جابىرلەنۋشى باقىت نازاروۆا انشىگە كەك ساقتامايتىنىن ايتتى دەپ جازادى Qamshy.kz اقپارات اگەنتتىگى 31-ارنانىڭ دەرەگىن نەگىزگە الىپ. 

زاڭگەر ورىنباسار تىلەپبەرگەنوۆتىڭ ايتۋىنشا، جابىرلەنۋشى باقىت نازاروۆا كەلىسىمگە كەلگەنىن ايتىپ، سوتقا قايتا تالاپ-ارىز بەرگەن جاعدايدا 6 جىلعا سوتتالعان ءانشى گاۋھار الىمبەكوۆا بوستاندىققا شىعۋى مۇمكىن.

♦"گاۋھارداي اسىل قىزدارىمىزدى قورعاماساق، ادۆوكاتتىعىما سىن بولار..."

ال گاۋھار الىمبەكوۆانى سوتقا بەرگەن باقىت نازاروۆا 20 جىلدان بەرى بازاردا ساۋدا جاساپ ءجۇر.

قاراپايىم ازاماتشا كەزىندە گاۋھارعا 40 مىڭ دوللار تاۋىپ بەرۋ ءۇشىن بىرنەشە رەت نەسيە الىپ، قارىزعا بەلشەسىنەن باتقان. ونىڭ سوتقا بەرگەندەگى ماقساتى – ءانشىنى تۇرمەگە وتىرعىزۋ ەمەس، اقشاسىن قايتارۋ ەكەن. ءوزىنىڭ ەسەپتەۋى بويىنشا، الىمبەكوۆا وعان 51 مىڭ دوللار، 10 ميلليون 500 مىڭ تەڭگە قارىز. 

"وسىنداي ورتامىزدا جاعداي بولدى ەكەن دەپ، مەن ونى تابالامايمىن. وعان وكپەم دە، كەگىم دە جوق. ال ونى كەشىرەمىن، كەشىرمەيمىن دەيتىندەي مەن كىممىن، اللا تۇرعاندا؟ اللا، ءبارىمىزدىڭ كەشىرىم، ءتاۋبامىزدى قابىل الاتىن. سىزدەرگە ايتارىم، گاۋھاردى تۇسىنۋگە، سوكپەۋگە تىرىسىڭىزدار"، – دەيدى جابىرلەنۋشى.

♦گاۋحار الىمبەكوۆانىڭ تاعدىرى: «مۋزارت» ساعان ايتام... تورەعالي مەن قايرات، سەن تىڭدا!

حالىق سوت گاۋھارعا تىم اۋىر جازا بەردى دەپ الەۋمەتتىك جەلىدە جارىسا جازىپ جاتىر. الايدا زاڭگەر ورىنباسار تىلەپبەرگەنوۆ ءانشى ءتىپتى، 10 جىلعا دەيىن باس بوستاندىعىنان ايىرىلۋى مۇمكىن ەدى دەپ وتىر. سوت ونىڭ بۇرىن سوتتالماعانى مەن قوعامداعى بەدەلىن ەسكەرگەن. زاڭگەردىڭ ايتۋىنا قاراعاندا، گاۋھار مەن ونى سوتقا بەرگەن ايەل بىتىمگە كەلگەندە ءىس وسىلاي اياقتالماس ەدى.

"اپپەلياسياعا بەرگەن كۇننىڭ وزىندە الىمبەكوۆانىڭ قۇقىقتىق جاعدايى وزگەرمەيدى. ويتكەنى، سوتتان ءبىز ورەسكەل قاتەلىك كورىپ تۇرعان جوقپىز. ال جابىرلەنۋشى "كەلىسىمگە كەلدىم" دەپ، قايتا تالاپ ارىز بەرەتىن بولسا، وندا جاعداي وزگەرىپ، الىمبەكوۆانىڭ بوساپ شىعۋعا مۇمكىندىگى بار"، – دەيدى زاڭگەر.

♦گاۋحار الىمبەكوۆانىڭ ادۆوكاتى ءىستىڭ ءمان-جايىن ءتۇسىندىردى

دەمەك، نازاروۆا مەن الىمبەكوۆا ىمىراعا كەلسە، ءانشىنىڭ بوستاندىققا شىعۋى ابدەن مۇمكىن.

ايتا كەتسەك، كەشە "ەلىمىزدەگى تانىمال انشىلەردىڭ ءبىرى گاۋھار الىمبەكوۆا الاياقتىق جاساعانى ءۇشىن 6 جىلعا سوتتالدى، دەگەن اقپارات كوپشىلىكتى ەسەڭگىرەتىپ تاستادى.