اقش-تىڭ بۇرىنعى مەملەكەتتىك حاتشىسى  دجون كەرري حالىقارالىق ساياساتتا دونالد ترامپتىڭ جۇرگىزىپ وتىرعان ساياساتىنا كوڭىلى تولمايتىنىن ءمالىم ەتتى. ول ءوز سوزىندە «ترامپ بۇكىل الەمنىڭ الدىندا امەريكانى ماسقارا ەتتى» دەپ مالىمدەدى.

–ول امەريكانىڭ دەموكراتيالىق قۇندىلىقتارىن جەرمەن جەكسەن ەتتى. الەمنىڭ الدىندا اقش-تىڭ بەدەلىنە نۇقسان كەلتىردى، ماسقارامىزدى شىعاردى. امەريكانى توركۇل الەمنەن وقشاۋلاپ تاستادى. ەكىنشى دۇنيەجۇزىلىك سوعىستان كەيىن  بۇرىنعى اقش باسشىلارى قۇرعان اليانس پەن ىرگەتاسى مىقتى ينستيتۋتتارعا ءقاۋىپ ءتوندىردى. ءبىز العا ەمەس، ارتقا قاراي شەگىنىپ بارامىز.

مەن ونداعان جىلدار بويى اقش بيلىگىندە، مەملەكەتتىك قىزمەتتە جۇمىس ىستەدىم. امەريكا مۇددەسىنە ساي ەلدىڭ سىرتقى ساياساتىن جۇرگىزدىم. ءبىراق ءدال دونالد ترامپتاي ەلدىڭ ىشىنە ىرىتكى سالعان، ۇلتتىڭ قاۋىپسىزدىگىن ويلامايتىن،  اقش-تىڭ ابىرويىن توككەن اپەرباقان ادامدى كورمەدىم. تۆيتتەر ارقىلى ساياسات جۇرگىزىپ، امەريكانى  ۇياتقا قالدىراتىن مۇنداي ادامنىڭ اق ۇيدە وتىرۋعا قۇقى جوق،–دەدى ول دەموكراتيالىق پارتيا وكىلدەرىنىڭ الدىندا سويلەگەن سوزىندە.

وسىعان بايلانىستى ول 2020 جىلدىڭ قاراشاسىندا باستالاتىن پرەزيدەنتتىك سايلاۋعا دايىندىقتى قازىردەن باستاۋعا شاقىردى. 2013-2017 جىلدارى اقش-تىڭ مەملەكەتتىك حاتشىسى بولعان دجون كەرري «ول ءۇشىن بۇگىننەن باستاپ سايلاۋالدى كامپانياسىنا جارنا تولەۋدى باستاپ كەتۋ كەرەك» ەكەندىگىن ايتتى.

ەسكەرتە كەتەيىك، دونالد ترامپ تا كەلەر جىلى پرەزيدەنتتىك سايلاۋعا تۇسەتىنىن ءمالىم ەتكەنى بەلگىلى. وتكەن سايلاۋدا ۇتىلىپ قالعان دەموكراتيالىق پارتيا وسى جولى ترامپتىڭ اياعىن تۇساۋعا بارىن سالادى. ءقازىردىڭ وزىندە دونالد ترامپقا قارسى باسەكەلەس رەتىندە دەموكراتتاردىڭ اتىنان سايلاۋعا تۇسۋگە اقش-تىڭ بۇرىنعى ۆيسە-پرەزيدەنتى دجو بايدەن، سەناتور بەرني ساندەرس، سونىمەن قاتار بۇرىنعى مەمحاتشى دجون كەرري  نيەتىن ءبىلدىردى.