سەمەيدە جۇما كۇنى بەس قاباتتى جاتاقحانادان ءورت شىعىپ، سونىڭ سالدارىنان ءبىر ادام قازا بولدى، دەپ جازادى Qamshy.kz اقپارات اگەنتتىگى توتەنشە جاعدايلار كوميتەتىنىڭ باسپا ءسوز قىزمەتىنە سىلتەمە جاساپ.

وقيعا ورنىنا كەلىپ جەتكەن ءورت سوندىرۋشىلەر تۇرعىنداردى جاتاق ورنىنان  شىعارىپ ۇلگەرگەن، ءورتتى ءسوندىرۋ ءۇشىن 2 ساعاتتاي ۋاقىت كەتىپتى.

ق ر ءىىم-نىڭ تجك مالىمەتىنشە، ءورت شىققانى تۋرالى حابار ءورت ءسوندىرۋ قىزمەتىنە تۇنگى 01:45 شاماسىندا كەلىپ تۇسكەن. ءورت سوندىرۋشىلەر جاتاقحانادان 79 ادامدى شىعارعان، ونىڭ 20-سى كىشكەنتاي بالالار ەكەن.

«اۆتوباسپالداقتاردىڭ كومەگىمەن 19 ادام قۇتقارىلدى، ونىڭ ەكەۋى كىشكەنتاي بالالار. ەۆاكۋاسيالانعان ادامداردىڭ بارلىعى №35 مەكتەپكە ورنالاستىرىلدى. ءورت بولعان جەردەن ءبىر ەر ادامنىڭ ءمايىتى تابىلدى. ءورت تۇنگى ساعات 03:27 شاماسىندا تولىقتاي ءسوندىرىلدى»، - دەيدى تجك باسپا ءسوز قىزمەتىندەگىلەر.

بەلگىلى بولعانىنداي، ءورتتى سوندىرۋگە جەكە قۇرامنان 25 ادام جانە 8 ءورت سوندىرۋگە ارنالعان تەحنيكا جۇمىلدىرىلدى. قازىرگى ۋاقىتتا ءورتتىڭ نە سەبەپتەن شىققانى انىقتالىپ جاتىر.

ۇسىنعان: نازەركە لابيحان