ەلباسىنىڭ «رۋحاني جاڭعىرۋ» باعدارلاماسى، «ۇلى دالانىڭ جەتى قىرى» ماقالاسى جانە جاستار جىلىنداعى تاپسىرمالارىن جۇزەگە اسىرۋ ماقساتىندا ءبىلىم جانە عىلىم مينيسترلىگى، شىعىس قازاقستان وبلىسى اكىمى جانە  نۇر وتان پارتياسى شقو فيليالى قولداۋىمەن، سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ ۇيىمداستىرۋىمەن  پولشا مەملەكەتى، سۆەچە قالاسىندا ورنالاسقان لينگۆيستيكالىق-تەحنيكالىق ۋنيۆەرسيتەتى بازاسىندا «اباي» ءعىلىمي-بىلىم بەرۋ جاستار ورتالىعى اشىلدى، دەپ جازادى Qamshy.kz اقپارات اگەنتتىگى.

جاستار ورتالىعىنىڭ نەگىزگى جۇمىسى پولشا مەملەكەتىندە اكادەميالىق ۇتقىرلىق بويىنشا جانە باسقا دا باعدارلامالارمەن وقىپ جاتقان ستۋدەنتتەردىڭ، سونىمەن قاتار قازاق دياسپوراسى جاستارىنا قارىم-قاتىناس پلاتفورماسى نەگىزىندە، پولياك حالقىنا ۇلى عۇلامالارىمىزدىڭ بىرەگەيى اباي قۇنانباي ۇلىنىڭ ءومىرى، شىعارماشىلىعىمەن تانىسۋعا باعىتتالعان. ورتالىق نەگىزىندە ەكى ۋنيۆەرسيتەت اراسىناداعى قوس ديپلوم، سىرتقى اكادەميالىق ۇتقىرلىق سياقتى ءعىلىمي-بىلىم بەرۋ باعىتتارىنداعى جۇمىستار اتقارىلادى.  ەلباسى «بولاشاققا باعدار: رۋحاني جاڭعىرۋ» باعدارلاماسىندا، - «ۇلتتىق سالت-داستۇرلەرىمىز، ءتىلىمىز بەن مۋزىكامىز، ادەبيەتىمىز، جورالعىلارىمىز، ءبىر سوزبەن ايتقاندا ۇلتتىق رۋحىمىز بويىمىزدا ماڭگى قالۋعا ءتيىس.

ابايدىڭ دانالىعى، اۋەزوۆتىڭ عۇلامالىعى، جامبىلدىڭ جىرلارى مەن قۇرمانعازىنىڭ كۇيلەرى، عاسىرلار قويناۋىنان جەتكەن بابالار ءۇنى- بۇلار ءبىزدىڭ رۋحاني مادەنيەتىمىزدىڭ ءبىر پاراسى عانا، ال «ۇلى دالانىڭ جەتى قىرى» ماقالاسىندا،- «...دۇنيە جۇزىنە بەلگىلى تۇلعالار بۇگىندە «ءوز مەملەكەتتەرىنىڭ» باعا جەتپەس سيمۆولدىق كاپيتالى سانالادى ءارى سول ەلدەردىڭ حالىقارالىق ارەنادا ءتيىمدى ىلگەرىلەۋىنە سەپتىگىن تيگىزىپ وتىر. ۇلى دالا ءال-فارابي مەن ياساۋي، كۇلتەگىن مەن بەيبارىس، از-تاۋكە مەن ابىلاي، كەنەسارى مەن اباي جانە باسقا دا كوپتەگەن ۇلى تۇلعالار شوعىرىن دۇنيەگە اكەلدى»،- دەپ اتاپ وتكەن بولاتىن. سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ رەكتورى، پروفەسسور تولەگەن مۇحتار سەرىكتەس ۋنيۆەرسيتەت بازاسىندا  ناقتى «اباي» ورتالىعىن اشۋدى ۇسىنۋىنىڭ ءوزى وسى باعدارلاما مەن ماقالادا ايتىلىپ وتكەن تاپسىرمالارىن ورىنداۋ بولىپ تابىلادى. بۇل ورتالىقتىڭ اشىلۋى شەتەلدە ءبىلىم الىپ جاتقان جاستارىمىزعا ءوز ەلىنىڭ رۋحاني قۇندىلىقتارى مەن ۇلى ەسىمدەرىن ماقتان ەتۋگە، ساپالى ءبىلىم الۋىنا ۇلكەن مۇمكىندىك بەرەرى انىق.