استانادا كوپبالالى انالار مەملەكەتتىڭ قولداۋىنا مۇقتاج. بۇگىن ءبىر توپ ەلوردالىق  كۇمىس، التىن القا يەگەرلەرى جاردەماقى كولەمىنىڭ تىم از ەكەنىن ايتىپ شاعىمداندى. سول ءۇشىن ۇل-قىزدارىن ۇيدە تاستاپ، كۇنى-تۇنى جۇمىس ىستەيتىن ايەلدەر دە باۋىر ەتى بالارىنىڭ ءومىرى ءۇشىن الاڭداۋلى. كتك ارناسىنىڭ تىلشىلەرى كوپبالالى انالاردىڭ زارىن تىڭداپ قايتتى. 

التىن القا يەگەرى تاجىگۇل ەركەنشايەۆا 9 بالانىڭ اناسى. 5 ۇل، 4 قىزدى تاربيەلەپ وتىر. بالا-شاعاسىمەن قۋىقتاي عانا بولمەدە تۇراتىن كەلىنشەككە اي سايىن 16 مىڭ تەڭگە جاردەماقى تولەنەدى. ءبىراق بۇل اقشا ازىق-تۇلىكتەن ارتىلمايدى دەيدى اشىنعان انا. 

ء-بىر قاپ ۇن، ءبىر قاپ كارتوپ، ءبىر قاپ شەكىلدەۋىكتىڭ مايىن الامىن بولدى. باسقا ەشتەڭە تيمەيدى 16 مىڭعا. جەيتىن تاماعىمىزعا اقشا جەتپەي وتىر عوي. سوسىن پاتەراقىمىز بار. قارىزىمىز بار. نەسيەنى قاشانعى الا بەرەمىز؟ - دەيدى تاجىگۇل ەركەنشايەۆا.

نەسيە الىپ كۇن كورىپ جۇرگەن باتىر انالار جەتەرلىك. بارلىعى كوپ بالالى جانۇياعا بەرىلەر جاردەماقى ءوسىپ، كورسەتىلەر كومەك ارتسا دەيدى. ويتكەنى، 5-6 بالانى باۋىرىنا باسقان كەلىنشەكتەر ءبىر جاعىنا شىعىسىپ، جۇمىس ىستەيىن دەسەك مۇمكىندىك جوق دەيدى. كىشكەنتاي ۇل-قىزداردى جالعىز قالدىرا المايدى.

ء-بارى ءبىز ءۇشىن تۋدىڭ با دەيدى؟ ءوز تىرشىلىگىڭدى ءوزىڭ جاسا دەيدى، - دەدى كوپبالالى انا.

نەگىزى كۇمىس پەن التىن القا يەگەرلەرىنە مەملەكەتتەن  10 مىڭنان 16 مىڭ تەڭگەگە دەيىن جاردەماقى تولەنەدى. ەندى «جانۇيا-2030» ورتالىعى كوپبالالى انالارعا اقشالاي عانا ەمەس، پاتەر الۋ جاعىنان دا قولداۋ كورسەتىلسە دەيدى. ويتكەنى، كوبى 5 بالاسىنان ايىرىلىپ، قايعىدان قان جۇتقان وتباسى سەكىلدى سارايدا ءومىر سۇرەدى.

 -«كوپ بالالى وتباسى دەگەن» باعدارلاما اشىلۋى كەرەك. نەگە ولاردان العاشقى جارنا سۇرايدى؟ وزدەرى پاتەر جالداپ ءجۇر. بىزدە تىركەلگەن جۇزدەگەن انانىڭ بارلىعىندا باسپانا جوق. ارنايى انالار ءۇشىن ارزان پايىزبەن العاشقى تولەمسىز ءۇي بەرسە، سول پاتەر اقىنى انالاردىڭ تولەيتىندەرىنە سەنىم بىلدىرەمىن، - «جانۇيا-2030» انا مەن بالانى قورعاۋ ورتالىعىنىڭ ديرەكتورى جاننۇر ساحييەۆا.

ال ەڭبەك جانە حالىقتى الەۋمەتتىك قورعاۋ مينيسترلىگى كوپ بالالى ايەلدەرگە بەرىلەتىن اقشانىڭ از ەكەنىن ايتەۋىر مويىنداپ، شارالاردىڭ قاراستىرىلاتىنىن كەش تە بولسا مالىمدەگەن ەدى. 

-جانۇيادا 4 بالادان كوپ  بولسا، كوپبالالى بولىپ سانالادى. ولارعا بەرىلەتىن الەۋمەتتىك كومەكتىڭ ءتۇرى كوپ. بيىل مۇنداي وتباسىلارعا بيۋدجەتتەن 365 ميلليارد تەڭگە بولىنگەن. ءبىراق، ءقازىر جاردەماقىنى تاعى ءوسىرۋ تۋرالى ۇسىنىس جاسادىق، - دەدى كەشە جۋرناليستەردىڭ سۇراعىنا جاۋاپ بەرگەن ەڭبەك جانە حالىقتى الەۋمەتتىك قورعاۋ ۆيسە-مينيسترى سۆەتلانا جاقىپوۆا.

سونداي-اق، ەڭبەك جانە حالىقتى الەۋمەتتىك قورعاۋ ۆيسە-مينيسترى، بالا-شاعاسىن اسىراۋ ءۇشىن تۇندەلەتىپ جۇمىس ىستەيتىن اتا-انالارعا قاتىستى دا مالىمدەمە جاسادى. ايتۋىنشا، بۇل ولاردىڭ ءوز تاڭداۋى ەكەن. قاپىدا 5 بالاسىنان كوز جازىپ قالعان وتباسى وسى ۋاقىتقا دەيىن شەنەۋنىكتەردەن ەشقانداي كومەك سۇراماپتى. ال مينيسترلىكتىڭ كوپبالالى وتباسىلارعا جاردەماقىنى كوبەيتۋ جايلى ۇسىنىسى ازىرگە ءسوز جۇزىندە. سوندىقتان ونىڭ ناقتى قانشاعا وسەتىنى  دە بەيمالىم.

ۇسىنعان: گۇلىم جاقان