استانادا جەكە ۇيلەردىڭ بىرىندە بولعان جويقىن ءورت سالدارىنان 5 بالا قازا تاپتى. جانتۇرشىگەرلىك وقيعانىڭ سالدارىنان ورنى تولماس قازاعا ۇشىرعان وتباسىعا "نۇر وتان" پارتياسىنىڭ ءبىرىنشى حاتشىسى ماۋلەن اشىمبايەۆ كوڭىل ايتىپ، ءدال ءقازىر ولارعا قولداۋ كورسەتۋ كەرەكتىگىن جەتكىزدى، دەپ جازادى Qamshy.kz اقپارات اگەنتتىگى.

"استاناداعى ۇيلەردىڭ بىرىندە ءتىلسىز جاۋدىڭ زاردابىنان بولعان قايعىلى وقيعا ءبىزدىڭ دە قابىرعامىزدى قايىستىرىپ كەتتى.

قاپىدا كوز جۇمعان بالالاردىڭ اتا-انالارىنا ورنى تولماس قايعىلارىنا ورتاقتاسىپ، كوڭىل ايتامىز.

قايعى بولىسسە، ازايادى. سوندىقتان ءدال ءقازىر سوزبەن ايتىپ جەتكىزە المايتىن اۋىر قايعىعا دۋشار بولعان اتا-اناعا دەمەۋ بولىپ، قولداۋ كورسەتۋدىڭ ماڭىزى زور"، - دەيدى ماۋلەن اشىمبايەۆ.

سونداي-اق، استانا قالاسىنىڭ اكىمى باقىت سۇلتانوۆ بەس بالا قايتىس بولعان ءورتتىڭ ءمان-جايىن انىقتاۋدى تالاپ ەتتى.

اكىمدىكتىڭ باسپاسوز-قىزمەتىندەگىلەردىڭ حابارلاۋىنشا، زارداپ شەككەن وتباسىعا قارجىلاي كومەك كورسەتىلەدى. باقىت سۇلتانوۆ «كوكتال-1» تۇرعىن الابىندا ورىن العان قايعىلى جاعدايعا بايلانىستى شۇعىل جيىن وتكىزدى.

«وسى جاعدايعا دۋشار بولعان وتباسىنا قايعىرا كوڭىل ايتامىن. قالا باسشىلىعى وقيعا ورنىندا بولدى، قازا تاپقان بالالاردىڭ اتا-اناسىمەن پسيحولوگتار جانە الەۋمەتتىك قىزمەت ماماندارى جۇمىس ىستەۋدە. زارداپ شەككەن وتباسىنا قالالىق الەۋمەتتىك قورعاۋ باسقارماسى تاراپىنان ماتەريالدىق كومەك كورسەتىلەدى. «سارىارقا» اۋدانى اكىمىنە جەرلەۋ ءراسىمىن ۇيىمداستىرۋدى جانە وتباسىنا ۋاقىتشا باسپانا بەرۋدى، جانعان ءۇيدى تەز ارادا قالپىنا كەلتىرۋ ءۇشىن قاراجات ءبولۋدى تاپسىرامىن»، - دەدى قالا اكىمى.

ءوز كەزەگىندە، تجد باستىعىنىڭ مىندەتىن اتقارۋشى مارعۇلان امانبايەۆ، وسىعان دەيىن «كوكتال-1» تۇرعىن الابىندا ءورت جانە باسقا دا توتەنشە جاعدايلار بولدىرماۋ ءۇشىن پروفيلاكتيكالىق جۇمىستار جۇرگىزىلگەنىڭ ايتتى. «سول كەزدە تجد –ءنىڭ قىزمەتكەرلەرى بۇل ۇيگە بارعان، ولقىلىقتاردى جويۋ ءۇشىن ەسكەرتپە بەرىلگەن»، - دەدى امانبايەۆ.

باقىت سۇلتانوۆ اۋدان اكىمدەرى مەن توتەنشە جاعدايلار دەپارتامەنتى جانە پوليسياعا بىرلەسىپ دەرەۋ جەكە سەكتورداعى ءار ۇيگە بارىپ ءورت قاۋىپسىزدىگى ەرەجەلەرىن ساقتاۋ تۇرعىسىندا تەكسەرىس، ءتۇسىندىرۋ جۇمىستارىن جۇرگىزۋدى تالاپ ەتتى.

«بۇل سىزدەردىڭ تىكەلەي جۇمىستارىڭىز، مەن ءارقاشان ايتىپ وتىرماۋىم كەرەك! باياعىدا جۇرگىزۋ كەرەك ەدى، مىندەتتى تۇردە قايعىلى وقيعانى كۇتەسىزدەر مە؟! بۇل ءتجد-نىڭ قاتەلىگى. سىزدەر جەكە سەكتوردا تۇراتىن ءار ادامدى جەكەلەي تانۋلارىڭىز كەرەك»، - دەدى ول.

قالا اكىمى قۇزىرەتتى ورگاندارعا بولعان جاعدايدىڭ بارلىق ءمان-جايىن انىقتاۋدى تاپسىردى. 4 اقپان كۇنى تۇندە «سارىارقا» اۋدانىنداعى «كوكتال-1» تۇرعىن ءۇي الابىندا ءورت شىعىپ، وندا جەكە ءۇيدىڭ اۋماعىنداعى شاعىن ءۇي ورتەنگەن. ءورت سالدارىنان 2006، 2009، 2014، 2016، 2018 جىلى تۋعان بەس بالا قايتىس بولدى. ەڭ كىشىسى نەبارى ءۇش ايدا بولعان.