كوپبالالى انالار ءۇشىن اقشانى قايدان الۋعا بولاتىنىن مەن بىلەمىن. «انا» دەگەن كادىمگى ماماندىقتىڭ ءبىر تۇرىنە اينالۋى ءتيىس. ءبىر بالا تۋدىڭ با – ايىنا 100 دوللار الاسىڭ، ەكىنشى بالا ءۇشىن – 200 دوللار، ءۇشىنشى بالاڭدى دۇنيەگە اكەلسەڭ – 300 دوللار. ءتورتىنشى بالاڭدى تۋدىڭ، اۆتوماتتى تۇردە پاتەرلى بولدىڭ. مۇنىڭ ءبارى قايىرىمدى مەملەكەتتىڭ سىيلىعى بولادى. بەسىنشى بالا ءۇشىن 500 دوللار، تاعىسىن تاعى...

سىزگە بۇل مۇمكىن ەمەستەي كورىنەر ءارى كۇلكىلى شىعار، ءيا؟ بەكەر!

بۇل - ۇلتتىق قاۋىپسىزدىكتىڭ ماسەلەسى! بۇل ءتىپتى مەملەكەتتىگىمىزدى ساقتاۋ ماسەلەسى!

ءبىر عاسىر بۇرىن قازاق حالقىنىڭ تەڭ جارتىسى قىرىلدى. سوۆەت يمپەرياسى قولمەن جاساعان اشارشىلىق، گەنوسيد بولماعاندا، بۇگىندە قازاقتاردىڭ سانى 50 ميلليونعا جەتەر مە ەدى... نە كەرەك، بۇگىن سانىمىز 10 ميلليوننان ءسال عانا اسادى.

شىنىندا ءبىز ءوز ەلىندە ءتىلى مەن تاريحىنا دەگەن قۇقىعىن ءالى كۇنگە دەيىن دالەلدەۋگە تىرىسىپ، جانتالاسىپ جۇرگەن، ءتىپتى جويىلۋعا شاق قالعان حالىقپىز.  بۇل تىعىرىقتان شىعۋدىڭ ءبىر عانا جولى بار، ول – گەومەتريالىق پروگرەسسكە جەتۋ.

10 جىلدان كەيىن ءبىزدىڭ سانىمىز قازىرگىدەن ءبىر جارىم ەسەگە ارتۋى ءتيىس، ال 20 جىلدان كەيىن ەكى ەسەگە ارتامىز.

بىزگە ازۋلى ايۋ مەن قۋ ايداھارعا قارسى تۇرا الاتىن باتىرلار كەرەك! جانە بىزگە سونداي باتىرلاردى دۇنيەگە اكەلەتىن انالار كەرەك! بىلەسىزدەر مە،  بىزگە كەم دەگەندە 35 ميلليون ازاماتى ءومىر سۇرەتىن مەملەكەت قاجەت. سەبەبى سونداي ەل عانا ءوزىن-وزى قامتاماسى ەتە  الادى ءارى ىشكى نارىققا يە بولا الادى.

ال مۇنىڭ بارىنە اقشانى قايدان الامىز؟ ءبارىڭىزدى الاڭداتقان سۇراق تا وسى.

بىزدە ونداي اقشا وتە كوپ. تەك سونىڭ ءبارى تۇككە تۇرعىسىز دۇنيەلەرگە شاشىلىپ جاتىر. ماسەلەن، شۋچينسكىدەگى ءترامپليندى الىپ قارايىق. ونى سالۋعا مەملەكەتتەن 1 ميلليارد دوللار قارجى جۇمسالدى.

مەملەكەت ىشىندە جۇزگە جۋىق سپورتشى ترامپليننەن سەكىرۋمەن اينالىسادى. ونىڭ ۇستىنە الماتىدا ءبىر ترامپلين ونسىز دا بار. شۋچينسكىدەگى قىس مەزگىلىنىڭ 150 كۇنىنىڭ جارتىسىندا تەمپەراتۋرا 20 گرادۋستان تومەن بولىپ تۇرادى. ياعني ۇشۋعا بولمايتىن ۋاقىت. قالعان 50 كۇننىڭ 40 كۇنىندە قاتتى اياز بولادى، وندا دا ۇشۋعا تىيىم سالىنادى. 5 كۇن قالادى. سول 5 كۇن ءۇشىن ءبىزدىڭ بيلىك 1  ميلليارد دوللار اقشا جۇمسادى.

انىقتاما رەتىندە ەكونوميكاسى ءبىزدىڭ ەلدەن 50 ەسەگە جوعارى ۇلىبريتانيادا ترامپلين ءالى جوق.

استانانى الايىق.

پيراميدادا 1300 ورىندىعى بار وپەرا ساحناسىن بىلەتىن بولارسىز... جوق، بۇل از عوي، ونىڭ جانىنا «قازاقستان» كونسەرت زالىن سالىپ قويدىق. ول دا از بولدى، تاعى وپەرا تەاترىن سالدىق. نەگە؟ ميللياردتاعان دوللارلاردى نەگە بەكەر شاشىپ جاتىرمىز؟ الگى پيراميدا جىلىنا 10-15 كۇن جۇمىس ىستەيدى، كونسەرت زالى دا سولاي. ونىڭ ۇستىنە ول جەردە ەشكىمگە پايداسى جوق شارالار وتەدى. ال ول عيماراتتاردىڭ جىلۋى مەن وزگە دە قىزمەتتەرى ءۇشىن تاعى مەملەكەتتەن ميلليونداعان دوللارلار بولىنەدى ەمەس پە؟

كيەلى تۇركىستان قالاسىن وبلىس دەپ اتادىق تا، ۇلكەن-ۇلكەن سارايلار سالۋعا كىرىستىك. 200 ميلليون دوللارداي اقشا تاعى كەتتى.

بارىپ تۇرعان اقىماقتىق... ترامپ ەلدەگى شتاتتارعا سونداي نىساندار سالىپ كورسىنشى، «ەسالاڭ» اتانىپ، حالىقتىڭ قۋدالاۋىنا ۇشىرايدى.

مۇنىڭ ءبارى بيزنەسمەن گەنري فوردتىڭ ايتۋىنشا، «ءتۇبى كەدەيلىككە اكەلەتىن «ءولى دەنەلەردى تاسۋ» ارەكەتى».

مەن تەك بىرنەشە مىسال كەلتىردىم... بۇل «ءولى دەنەلەردىڭ» ارتىندا قازاقستاننىڭ كارتاسى جاتىر.

ەگەر ءار نىساننىڭ ءوزى ءبىر-بىر پانتەون بولسا، بىزگە تاعى پانتەوننىڭ نە قاجەتى بار؟ «قورقاق ۇكىمەت» پەن وتىرىكشى دەپۋتاتتاردىڭ پانتەونى دا جەتەدى ەمەس پە؟

«ءولى دەنەلەردى» ءارى - بەرى تاسۋدى دوعارايىقشى؟! كۇنى كەشە بەس بالاقايدى شىنايى جەرلەدىك.

ومىرىمىزدە ءبىر رەت بولسا دا شىنايى ىستەر اتقارايىق، بۇگىنگى جانە بولاشاق انالارىمىز ءۇشىن جاقسىلىق جاساپ، تىرىسىندە اياقتارىن ءسۇيىپ وتەيىك!

ارمان شورايەۆتىڭ Facebook-تەگى پاراقشاسىنان اۋدارىلدى

اۋدارعان: گۇلىم جاقان