ەلىمىزگە بەلگىلى ءانشى، بىرنەشە تانىمال اندەردىڭ اۆتورى گاۋحار الىمبەكوۆا "الاياقتىق" جاسادى دەگەن ايىپتاعىلىپ، 6 جىلعا باس بوستاندىعىنان ايىرىلعان بولاتىن. بۇل جايت بۇكىل جۇرتتى ەسەڭگىرەتىپ، اتالمىش وقيعاعا بايلانىستى الەۋمەتتىك جەلىدە ءتۇرلى سوزدەر دە ايتىلدى، دەپ جازادى Qamshy.kz اقپارات اگەنتتىگى.

گاۋحار الىمبەكوۆا ءوزىنىڭ وقيعاسىنا بايلانىستى حات جازىپ، ونى بيبىگۇل داۋلەتبەك قىزى ءوزىنىڭ Facebook پاراقشاسىندا جاريالاپتى.

"قالايسىڭدار؟ مەندە ءبارى تاماشا!!! قايران قازاعىم-اي، نە بوپ كەتتى، تۇسىنبەي قالدىم. ەشبىر دالەل بولماسا دا، ەڭ باستىسى – اقشانى العان ادام تولىق مويىنداپ تۇرسا دا، قالاي ءبارى استان-كەستەن بوپ كەتتى، مەڭ-زەڭ بوپ، جۇرەگىم ءبىر ساتتە توقتاپ قالعانداي بولدى...
الاياقتىق دەگەن دە – ۇلكەن ءبىر ونەر عوي، مەنىڭ قولىمنان ءان شىعارىپ، سول ءاندى جەتكىزگەننەن باسقا قولىمنان ەشنارسە كەلمەيدى عوي، قايتەم، ماڭدايعا جازىلعاندى كورىپ جاتىرمىن. مۇمكىن باقىت تاتە مەنى تەمىر تورعا وتىرعىزدىم دەپ، ءماز بوپ باقىتتى بوپ جۇرگەن شىعار، مەن وعان جاماندىق تىلەمەيم، اللا رازىلىعى ءۇشىن كەشىردىم. اللانىڭ وسى ءبىر سىناقتى بەرگەنىنە شۇكىر. ەڭ ماڭىزدىسى-بۇل شىركىندەردىڭ تۇمشالانعان تەمىر توردىڭ ىشىندە باس بوستاندىعىمنان ايىرعانمەن، مەنىڭ اللاعا دەگەن سەنىمىم مەن حالىقتىڭ ماعان دەگەن-ىستىق ىقىلاسى مەن مەنىڭ حالىققا دەگەن ۇلكەن ماحابباتىمدى تارتىپ الا المايدى، سەبەبى شىعارىپ العان قولىما گيپس سالدىرۋعا ەمحاناعا اپارعاندا، سول جەردەگى قىز-كەلىنشەكتەر مەنى تانىپ قويىپ، قۇشاقتاپ جىلاپ، سابىرلى بول-دەگەندە، تۇك تۇسىنبەي، بۇلار قايدان بىلەدى؟ - دەپ تۇرىپ قالدىم. سويتسەم ءبارى ينستاگرام جەلىسىنەن حاباردار ەكەن. كوزىمنىڭ جاسى ءمولت-مولت ەتىپ، "ءبىر تامشى كوزدىڭ جاسىنداي" بولدى. قىسقاسى، مەيلى، ۋايىمداماڭىزدار، ءبارى جاقسى، اللا ءناسىپ ەتسە-اماندىقپەن كەزدەسەرمىز!!! ايتقانداي، كەشە ابىر-سابىرمەن ۇمىتىپ كەتىپپىن، تۇندە وسىندا كەلىپ تار بولمەگە، تاس توسەككە كەپ جاتقاندا كوزىم تەمىر تورمەن قورشالعان تەرەزەگە ءتۇسىپ جاتىپ-وسى كۇنى انام-مارقۇمنىڭ جەر-بەسىككە بولەنگەن كۇنى ەكەنى ەسىمە ءتۇسىپ، كوز جاسىما ەرىك بەردىم. ءبىر مەزەتتە اپامنىڭ الاقانى ءمولت-مولت ەتىپ اققان كوز جاسىمدى توقتاتىپ، ماڭدايىمنان، شاشىمنان سيپاپ، "جاساعان بەرە سالعانىم، سابىرلى بول"-دەپ جۇباتقانداي بولدى. ءارۋاعىڭنان اينالايىن عازيز-انام، اسقار تاۋ-اكەم، جاتقان جەرلەرىڭ جايلى، ءجاندارىڭ-جانناتتا بولسىن!!!
سۇيىكتى قىزدارىڭىز: گاۋھار الىمبەكوۆا، 
2 اقپان 2019 جىل" - دەپ جازىپتى ءانشى.

ەستەرىڭىزگە سالا كەتەيىك، گاۋحار الىمبەكوۆاعا قاتىستى سوت وتىرىسى ءوتىپ، سوت ءانشىنى 6 جىلعا باس بوستاندىعىنان ايىرۋ تۋرالى ۇكىم شىعارعان بولاتىن.

ۇسىنعان: نازەركە لابيحان