استاناداعى ۇيلەردىڭ بىرىندەگى ورتتەن ءبىر وتباسىنىڭ 5 بالاسى تۇگەلدەي قايتىس بولدى. ولاردىڭ ۇلكەنى 12 جاستا، كىشىسى جاسقا دا تولماعان ەكەن. ال قايعىلى وقيعا كەزدە بالالاردىڭ اتا-اناسى جۇمىستا بولعان ەكەن. بالالارىنان تۇگەل ايىرىلعان وتباسىنا بۇكىل قازاقستان قايعىرىپ كوڭىل ايتادى. ءارى «قايعىلى وقيعاعا كىم جاۋاپتى؟» دەگەن سۇراققا اركىم جاۋاپ ىزدەپ الەك. وسى تۇستا زاڭگەر ايگۇل ورىنبەك بار جاۋاپكەرشىلىكتى ەڭبەك جانە الەۋمەتتى قورعاۋ ءمينيسترى مادينا ءابىلقاسىموۆاعا ارتتى. كۇنى كەشە مينيستر «كوپ بالالى اتا-انالار ءۇشىن 16 مىڭ تەڭگە جاردەماقى تىم كوپ» دەپ جار سالعان بولاتىن.

♦كوپبالالى انا: جەرگە ءتۇسىڭىز، ءابىلقاسىموۆا حانىم!

«مادينا ءابىلقاسىموۆا، "16 مىڭ جەتەدى!"- دەپ بۇكىل الەمگە جار سالىپ ەدىڭ! بەس بالانىڭ ءولىمى سەنىڭ موينىڭدا!
16 مىڭ جەتسە، بايعۇس انا ءتۇن ىشىندە جۇمىس ىستەپ نەسى بار؟
قۋ جەتىسپەۋشىلىك، «شىرىلداعان بالالارعا قايتسەم، نان تاۋىپ بەرەم» دەپ جۇرگەن انا بوتالاپ قالدى اۋ!
بۇل – ءبىر ۇلتتىڭ قاسىرەتى! 
الەۋمەتتىك جاعدايى جاقسى، دامىعان وتىز ەلدىڭ قاتارىنا كىرگەن رۋحاني جاڭعىرعان مەملەكەت كوپ بالالى انالاردىڭ جاعدايىن جاساي الماي وتىر!
شانەل-مانەل كيگەن مينيسترلەر، "قورقاق" ۇكىمەت شىعىڭدار كوشەگە، اۋىلدارعا! كورىڭدەر حالىقتىڭ جاعدايىن!
سەندەر كورمەي جۇرگەن جوقسىڭدار، سەندەر كورىپ ءجۇرىپ كوزدەرىڭدى تاس قىلىپ بايلاپ العان كور سوقىرسىڭدار!
بەيبىتشىلىك زامان، ءقاۋىپسىز ەلدە بەس بالا وتقا جانىپ كەتىپ وتىر.
ولگەن جاس سابيلەردىڭ ك ۇلى سەندەردىڭ مويىندارىڭدا!»، - دەپ اشىنىپ جازدى ايگۇل ورىنبەك ءوزىنىڭ فەيسبۋكتەگى پاراقشاسىنا.

قايعىلى وقيعا دۇيسەنبىگە قاراعان ءتۇنى بولعان. سارىارقا اۋدانى شىڭعىستاۋ كوشەسىندە ورنالاسقان "ۆرەميانكادا" تۇنگى ۇشتە ءورت شىققان. كوپ ۇزاماي ۋاقىتشا سالىنعان باسپانانىڭ شاتىرى قيراپتى. ءتىلسىز جاۋ تۋرالى حابار ءورت ءسوندىرۋ قىزمەتىنە 03.24 كەزىندە جەتكەن، ءورت سوندىرۋشىلەر جالىندى ءبىر ساعاتتان سوڭ ءسوندىردى. جانىپ كەتكەن ۇيدەن 2006، 2008، 2013، 2015 جانە 2018 جىلدارى تۋعان بالالاردىڭ دەنەسى تابىلعان.

ولاردىڭ اتا-اناسى توتەنشە وقيعا كەزىندە جۇمىستا بولىپتى.

ءورت اۋماعى – 30 شارشى مەتر، جالىندى سوندىرۋگە 17 ءورت ءسوندىرۋشى مەن 5 كولىك قاتىسقان، بۇدان بولەك توتەنشە جاعدايلار كوميتەتىنىڭ ورتالىق وڭىرلىك اەروموبيلدى جەدەل قۇتقارۋ جاساعىنان ءتورت ادام مەن ءبىر كولىك جۇمىلدىرىلعان.

ۇسىنعان: گۇلىم جاقان