بىلتىر سىبايلاس جەمقورلىققا قاتىسى بولعان 1 290 ادامنىڭ ارەكەتى اشكەرەلەندى، دەپ حابارلايدى Qamshy.kz اقپارات اگەنتتىگى Abctv.kz سايتىنا سىلتەمە جاساپ.

ەلىمىزدە سىبايلاس جەمقورلىققا قاتىستى قۇقىق بۇزۋشىلىقتار سانى تومەندەۋدە. مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكبايەۆتىڭ سوزىنشە، ءبىراق بۇل تەندەنسيا تۇراقتى تۇردە جالعاسىپ كەلەدى. 2016 جىلمەن سالىستىرعاندا كورسەتكىش 23 پايىزعا كەمىگەن. 

«بۇل سىبايلاس جەمقورلىقتىڭ الدىن الۋ بويىنشا جۇرگىزىلىپ جاتقان كەشەندى جۇمىستىڭ جەمىسى»، – دەيدى اگەنتتىك ءتوراعاسى.

دەرەكتەرگە سۇيەنسەك، 2018 جىلى سىبايلاس جەمقورلىققا بارعان 1 290 ادامنىڭ ارەكەتى اشكەرەلەنگەن. ولاردىڭ 25ء-ى – رەسپۋبليكالىق دەڭگەيدە، 91ء-ى – وبلىستىق دەڭگەيدە، 142ء-سى قالالىق جانە اۋداندىق دەڭگەيدە ۇستالعان ادامدار.

«بىلتىر ۇيىمداسقان 4 قىلمىستىق توپ قىزمەتىنىڭ جولى كەسىلدى. جۇيەلى تۇردە ورىن العان سىبايلاس جەمقورلىقتىڭ 87 فاكتىسى انىقتالىپ، ول بويىنشا 288 لاۋازىمدى تۇلعا قىلمىستىق جاۋاپكەرشىلىككە تارتىلدى. مەملەكەتكە كەلتىرىلگەن زالال كولەمى 21 ملرد تەڭگەنى قۇرادى. ونىڭ 89 پايىزى ءوندىرىلىپ الىندى»، – دەدى اليك شپەكبايەۆ اگەنتتىكتىڭ القا ماجىلىسىندە.

وتكەن جىلى اگەنتتىك تۇرعىندارعا كورسەتىلەتىن مەملەكەتتىك قىزمەتتىڭ ساپاسىنا باقىلاۋعا ەرەكشە نازار اۋدارعانىن جاقسى بىلەمىز. بۇل رەتتە، «جاسىرىن ساتىپ الۋشى» ءتاسىلى سالاداعى قۇقىق بۇزۋشىلىقتاردى انىقتاپ، جويۋعا ايتارلىقتاي ۇلەس قوسقان.

«سونداي-اق، اگەنتتىك «سيفرلىق اگەنت» ءموبيلدى قوسىمشاسىن دا ىسكە قوستى. وسىلايشا، تۇرعىندار سمارتفوننىڭ كومەگىمەن مەملەكەتتىك مەكەمە ۇسىناتىن كەز كەلگەن قىزمەتتىڭ ساپاسىنا قاتىستى پىكىر بىلدىرە الاتىن بولدى. مۇنىڭ ءبارى سىبايلاس جەمقورلىق ارەكەتىن جەدەل انىقتاپ، زاڭعا قايشى قادامعا بارعان مەملەكەتتىك قىزمەتشىنى جازالاۋعا مۇمكىندىك بەرەدى»، – دەيدى اگەنتتىك ءتوراعاسى. 

سونىمەن قاتار، 2018 جىلدىڭ باسىندا «قوعامدىق باقىلاۋ كارتاسى» ازىرلەندى. بۇل جوبا كۇندەلىكتى قىزمەت بارىسىندا شەنەۋنىكتەردىڭ سىبايلاس جەمقورلىققا بارماۋىن جانە ولاردىڭ جۇمىسىنىڭ ساپاسىن ارتتىرۋعا باعىتتالعان. ونى قولدانۋ كەزىندە ازاماتتاردىڭ الەۋمەتتىك جەلىلەر مەن call-ورتالىق ارقىلى جىبەرگەن وتىنىشتەرى بويىنشا حالىقتىڭ الەۋمەتتىك كوڭىل-كۇيىنە اسەر ەتەتىن 2،2 مىڭنان استام ماسەلە شەشىلدى»، – دەپ تولىقتىردى ءسوزىن اليك شپەكبايەۆ.

ونىڭ ايتۋىنشا، اگەنتتىكتى وڭتايلاندىرۋ جانە بيۋدجەت شىعىندارىن قىسقارتۋ جۇمىستارى بيىل دا جالعاسادى. ەسكە سالا كەتەيىك، بىلتىر اگەنتتىكتىڭ ورتالىق اپپارات قىزمەتكەرلەرىنىڭ سانى ۇشتەن بىرگە دەيىن قىسقارتىلعان بولاتىن.

«ەندى تەك ەڭ ءتيىمدى مامانداردى قالدىرۋ ارقىلى بۇل كورسەتكىشتى 40 پايىزعا دەيىن جەتكىزىپ، ولاردىڭ اقشالاي ۇلەسىن ارتتىرۋ كوزدەلۋدە»، – دەدى اگەنتتىك ءتوراعاسى.

سونداي-اق اگەنتتىكتەگى 254 باسشىلىق لاۋازىم قىسقارتىلىپ، ارتىق قۇرىلىمدار جويىلدى. وسىلايشا، سىبايلاس جەمقورلىققا قارسى قىزمەت وكىلدەرىنىڭ ەڭبەكاقىسى شىعىس ەۋروپا ەلدەرىنىڭ دەڭگەيىنە دەيىن جەتكىزىلدى.

«ۇنەمدەلگەن ءار تەڭگە سىيلىقاقىلار مەن جاردەماقىلار تولەنەتىن «جيناق شوتقا» جىبەرىلەدى»، – دەدى ول.

القا ماجىلىسىندە اليك شپەكبايەۆ ءبىرقاتار باستامانىڭ شەتىن شىعاردى. ماسەلەن، ول ۋ-083، ۋ-086 مەديسينالىق انىقتامالارىنان باس تارتۋعا بولاتىنىن ايتتى.

«سوڭعى ۋاقىتتا اتالعان انىقتامالاردى جيناۋ كوپشىلىكتىڭ نارازىلىعىن تۋدىرا باستادى. ويتكەنى بۇل قۇجاتتار شەشىم قابىلداۋعا ەشقانداي اسەر ەتپەيدى. سونداي-اق، وسىنداي انىقتامالاردى ساتۋ بەلەڭ الىپ كەلەدى. مۇنداي قۇجاتتاردان ەش قيىندىقسىز-اق باس تارتۋعا بولادى»، – دەيدى اگەنتتىك ءتوراعاسى.

بۇدان بىلاي قاجەتتى قۇزىرەتى مەن تاجىريبەسى بار كەز كەلگەن ادامنىڭ ۇلتتىق بيۋرودا قىزمەت ەتۋگە دەگەن مۇمكىندىگى ارتاتىن بولدى. ويتكەنى، سىبايلاس جەمقورلىققا قارسى قىزمەتتەگى بارلىق بوس لاۋازىمعا اشىق كونكۋرس وتكىزىلەدى.

جالپى، قۇقىق قورعاۋ ورگاندارىنىڭ قىزمەتى اكىمشىلىك مەملەكەتتىك قىزمەت ستاندارتىنا جاقىنداپ كەلەدى.

«قۇقىق قورعاۋ ورگاندارىنداعى قىزمەتكە ۇمىتكەرلەر ىرىكتەۋدىڭ العاشقى ەكى كەزەڭىن ءبىزدىڭ اگەنتتىكتە وتەدى. سوڭعى ەكى جىلدا 73 مىڭنان استام ادام زاڭنامانى بىلۋگە ارنالعان تەستىلەۋگە قاتىستى. ولاردىڭ تەك وننان تورتەۋى عانا ىرىكتەۋدەن وتەدى. ال قۇقىق قورعاۋ ورگانىنىڭ وزىندە وتەتىن سۇحباتقا تەك دايىندىعى جاقسى جانە قابىلەتتى ۇمىتكەرلەر عانا بارادى. بۇل ءوز كەزەگىندە ەڭ كوپ سىن ايتىلاتىن پوليسيا قىزمەتىنە ءساتتى جاڭارتۋ جۇرگىزۋگە مۇمكىندىك بەرەدى. بۇگىندە قۇقىق قورعاۋ جانە سوت ورگاندارىندا سىبايلاس جەمقورلىققا قارسى باعىتتالعان شارالار كۇشەيتىلۋدە»، – دەدى اليك شپەكبايەۆ.

اگەنتتىك ءتوراعاسى "مەملەكەتتىك قىزمەتتە «ءمىنسىز بەدەل» تۇسىنىگىن ەنگىزۋ قاجەت" دەيدى. سوندا مەملەكەتتىك قىزمەتشىلەردىڭ ەتيكالىق قۇقىق بۇزۋشىلىقتارى ازايا تۇسپەك. ماسەلەن، سوڭعى ءتورت جىلدا ەتيكالىق قۇقىق بۇزۋشىلىقتار سانى ەكى ەسە ازايعان. ەسكە سالا كەتەيىك، 2015 جىلعى 746 ەتيكالىق قۇقىق بۇزۋشىلىق ورىن السا، بىلتىر 353 بۇزۋشىلىق تىركەلگەن.

«ءوز قاتارىمىزداعى ادامداردىڭ تازالىعى – جۇمىسىمىزدىڭ نەگىزگى قاعيداسى. وتكەن جىلى اگەنتتىكتىڭ، ۇلتتىق بيۋرونىڭ جانە مەملەكەتتىك باسقارۋ اكادەمياسىنىڭ 7 قىزمەتكەرى قىلمىستىق قۋدالاۋعا ۇشىرادى. بۇگىندە ولاردىڭ 5ء-ى سوتتالدى. مۇنداي جاعدايلاردى جويۋ ءۇشىن سىبايلاس جەمقورلىققا قارسى تۇراقتىلىق بويىنشا جۇيەلى تۇردە ارنايى تەكسەرۋلەر جۇرگىزۋ كەرەك. تاجىريبە ءساتتى جۇزەگە اسسا، ونى باسقا دا قۇقىق قورعاۋ ورگاندارىندا پايدالاناتىن بولامىز»، – دەدى اليك شپەكبايەۆ.

ۇسىنعان: نازەركە لابيحان