ەلباسىنىڭ كونستيتۋسيالىق كەڭەسكە  كونستيتۋسيانىڭ 42-بابىنىڭ 3-تارماعىنا رەسمي تۇسىندىرمە بەرۋ تۋرالى وتىنىشىنە بايلانىستى قازاقستان پرەزيدەنتى جانىنداعى قسزي حالىقارالىق زەرتتەۋلەر ءبولىمىنىڭ باسشىسى اسەل نازاربەتوۆا الەۋمەتتىك جەلءى ارقىلى  حالىققا تۇسىنىكتەمە بەردى دەپ جازادى Qamshy.kz اقپارات اگەنتتىگى. 

"4 اقپان كۇنى قازاقستان رەسپۋبليكاسىنىڭ پرەزيدەنتى ن.نازاربايەۆتىڭ كونستيتۋسيالىق كەڭەسكە ق ر كونستيتۋسياسىنىڭ 42-بابىنىڭ 3-تارماعىنا رەسمي تۇسىندىرمە بەرۋ تۋرالى ءوتىنىشى جاريالاندى. وسى دەرەككە بايلانىستى قوعامدا، اسىرەسە الەۋمەتتىك جەلىلەردە ءتۇرلى بولجامدار مەن كەرتارتپا اڭگىمەلەر ورىن الا باستاۋىنىڭ الدىن الۋ ءۇشىن ەلباسى حالىققا ءتۇسىندىرۋ مالىمدەمەسىن جاسادى. وندا مۇنداي وتىنىشتەر، ياعني تۋىنداعان ماسەلەلەر بويىنشا كونستيتۋسيالىق كەڭەسكە ونىڭ قۇرىلعان مەرزىمى 1995 جىلدان بەرى 220 رەت ءوتىنىش جاسالعانى، ونىڭ ىشىندە 20-عا جۋىعى پرەزيدەنتتىڭ جەكە وتىنىشىمەن بولعانى اتاپ ءوتىلدى.

كونستيتۋسيالىق كەڭەس ەلىمىزدىڭ اتا زاڭىنىڭ نورمالارىنا رەسمي تۇسىنىك بەرەتىن ورگان بولعاندىقتان، قاجەتتىلىك ورىن العان جاعدايدا قازاقستان كونستيتۋسياسىنا سايكەس پرەزيدەنت، سەنات جانە ءماجىلىس ءتوراعالارى، پرەمەر-مينيستر، پارلامەنت دەپۋتاتتارىنىڭ جالپى سانىنىڭ بەستەن بىرىنەن كەم ەمەسى ءوتىنىش بىلدىرە الادى.

ايتا كەتەرلىگى، پرەزيدەنتتىك رەسپۋبليكالار مىسالىندا وسى تارىزدەس كونستيتۋسيالىق كەڭەسكە ءوتىنىش ءبىلدىرۋ قالىپتى جاعداي. باتىس مەملەكەتتەرىندە كونستيتۋسيالىق باقىلاۋ ورگاندارى قۇرىلعان. اقش-تا بۇل فۋنكسيانى جوعارعى سوت ورىندايدى، فرانسيادا – كونستيتۋسيالىق كەڭەس، گەرمانيادا – فەدەرالدىق كونستيتۋسيالىق سوت، يسپانيادا – كونستيتۋسيالىق تريبۋنا جانە ت.ب. ال كونستيتۋسيالىق باقىلاۋ ينستيتۋتى ماڭىزدى دەموكراتيالىق ينستيتۋت بولىپ تابىلادى. ونىڭ دۇرىس قىزمەت جاساۋى اتازاڭنىڭ ساقتالۋىن جانە ساياسي تۇراقتىلىقتى قامتاماسىز ەتەدى، قوعامداعى ءتۇرلى توپتاردىڭ قارىم-قاتىناسىن رەتتەيدى. اتالعان مەملەكەتتەردە كونستيتۋسيا نەمەسە زاڭ نورمالارىنا بايلانىستى ماسەلە تۋىنداعان جاعدايدا كونستيتۋسيالىق باقىلاۋ ورگاندارىنا ءوتىنىش ءبىلدىرۋ ارقىلى كەز-كەلگەن ماسەلە بويىنشا تۇسىنىك الۋ – ساياسي جۇيەنىڭ كۇندەلىكتى قالىپتى جاعدايى رەتىندە قابىلدانادى.

باستى نازاردا ۇستايتىن ماسەلە – ەلباسى ءوتىنىشىنىڭ استارىندا ترانزيت ماسەلەسى، ياعني بيلىكتى بەرۋ، بولماسا مەرزىمىنەن بۇرىن پرەزيدەنتتىك سايلاۋ وتكىزۋ تۇرماعاندىعى. قازىرگى اقپاراتتىق قوعام جاعدايىندا اعىمداعى ماسەلەلەرگە جان-جاقتى تالداۋ جاساۋ ارقىلى قورىتىندى شىعارۋ بىلىمدىلىكتى، ساياسي ساۋاتتىلىقتى تالاپ ەتەدى. سول سەبەپتى بولىپ جاتقان ساياسي ۇدەرىستەرگە بايىپپەن قاراعان ابزال بولار ەدى"، - دەپ جازادى اسەل نازاربەتوۆا.

ۇسىنعان: اسەل بولات قىزى