ەڭبەك جانە الەۋمەتتىك قورعاۋ ۆيسە-مينيسترى سۆەتلانا جاقىپوۆا ۇكىمەتتىڭ بۇگىنگى سەلەكتورلىق جيىنىندا استانا قالاسىندا بولعان قايعىلى جايتقا قاتىستى جۋرناليستەردىڭ سۇراقتارىنا جاۋاپ بەردى. ونىڭ ايتۋىنشا، مينيسترلىك ۇجىمى مينيستر ابىلقاسىموۆامەن بىرگە ورنى تولماس قازاعا تاپ بولعان وتباسىعا كەشە بارىپ كوڭىل ايتىپتى، دەپ جازادى Qamshy.kz اقپارات اگەنتتىگى.

ۆيسە-مينيستر ءوز مالىمدەمەسىندە ۆەدومستۆونىڭ كوپبالالى وتباسىلارعا قولداۋ كورسەتۋ شارالارىن قايتا قاراپ جاتقاندىعىن ايتىپ ءوتتى.

بەلگىلى بولعانداي، كوپ ۇزاماي ول شارالار تۋرالى مينيسترلىك ايتپاق ەكەن.

سۆەتلانا جاقىپوۆانىڭ سوزىنشە، بۇگىندە كوپبالالى وتباسىلار مەملەكەت تاراپىنان ارنايى جاردەماقى مەن قوسىمشا تولەم الادى. ەگەر قانداي دا ءبىر وتباسىنىڭ جاعدايى تىم ناشار بولسا، ولارعا قوسىمشا الەۋمەتتىك كومەك كورسەتىلەدى ەكەن.

-بۇل ماسەلەگە قاتىستى ەشقانداي دا داۋ شىعارماي جاۋاپ بەرەيىن. ءقازىر مينيسترلىكتە كوپ بالالى وتباسىلارعا قولداۋ كورسەتۋ شارالارى قاراستىرىلىپ جاتىر. وسى ۋاقىتقا دەيىن بۇل باعىتتا ەشقانداي دا جۇمىس جاسالمادى دەپ ويلاماڭىزدار. قازىرگى تاڭعا دەيىن قولداۋ كورسەتۋ جۇمىستارىنا بايلانىستى الەۋمەتتىك تەكسەرىس جۇرگىزىلدى. كەز كەلگەن جاعداي فاكت بويىنشا دالەلدەنۋى ءتيىس، - دەيدى ۆيسە-مينيستر.

جۋرناليستەردىڭ «مينيستر ءابىلقاسىموۆانىڭ ءوزى قايدا؟» دەگەن جاۋابىنا سۆەتلانا جاقىپوۆا:

«ول وتكەن اپتادان بەرى اۋىرىپ جاتىر، سوندىقتان ۋاقىتشا دەمالىسقا شىقتى» - دەپ جاۋاپ بەردى.

سونداي-اق، جۋرناليستەردىڭ، بۇكىل جۇرتتىڭ كوكەيىندە جۇرگەن سۇراق: «ايەل ادامدار نە سەبەپتى تۇنگى اۋىسىمدا جۇمىس ىستەيدى؟» دەگەن ساۋالعا ۆيسە-مينيستر ەش قينالماستان:

«بۇل ايەلدەردىڭ - ءوز تاڭداۋى» - دەپ جاۋاپ بەردى.

ۇسىنعان: نازەركە لابيحان