار ما؟ دەپ سۇرادى.

ديماش قۇدايبەرگەن بۇل سۇراققا:

- الەمنىڭ قاي تۇكپىرىندەگى قازاق بولماسىن - ءوزىمىزدىڭ اعايىندارىمىز جانە ولاردىڭ تاعدىرى ءبىز ءۇشىن ەشقاشان قىزىقسىز بولىپ قالمايدى. قولىمنان كەلسە، ءبارىن بەرە ەدىم، ءبىراق مەنىڭ قولىمنان كەلمەيدى، مەن تەك ءانشىمىن، ديپلومات ەمەسپىن. ءقازىر ءوزىمدى تەك ءانشى رەتىندە كورەم. بۇل ماسەلەدە الاڭدامايدى دەپ ويلاماڭىزدار. مەنىڭ دە جانىم اۋىرادى. مەن دە بۇل ماسەلەنىڭ تەزىرەك شەشىلگەنىن قالايمىن، - دەپ جاۋاپ بەردى.

♦ديماش استانا كۇنىنە قانداي سىي جاساماق؟

ديماش قۇدايبەرگەن باسپا ءسوز ءماسليحاتىن بيىل جازدا استانادا بەرەتىن "ارناۋ" جەكە كونسەرتىنە ارناپ وتكىزدى. جيىندا ءانشى ءوزىنىڭ شىعارماشىلىق جۇمىستارى، جوسپارلارى تۋرالى ايتىپ، جۋرناليستەر ساۋالدارىنا جاۋاپ بەردى.

ۇسىنعان: گۇلىم جاقان