Qamshy.kz  اقپارات اگەنتتىگىنىڭ ءتىلشىسى 2 اقپان كۇنگى تۇندە جانىبەك ءالىمحان ۇلىنىڭ بەسىنشى جەكپە-جەگى قارساڭىندا بوكسشىنىڭ الماتى وبلىسى، الاكول اۋدانى، جىلاندى اۋىلىندا تۇراتىن اناسى زاۋرە سايىنقىزىنا تەلەفون سوعىپ، ەكسكليۋزيۆتى سۇحبات الدى.

- امانسىز با؟ سىزگە الماتىدان «قامشى» سايتىنان حابارلاسىپ تۇرمىز. تاڭەرتەڭ ۇلىڭىز ايقاسقا شىعادى. كوڭىل-كۇيىڭىز قالاي؟

- كوڭىلىم ورنىندا. بالامنىڭ ۇرىسىن تاقىمدى قىسىپ، توسىپ وتىرمىن.

- قوبالجۋ، ۋايىم بار شىعار؟

- وزەگىڭدى جارىپ شىققان بالاڭدى ۋايىم قىلاسىڭ. ءبىراق قورقىنىش جوق. الىستا جۇرگەنىنە جانىم اۋىرادى.

- كەي انالار ۇلىنىڭ بوكسىن كورگىسى كەلمەي، تەلەديداردىڭ الدىنا جولامايدى. ءسىز بۇل جاعىنان قالايسىز؟

- مەن جانىبەكتىڭ قازاقستانداعى جارىستارىنا بارىپ تۇرامىن. استاناداعى، الماتىداعى بوكسىن كوزىممەن كوردىم. سونداي اۋىر سىنداردا ۇلىمنىڭ قاسىنان تابىلعاندى جاقسى كورەمىن.

- جانىبەك، بۇگىن حابارلاستى ما؟

- سىزدەن ءسال بۇرىن تەلەفون شالدى. جاعدايىم جاقسى. سالماعىمدى ولشەدى. ءبارى قالپىندا، ۋايىمداما، دەدى.

- ەرتەڭ تاڭەرتەڭگىسىن ۇيگە جانكۇيەر اعايىندار كەلەتىن شىعار.

- اعايىندار، اۋىلداستار جانىبەكتىڭ بوكسىنا قاتتى اسىعىپ ءجۇر. كەلەتىن ادامعا ەسىگىمىز ءارقاشان اشىق.

• ۇلىڭىزدى ساعىندىڭىز با؟
• -ساعىنعاندا قانداي!
• وقۋى قالاي ەدى؟!
• سپورتشىلاردىكى قالاي بولۋشى ەدى؟! ورتاشا...

- جانىبەكتىڭ وتباسى قايدا تۇرىپ جاتىر؟

- كەلىنىم انەل، ءۇش بالامەن  – الماتىدا. جانىبەكتىڭ ۇلكەنى اسىلجان مەنىڭ قولىمدا. وسى جىلاندىدا ءۇشىنشى سىنىپتا وقيدى. ۇلىم مەن كەلىنىمنىڭ اسىلجان، رامازان، سابىرجان اتتى ءۇش ۇلى، ايزادا دەگەن ءبىر قىزى بار.

«انەل مەن نەمەرەلەرىم جانىبەك قاشان امەريكاعا الىپ كەتەدى» دەپ اسىعىپ ءجۇر. مۇمكىن، وسى ايقاستان كەيىن ولار امەريكاعا بارۋى مۇمكىن.

- جانىبەكتىڭ الاكولدىڭ باۋىرىنداعى شاعىن عانا جىلاندى اۋىلىنان ەكەنىن بىلەمىز. ونداعى كاسىبىڭىز نە؟

- دەنە شىنىقتىرۋ پانىنەن ءمۇعالىممىن.

- ۇلىڭىزبەن بىرگە تۇسكەن سۋرەتىڭىز بولسا، «قامشىنىڭ» بەتىندە جاريالاساق پا دەپ ەدىك...

- قانشا جارىسىنا بارىپ ءجۇرىپ، جانىبەكپەن سۋرەتكە تۇسپەپپىن. جالپى، سۋرەتكە تۇسكەندى ۇناتپايمىن. دەگەنمەن، اللا قالاسا، كەلەسى كەلگەنىندە بالاممەن سۋرەتكە تۇسسەم دەگەن ويىم بار.

- اللا جازسا، تاڭەرتەڭ جانىبەك سەنىمدى اقتايدى دەپ ۇمىتتەنەمىز. امان بولىڭىز!

- ءامين، ايتقانىڭىز كەلسىن! الماتىدان ادەيى تەلەفون سوعىپ، تىلەكتەستىك بىلدىرگەن سىزدەرگە دە انالىق العىسىمدى بىلدىرەمىن. مەنىڭ ۇلىما تىلەۋلەس بولعاندارىڭىز ءۇشىن مىڭ دا ءبىر راحمەت!

-سۇحباتىڭىزعا راحمەت!