الەمگە تانىمال Dior برەندىن ەستۋىڭىز بار ما؟ كريستيان ديور - دۇنيەجۇزىنە تانىمال Dior برەندىنىڭ اۆتورى. اتالمىش برەندتىڭ اتىمەن كيىم-كەشەك، اشەكەي بۇيىمدار، كوسمەتيكا مەن ءيىسسۋلار، ءموبيلدى تەلەفوندار وندىرىستەن شىعادى.

كريستيان ديور 1905 جىلدىڭ 21-قاڭتارىندا فرانسيانىڭ سولتۇستىك باتىسىنداعى گرانۆيل قالاشىعىندا دۇنيەگە كەلگەن. كريستيان ديور 6 جاسقا تولعاندا وتباسىمەن بىرگە پاريج قالاسىنا كوشەدى. بىردە سىعان ايەل كريستيان ديوردىڭ بولاشاعىن بولجاپ، ديوردىڭ ايەلدەردىڭ ارقاسىندا كول-كوسىر بايلىق پەن اتاق-ابىرويعا كەنەلەتىنىن ايتقان. الايدا 14 جاستاعى جىگىت سىعان ايەلدىڭ سوزىنە سەنبەپتى. كريستيان ديوردىڭ وتباسىنىڭ جاعدايى جاقسى ەدى. اكە-شەشەسى بار كەزدە كريستيان ديور ەشتەڭەدەن تارشىلىق كورمەدى. ولاردىڭ ايتۋىمەن ديپلومات بولۋعا دايىندالىپ ءجۇردى. جانى قالاماعان ماماندىقتا وقىعىسى كەلمەگەن كريستيان ديور شىعارماشىلىق پەن وقۋدى قاتار الىپ جۇرۋگە تىرىستى. ول ءوزىنىڭ دوسىمەن بىرگە سۋرەتتەر گالەرەياسىن اشتى. وسىلاي ديوردىڭ شىعارماشىلىق جولى باستالدى.

الايدا 1930 جىلى ديوردىڭ اناسى قاتەرلى ىسىكتەن قايتىس بولىپ، اكەسى تۋبەركۋلەز اۋرۋىنا شالدىعادى. ول ءبىراز ۋاقىتتان كەيىن كوك تيىنسىز قالدى. ديور اۋىر قازادان كەيىن وز-وزىنە كەلىپ، شىعارماشىلىق جولىن جالعاستىرۋدى ويلايدى. كريستيان كۇندەلىكتى ءناپاقاسىن تابۋ ءۇشىن ءوزىنىڭ سۋرەتتەرى مەن ەسكيزدەرىن ساتادى. ديوردىڭ سۋرەتتەرى تانىمال روبەرت پيگەنىڭ كوزىنە ءتۇسىپ، جاڭا جۇمىسقا ورنالاسىپ، اراعا بىرنەشە جىل سالىپ ديور ءوز اتىمەن ءسان ءۇيىن اشتى. ءسويتىپ 14 جاسىندا بولاشاعىن بولجاپ بەرگەن سىعان ايەلدىڭ ءسوزى شىندىققا اينالدى.

ديوردىڭ اتى شارتاراپقا تانىلعان كەزدە الەمدەگى «مەن» دەگەن تالاي قىز Dior ءسان ءۇيىن تۇسىندە كورگەن. كريستيان ديوردىڭ قولاستىندا مودەل بولۋ ءۇشىن كوپتەگەن قىز كاستينگكە كەلەدى. ءبىراق ديوردىڭ مۋزاسى قازاقتىڭ قىزى بولدى.

ديوردىڭ مۋزاسىنا اينالعان اللا يلچۋن كىم؟

اڭىزعا اينالعان كريستيان ديوردىڭ سۇيىكتى مودەلى اللا يلچۋن Dior ءسان ۇيىندە 20 جىلعا جۋىق قىزمەت ەتەدى. قازاقتىڭ قىزى ءوزىنىڭ قىلداي جىڭىشكە بەلىمەن كوزگە تۇسكەن. ونىڭ بەلى – 47 سم.

اللا يلچۋن تۋرالى بىلەتىندەردىڭ كوبىسى ونى قازاقتىڭ كۇلشە قىزى دەپ اتايدى. رەستوراندا ىدىس جۋىپ جۇرگەن قازاق قىزى ويلاماعان جەردەن تانىمال مودەلگە اينالادى.

اللا يلچۋننىڭ اكەسى جۋانحال يلچۋن الماتى قالاسىندا تۇرعان، بايدىڭ ۇلى بولعان. جۋانحال تەمىر جول ماماندىعىن ءتامامداپ، اتاقتى تۇركىسىب قۇرىلىسىن جۇرگىزۋگە دە اتسالىسقان. كەيىن ول جۇڭگو ەلىندەگى حاربين قالاسىنا ىسساپارمەن بارادى. ءىسساپار كەزىندە رەسەيدىڭ بودانىندا بولعان حارۆين قالاسىندا 16 جاستاعى بولاشاق جارىن كەزدەستىرەدى. اللا يلچۋننىڭ اناسى تاتيانا وپەرا ءانشىسى بولعان. جۋانحان مەن تاتيانانىڭ جاس ايىرماشىلىعى - 13 جاس. ۇيلەنگەننەن كەيىن اللا ەسىمدى قىز ومىرگە كەلەدى. 1917 جىلى ريەۆوليۋسيا بولعاندىقتان ولار بىرنەشە جىل بويى حارۆين قالاسىندا تۇرادى. اراعا جىلدار سالىپ حارۆين قالاسىنداعى بيلىكتى قىتايلار قايتارىپ الىپ، اللانىڭ وتباسى پاريجگە قونىس اۋدارادى. الايدا قونىس اۋدارۋ كەزىندە اللانىڭ اكەسى قىزى مەن ايەلىن كەمەگە وتىرعىزىپ ۇلگەرگەن. سودان كەيىن جۋانحان ءىز-تۇسسىز جوعالعان. ءبىر دەكتەرگە سۇيەنسەك، جۋانحان قاراعاندى قالاسىنداعى گۋلاگ-تا بولىپتى.

پاريجگە كەلگەن اللانىڭ اناسى ءبىراز ۋاقىت جۇمىس تابا الماعان. ونى شانحايداعى ديپلومىمەن ەش جەرگە جۇمىسقا المايدى. بىرنەشە ۋاقىت وتكەن سوڭ ول شىعارماشىلىعىمەن عانا كۇن كورە الاتىنىن تۇسىنەدى. باعى جانعان ول پاريجدەگى كونسەرۆاتورياعا وقۋعا تۇسەدى. كەيىن ول پاريجدەگى ورىس قوعامداستىعىندا ونەر كورسەتىپ، رەستورانداردا ءان ايتىپ، كۇن كورەدى. اللا بولسا، رەستوراندا ىدىس جۋىپ ءناپاقا تابادى. ونىڭ اناسى ەكىنشى رەت تۇرمىسقا شىقتى.

اللا يلچۋن قالاي تانىمال مودەلگە اينالدى؟

اللانىڭ قاسىندا بىرگە جۇمىس ىستەيتىن قۇربىسى مودەل بولۋدى ارماندايدى. بىردە ول Dior ءسان ۇيىندەگى كاستينگكە باراتىنىن ايتادى. الايدا كاستينگكە باراتىن كەزدە ول اۋىرىپ قالىپ، "اللاعا مەنىڭ ورنىما بارىپ كەلشى" دەپ ءوتىنىش جاسايدى. اللا يلچۋن كاستينگكە بارعاندا تەك بىرنەشە جۇمىسشىلاردى عانا كورەدى. الگى جۇمىسشىلارمەن اڭگىمەلەسىپ، قۇربىسى «كاستينگ كۇنىن نەمەسە مەكەن جايىن شاتاستىرعان بولار» دەپ كەتىپ قالادى. ارادا بىرنەشە كۇن وتكەسىن اللاعا ديوردىڭ حاتشىسى قوڭىراۋ شالىپ، Dior ءسان ۇيىندە جۇمىس ىستەۋگە شاقىرادى. سويتسە، الگى جۇمىسشىلاردىڭ ىشىندە اتاقتى كريستيان ديوردىڭ ءوزى بولعان. سول كۇنى اللا كريستيان ديوردىڭ كوزىنە قىلداي جىڭىشكە بەلىمەن كوزگە ءتۇسىپتى.

كريستيان ديورعا اللانىڭ دەنە ءبىتىمى، كوزقاراسى ەرەكشە شابىت سىيلاعان. ءتىپتى ديوردىڭ اللانىڭ اۋىر مىنەزىنە 20 جىل بويى شىداعان دەگەن دە دەرەكتەر بار. اللا يلچۋندى كوپشىلىك شىعىستىڭ مارجانى، ديوردىڭ بويتۇمارى، ديوردىڭ مۋزاسى دەپ تە اتاعان.

اللا يلچين وتە نازىك ءارى قىلىقتى بولعان. ونىڭ باس فورماسى مەن قىسىق كوزى ونىڭ سۇلۋلىعىن ودان سايىن ەرەكشەلەندىرە تۇسەتىن. ول پوديۋمعا شىعىپ، تانىلا باستاعان كەزدە بارلىق قىزدار اللا يلچۋن سەكىلدى بولۋعا، سول سەكىلدى بويانۋعا تىرىساتىن.

قازاق قىزى پوديۋمعا شىققان كەزدە يتاليالىق ءسانقويلار اللا يلچۋنعا قىزعانا قاراعان. ءتىپتى يتاليالىق سۇلۋلاردىڭ كوزىنەن قىزعانىش پەن جەككورۋشىلىك اشىق كورىنگەن.

1950 جىلدارى قازاق قىزىنىڭ اتى تانىمال ءانشى، اكتريسالارمەن قاتار اتالعان.

اللا يلچۋن ساياسات جانە ەكونوميكا عىلىمىنىڭ دوكتورى مارك دە ديۋلمەن ەسىمدى پولياك جىگىتىنە كۇيەۋگە شىعادى. عالىم بولعانىمەن، ول ديوردىڭ قولاستىندا فوتوگراف بولىپ قىزمەت ەتكەن. ولار فوتوسەسسيا كەزىندە تانىسىپ، وتاۋ قۇرىپتى.  ودان اللا مارك ەسىمدى ءبىر ۇل دۇنيەگە اكەلەدى.

قازاق قىزى بەتىندەگى ءاجىمى كوزگە تۇسە باستاعان كەزدە كارەراسىن اياقتاۋعا بەل بۋادى. سەبەبى، ول ءوز جانكۇيەرلەرىنىڭ ەسىندە ادەمى، سۇلۋ كۇيىندە قالعىسى كەلدى. 20 جىلدىڭ ىشىندە ونىڭ قىپشا بەلى 49 سم شاماسىندا بولعان.

ءبىر وكىنىشتىسى اللا يلچۋننىڭ قاشان، قايدا قايتىس بولعانى تۋرالى اقپارات جوق.  2018 جىلدىڭ جازىندا فرانسياداعى قازاقستاندىقتار اسسوسياسياسىنىڭ باسشىسى بەرلين يريشيەۆ پاريجدەن اللا يلچۋننىڭ پورترەتىن كەزدەيسوق كورىپ قالعان. اتالمىش پورترەتتى فرانسياعا تانىمال لەون زەيتلەن اتتى سۋرەتشى سالىپتى. اللا يلچۋننىڭ پورترەتىن بەرلين يريشيەۆ ساتىپ الادى. كەيىن قازاقستاندىقتار قازاقتىڭ كۇلشە قىزى تۋرالى ءبىلسىن دەگەن نيەتپەن الماتىعا اكەلىپتى. ءقازىر سۋرەت الماتى قالاسىندا ساقتالعان. بەرلين يريشيەۆ ارادا ءبىراز ۋاقىت وتكەن سوڭ اللا يلچۋننىڭ ۇلىن ىزدەپ تابادى. ولار قازاق قىزى تۋرالى فيلم ءتۇسىرۋدى جوسپارلاپ وتىر.