قوعامدىق دامۋ ءمينيسترى دارحان قالەتايەۆ جاس وتباسىلارعا پاتەر قاشاننان بەرىلە باستايتىنىن ايتتى، دەپ جازادى Qamshy.kz اقپارات اگەنتتىگى.

«ءبىز ايدىڭ سوڭىنا دەيىن نەگىزگى ۇسىنىستاردى ازىرلەۋدى جوسپارلاپ وتىرمىز. ولاردى دايىنداپ قويعانبىز، ءقازىر ءتيىستى مينيسترلىكتەرمەن بۇل ماسەلەنى تالقىلاپ جاتىرمىز»، - دەپ ايتىپ ءوتتى مينيستر قالەتايەۆ.

ونىڭ ايتۋىنشا، نەگىزگى جۇمىستار ءۇش مەگاپوليستىڭ اكىمدىگىنە تاپسىرىلادى.

«پاتەرلەردى ءبىز بەرمەيمىز، جەرگىلىكتى اتقارۋشى ورگاندار بەرەتىن بولادى. ءبىز باستى كريتەرييلەرىن دايىندايمىز، ال قالعان جۇمىستاردى ءۇش مەگاپوليستىڭ اكىمدىكتەرى اتقارادى. ەلباسى الماتى، استانا جانە شىمكەنت قالالارىنا 1 مىڭ پاتەر ءبولدى»، - دەيدى دارحان قالەتايەۆ.

سونداي-اق، مينيستر ءوز سوزىندە اعىمداعى جىلى دەيىن جاس وتباسىلارعا ارنالعان پاتەرلەر سالىنبايتىنىن ايتىپ ءوتتى.

«جاس وتباسىلارعا ارنالعان ءبىر ءتيپتى ۇيلەر جوق بولعاندىقتان، بيىل نارىقتان 40-50 شارشىمەتردى قۇرايتىن پاتەرلەردى ساتىپ الۋعا شەشىم قابىلداندى. ال كەلەسى جىلدان باستاپ ولارعا پاتەر سالۋ جۇمىستارى باستالادى»، - دەپ ايتتى دارحان قالەتايەۆ.

«ءبىز جاستار ساياساتىنا جاۋاپتى ورگان بولعاندىقتان پاتەرلەر ارزانداۋ بەرىلگەنىن قالايمىز، ءبىراق بارلىعى دا نارىقتاعى باعاعا بايلانىستى. جاستاردىڭ جاعدايى قانشالىقتى جەتەتىنىنە قاراپ شەشىم قابىلدايتىن بولامىز. بۇل ىسكە قاراجات اكىمدىك تاراپىنان بولىنەدى. ال بيۋدجەتتىڭ قارجىسى ەلباسىنىڭ تاپسىرماسىمەن ءبولىندى»، - دەيدى مينيستر قالەتايەۆ.

ۇسىنعان: نازەركە لابيحان