بۇگىن استانا قالاسىندا ەلباسىنىڭ قاتىسۋىمەن ۇكىمەتتىڭ كەەڭيتىلگەن جينالىسى بولىپ ءوتتى. جينالىستى اشقان پرەزيدەنت نۇرسۇلتان نازاربايەۆ ۇكىمەت مۇشەلەرىن قاتاڭ سىناپ، ولاردىڭ جۇمىسىنداعى ولقىلىقتاردى ايتىپ ءوتتى، دەپ جازادى Qamshy.kz اقپارات اگەنتتىگى.

«سەندەر ۇكىمەت نەمەسە مينيستر ەمەس، قورقاقسىڭدار...» - دەپ اشۋلاندى ەلباسى.

نۇرسۇلتان نازاربايەۆ ءوز سوزىندە پرەمەر-مينيستر باقىتجان ساعىنتايەۆ پەن ۇلتتىق بانك ءتوراعاسى دانيار اقىشيەۆقا شۇيلىگىپ، سىننىڭ استىنا الدى.

ەلباسىنىڭ ايتۋىنشا، پرەمەر-مينيستردىڭ ۇستەلىندە قازاقستان قانداي تاۋارلاردى وندىرەدى جانە شەت ەلدەن قانداي تاۋارلار كەلەتىنى تۋرالى جازىلعان قاعاز ۇنەمى بولۋى كەرەك.

-ەكسپورت قۇرىلىمىندا وڭدەلگەن ونىمدەردىڭ ۇلەسى نەبارى 30 پايىزدى عانا قۇرايدى. ءومىرزاق (شۇكەيەۆ – اۋىل شارۋاشىلىعى ءمينيسترى – رەد.)، بۇل ساعان تىكەلەي قاتىستى. جۇمىستى دۇرىستاپ اتقار. 20 مىڭ ءىرى قارا مال ەتىن ەكسپورتتاۋ بارىسىندا ونىڭ 70 پايىزدان استامى ءتىرى مال رەتىندە ەكسپورتتالعان. ەكسپورتتىق ونىمدىلىكتى ارتتىرامىز دەپ ءبىز ءوز قۇندىلىعىمىزدى جوعالتىپ جاتىرمىز. ءالى كۇنگە دەيىن ەت، ءسۇت ونىمدەرىن، كوكەنىستەر مەن جەمىستەردى قايتا وڭدەۋ ءۇشىن يمپورتتاپ وتىرمىز. يمپورتتالعان تاۋارلاردىڭ بارلىعى دا قىمبات – كيىم دە، تاماق تا. بىزدە جوق تاۋارلار بولسا مەيلى، ءبىراق ءوزىمىزدىڭ ەلدە وندىرىلەتىن تاۋارلارمەن ءبىز حالىقتى قامتاماسىز ەتۋىمىز كەرەك، - دەپ ايتىپ ءوتتى ەلباسى.

سونىمەن قاتار، نۇرسۇلتان نازاربايەۆ سىرتقى ىستەر ءمينيسترى بەيبىت اتامقۇلوۆقا  جاڭا تاپسىرمالارعا بايلانىستى ينۆەستيسيالىق جانە ەكسپورتتىق قىزمەتتى كۇشەيتۋگە تاپسىرما بەردى.

ەلباسى نۇرسۇلتان نازاربايەۆ بۇگىنگى كەڭەيتىلگەن جينالىستا بانكروتتىق جاعدايلاردى جەڭىلدەتۋدى تاپسىردى.

-نەبارى سوڭعى ءۇش جىلدىڭ ىشىندە بانكروت بولۋعا شاق قالعان كاسىپورىنداردىڭ سانى ەكى ەسەگە وسكەن. بانكتەر اقشا بەرمەيدى دەيسىڭدەر. ەگەر ەشكىم قارىزىن قايتارمايتىن بولسا، اقشانى كىمگە بەرەدى؟! بانك جۇمىسىن قالىپقا كەلتىرمەيىنشە، بانك جۇيەسىندە داعدارىس بولا بەرەدى. ءقازىر قارىز اقشانىڭ كولەمى 4 تريلليوننان اسادى. قارىزعا اقشا بەرۋدە ونىڭ 93 پايىزى نەسيە بەرەتىن كومپانيالارعا تيەسىلى بولىپ كەلەدى، - دەپ ايتىپ ءوتتى پرەزيدەنت.

«نەسيە الادى دا، كەيىن ونى تولەيتىن ۋاقىت كەلگەندە تاعى قوسىمشا ءبىر نەسيە الىپ جابادى. وسىلاي جالعاسا بەرسە، اقىرى ءبىر كۇنى جارىلادى. ءبىز قايدا  بارا جاتىرمىز؟ قولداۋ كورسەتۋ كەرەك، ارينە، ءبىراق ونىڭ دا پايداسى بولۋى كەرەك، - دەدى نۇرسۇلتان نازاربايەۆ.

ۇسىنعان: نازەركە لابيحان