بۇل تۋرالى «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ Facebook-تەگى جەكە پاراقشاسىندا جازدى.
استانادا بولعان قايعىلى وقيعاعا قاتىستى پىكىر بىلدىرگەن ول بۇل جايتتىڭ قوعامداعى وزەكتى ماسەلەلەردى انىق كورسەتىپ بەرگەنىن ايتادى.
«راسىمەن، بەس بىردەي ءبۇلدىرشىننىڭ قاپىدا قازا بولۋى تۇتاس حالىقتىڭ قابىرعاسىن قايىستىرىپ جىبەردى. وكىنىشتەن وزەگىمىز ورتەنەدى. ءبىراق امال جوق. ەندى وسىنداي قاسىرەتتىڭ قايتالانباۋى ءۇشىن ارەكەت ەتۋىمىز كەرەك.
بۇل جايت قوعامداعى كەيبىر وزەكتى ماسەلەلەردىڭ كەزەك كۇتتىرمەي شەشۋدى قاجەت ەتەتىنىن كورسەتىپ بەردى. شىن مانىندە، كوپ بالالى وتباسىلارعا جۇيەلى قولداۋ كورسەتۋ، جۇمىس ىستەيتىن انالارعا لايىقتى جاعداي جاساۋ جانە بالالار قۇقىعىن قورعاۋ ماسەلەسىندە ءالى دە بولسا جەتىلدىرەتىن تۇستاردىڭ بار ەكەنى ءسوزسىز. سوندىقتان دا حالىقتىڭ جاردەماقى، باسپانا ماسەلەسىنە قاتىستى ايتىپ، جازىپ جاتقان سوزدەرى ورىندى.
وسىعان وراي «نۇر وتان» پارتياسى بۇل باعىتتاردا ناقتى ۇسىنىستار دايىنداۋدا. الداعى ۋاقىتتا سول بويىنشا ۇكىمەتپەن بىرلەسىپ جۇمىس ىستەپ، جاعدايدىڭ جاقسارۋىنا ءوزىمىزدىڭ ۇلەسىمىزدى قوسامىز دەپ سەنەمىن.
سونىمەن بىرگە پارتيا جانىنان بالالار قۇقىعىن قورعاۋ جونىندەگى كەڭەس قۇرۋ تۋرالى شەشىم قابىلدانعانىن جەتكىزگىم كەلەدى. وسى باعىتتا دا بۇكىل قوعام بولىپ جۇمىلىپ، وسكەلەڭ ۇرپاقتىڭ جارقىن بولاشاعى جولىندا بىرلەسىپ جۇمىس ىستەيىك»، – دەلىنگەن جازبادا.
ايتا كەتەيىك، ماۋلەن اشىمبايەۆ كەشە دە الەۋمەتتىك جەلى ارقىلى قارا جامىلعان وتباسى مەن بالالاردىڭ اتا-اناسىنا كوڭىل ايتتى.
پىكىر قالدىرۋ